Hanas: Thov Vajtswv Thaum Ntsib Teebmeem – 4/2/2025

370

 

 

I Xamuyees 1:1-10

Nqe cim.

“Hanas ntxhov siab heev, nws txawm sawv tsees, nws thiaj thov tus TSWV thiab quaj ncia heev.” (I Xamuyees 1:10)

 

Lus nug rau sawvdaws xav.

–       Hanas tabtom ntsib yam teebmeem twg?

–       Nws xaiv txojkev twg los tawmtsam cov uas thuam nws?

–       Hanas txojkev xaiv qhia rau peb kawm tau zaj kawm twg txog kev thov Vajtswv thaum ntsib kev ntxhov siab?

Hanas yog ib tug ntawm Ekanas ob tug pojniam, Ekanas yog ib tug uas muaj kev ntseeg ruaj khov rau Vajtswv dhau ntawm kev coj qhia nws tsevneeg mob siab pehawm thiab coj tsiaj tuaj fij rau Vajtswv. Hanas tabtom ntsib ib qhov teebmeem tsis muaj haukev tawm, ntawd yog nws tsis muaj menyuam, thiab qhov teebmeem no pib ntawm nws tuaj xwb vim Peninas yeej muaj taus menyuam (nqe 2)! Qhov no yog teebmeem loj vim raws li cov neeg Yudas ces tsis muaj menyuam yog ib qhov uas txajmuag kawg li. Tsis tas li ntawd xwb, Peninas tseem ua rau Hanas nyuaj siab ntxiv thaum pheej txob thuam thiab rhuav Hanas ntsejmuag. Raws li cov neeg tiam ntawd txojcai, Ekanas muaj cai cem Hanas, lossis muab Hanas nrauj povtseg, tiamsis nws ho xaiv ua tus nkag siab, totaub Hanas tej kev ntxhov siab thiab nrhiav kev ua zoo rau Hanas.

Thaum zoo li ntawd Hanas tsuas paub “nyuaj siab thiab quaj tsis xav noj mov” (nqe 7). Ntawm no yog kev xav hauv nruab siab uas peb nkag siab tau, tiamsis ntawd yog txojkev xav  txhaum. Thib ib, Hanas nyuaj siab vim pheej saib mus rau tej teebmeem ua rau nws hnov qab txoj koob hmoov nws tau vim muaj ib tug txiv paub hwm Vajtswv thiab hlub nws. Thib ob, Hanas tsis tau zeem paub tus Tswv lub siabnyiam rau nws lubneej. Ob zaug nyob hauv nqe 5 thiab 6 hais meej hais tias qhov uas Hanas tsis muaj menyuam yeej nyob hauv tus Tswv txojkev tswjhwm, thiab tus Tswv tabtom npaj yam zoo tshajplaws rau Hanas thiab tus Tswv haivneeg. Thib peb, Hanas tej kev xav txhaum cuamtshuam rau nws lub cuabyig, ntawd yog coj kev nyuaj siab rau nws tus txiv uas hlub tshua nws (nqe 8). Yog tias yav tas los, peb pheej cia tej kev xav txhaum tswjkav peb, ces cia li zaum thiab sau tawm tej koob hmoov uas tus Tswv tau pub thiab tabtom pub rau peb tus kheej thiab tsa suab ua Nws tsaug.

Kuj tsis muaj menyuam zoo li Hanas, tiamsis Laxees ho nrhiav kev sib txeeb nrog Le-as thiab nws hais tias: “kuv thiaj yeej nws lawm”! (Chivkeeb 30:1-8). Tiamsis Laxees ho raug swb thaum mus ua raws li Xalas uas yog nws tus txiv tus pog, ua rau txojkev iab siab tseem pheej nyob hauv nws nruab siab! Tsis ua li Laxees, thaum ntsib kev ntxhov siab, Hanas tau ua tej yam zoo rau peb kawm xyaum. Nws tuaj cuag thiab quaj rau Vajtswv, nws tsis chim rau tus Tswv lossis chim rau Peninas (nqe 10). Hanas xaiv kev tawmtsam cov neeg txob thuam thiab rhuav nws ntsejmuag los ntawm kev thov Vajtswv, nws tsis siv tej lus ntsawv siab lossis dhia mus nrog lawv sib cav sib ceg kom muaj yeej swb.

 

Thov Vajtswv,

Tus Tswv, nyuam yaus ua Koj tsaug vim txawm yuav nyob hauv lub tsamthawj twg, txawm mob siab npaum cas, los Koj yeej nrog nraim nyuam yaus, mloog thiab totaub nyuam yaus lub siab. Thov qhia nyuam yaus paub los cuag Koj thiab taij thov, txhob ua tej yam tsis zoo li tibneeg ibtxwm ua. Nyuam yaus tuav Yexus Khetos lub npe thov, Amees.

Peb pheej xaiv ua raws txojkev twg thaum ntsib lwm tus siv peb tej teebmeem los tawmtsam peb? 

Nyeem Vajluskub hauv peb lub xyoos: Lukas 1

Kênh Youtube BHKTHN:

https://www.youtube.com/c/bhkthn

 

Bài trướcJôna ‘Bok Khan Lê̆ Adrol: Krao Khan Đơ̆ng Lăm Klak Ka – 3/2/2025
Bài tiếp theoH’An: Wah Lač Tơdah Tlă Anăp Hŏng Klei Dleh Dlan – 4/2/2025