Yauhas 13:34-35
Nqe cim zaj kawm:
“Nimno kuv yuav muab ib txoj kevcai tshiab rau nej: Nej ib leeg yuav tsum hlub ib leeg ib yam li kuv hlub nej. Nej ib leeg yuav tsum hlub ib leeg. Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim.” (Yauhas 13:34-35)
Lus nug xav:
– Txoj kevcai tshiab uas Tswv Yexus muab rau peb muaj yam dabtsi tshiab?
– Tus qauv kev hlub hauv txoj kevcai tshiab uas tus Tswv muab yog dabtsi?
– Thaum Pawg Ntseeg ua neej haujsim ntawm kev ncaj ncees thiab kev hlub, Pawg Ntseeg yuav qhia tshwm tus Tswv txojkev hlub rau hauv ntiajteb li cas?
Txoj kevcai hais txog kev hlub twb tau Vajtswv tau qhia tseg hauv Phau Vajluskub Qub lawm (Levis Kevcai 19:18). Nyob hauv Yauhas 13:34-35, Tswv Yexus tau muab ib txoj kevcai tshiab hais tias: Yuav tsum sib hlub raws li tus qauv “Nej ib leeg yuav tsum hlub ib leeg ib yam li kuv hlub nej.” Yam tshiab hauv txoj kevcai no tsis yog qhov uas yuav tsum hlub, tiamsis yog tus qauv ntawm txojkev hlub: ntawd txojkev hlub txi tus kheej, txaus siab pab thiab muab lwm tus tej kev cheemtsum tso nyob ua ntej yus tus kheej tej kev cheemtsum. Tus Tswv kuj qhia meej hais tias kev hlub yog lub cim qhia paub txog ib tug thwjtim tseeb. Tsis saib los ntawm tej lus hais, tes haujlwm lossis kev txawj ntse, tiamsis yog saib los ntawm txojkev ua neej sib hlub, ces lwm tus thiaj paub hais tias peb yog tus Tswv tug. Yog li ntawd, txoj kevcai uas tus Tswv muab qhia meej hais tias lub neej raws tus Tswv qab yuav tsum qhia tshwm los ntawm kev hlub uas nqis tes ua haujlwm, qhia tshwm Yexus Khetos lub siab.
Tsis tas li ntawd xwb, Tswv Yexus tau muab ib tug qauv kev hlub rau cov thwjtim hauv txoj kevcai tshiab, ntawd yog: tsis yog tsuas yuav hlub xwb, tiamsis yuav tsum hlub ib yam li Nws tau hlub. Ntawd yog txojkev hlub uas txi yus tus kheej, txo hwjchim thiab ua qhov tseeb, ib yam li Tswv Yexus tau ua qauv qhia thaum Nws ntxuav cov thwjtim kotaw. Yog li ntawd, kev ua neej ncaj ncees tsis yog tsuas ua neej raws tus Tswv tus qauv xwb, tiamsis tseem yog ua neej qhia tshwm tus Tswv txojkev hlub rau lwm tus. Txoj kevcai tshiab no yog muab txojkev sib raug zoo “seem ntsug” nrog tus Tswv thiab txojkev sib raug zoo “seem tav” nrog tibneeg los koom ua ke.
Txoj kevcai tshiab uas tus Tswv muab kuj qhia tias kev hlub yuav tsum yog lub cim qhia meej txog ib tug ntseeg Yexus Khetos. Tej zaum tibneeg yuav tsis pom tag nrho tus ntseeg txojkev ntseeg uas nyob hauv nruab siab, tiamsis lawv yuav paub tau los ntawm qhov uas peb sib hlub. Ramsey Michaels qhia meej tias kev ua neej sib hlub yog “muab Vajtswv cov menyuam li feem xyuam thiab lawv li feem xyuam rau neeg ntiajteb los ua koom ua ke, los ntawm lub meejmom uas yog Tswv Yexus cov tubtxib.” Thaum Pawg Ntseeg ua neej muaj kev hlub tiag, paub sib zam txim, sib pab thiab sib txhawb nqa, ces Pawg Ntseeg yuav dhau los ua timkhawv uas muaj sia rau lub ntiajteb. Yog li ntawd, Pawg Ntseeg tau nqua hu kom ua neej haujsim ntawm kev ncaj ncees thiab kev hlub. Kev ncaj ncees tuav kom peb nyob hauv qhov tseeb, hos kev hlub qhia tshwm qhov tseeb ntawd los ntawm koob hmoov hlub. Thaum txhua tus ntseeg xyaum raws Tswv Yexus tus qauv, ua neej sib hlub los ntawm tej haujlwm uas qhia tshwm tseeb txhua hnub, ces Pawg Ntseeg yuav qhia tshwm tus Tswv txojkev hlub, thiab lub ntiajteb yuav paub hais tias peb yog Nws cov thwjtim tseeb.
Thov Vajtswv,
Tus Tswv, ua tsaug uas Koj tau muab txoj kevcai tshiab rau Koj cov menyuam txhua tus. Thov Koj pab kom nyuam yaus ua neej haujsim ntawm kev ncaj ncees thiab kev hlub hauv Pawg Ntseeg los ntawm tej haujlwm uas qhia tshwm tseeb, kom dhau ntawm nyuam yaus, Koj txojkev hlub thiaj ci mus txog rau ntau tus neeg. Nyuam yaus tuav Tswv Yexus Khetos lub npe thov, Amees.
Yam dabtsi qhia tau hais tias peb tau ua neej ncaj ncees thiab sib hlub nrog peb cov kwvtij nkauj muam hauv Pawg Ntseeg lawm?
Nyeem Vajluskub hauv peb lub xyoos: Ntawv Nkauj 134-135
Kênh Youtube BHKTHN:
