Jôna 2:1-11
“Mă-lei inh iŏk nơ̆r hơri bơnê păng iŏk tơmam soi pơyơ̆r kơ Ih; Inh gô pơkeh dôm nơ̆r inh mă đei pơkă boih. Tơdrong dŏng pơklaih đơ̆ng Kră Yang” (Jôna 2:10)
Nơ̆r jet tơchĕng pơwao:
– Yua kơ kiơ ‘bok Jôna kơdâu ôn đơ̆ng Kră Yang?
– Tơdrong Sư krao khan noh yă kiơ?
– Sư pơkă yă kiơ hăm Kră Yang?
– Lu bơ̆n pơhrăm iŏk ‘bai pơhrăm âu thoi yơ?
Nơ̆r Kră Yang khan kơ ‘bok Jôna athei năm tơ pơlei tih Niniwe “Ih iung bĕ! Năm tơ pơlei tih Niniwe, pơma khă lu sư, yua kơ tơdrong yoch lu sư tih kơtơ̆ng truh tơ Inh.” (Jôna 1:2). Mălei trŏ kơ năm tơ Niniwe tơ gah yănơ̆m hơlĕch mălei sư tŏk tơ duk kơdâu ôn năm tơ Têrasi tơ gah bơmơ̆t. ‘Bok Jôna ưh kơ wă adrĕch pơm kơnê̆ pơlei Niniwe tơbral, hli kơ kơnh Kră Yang ‘Bok Kei-Dei pơm ‘lơ̆ng, ‘mêm mơnat, hiơ̆ kơblĕk, ‘bĕnh kơ mơnat păng tơplih huay ăn tơdrong gleh truh.” (Jôna 4:2). Sư ‘maih lăng Kră Yang hil phak. Mălei Kră Yang ăn hơbŭt tih pơm kơ duk wă pơchah, kơplah noh sư tep hlơ̆k tơ lăm duk. Lu bơngai huơ̆r duk hli tơrơ, lu sư hlang lăng wă kơ băt tơdrong âu yua đơ̆ng bu, hlang lăng trŏ kơ ‘bok Jôna. Sư drơ̆ng mơn kơdih kơdâu ôn đơ̆ng ‘Bok Kei-Dei, lu sư pơgŏ hơtat sư tơ lăm đak dơsĭ, na kial hơbŭt thĕng hloi (Jôna 1). Kră Yang ăn Ka tih luăn sa sư.
Đơ̆ng lăm klak ka pêng năr, pêng măng, ‘Bok Jôna mơn hli krưp kơplah tơdrong lôch jê̆ truh. Sư mơn băt kơdih đei tơdrong gleh hơnat truh “Đơ̆ng lăm klak ka anih lôch” wă bơtho thoi oei lăm bơsat lôch, sư adrin krao khan kơ Kră Yang (trong 7) wă khan “tơ gah ala kơ teh” dah “hơlŭng jrŭ” wă pơma gah ‘bŭ bơngai lôch. Sư băt kơdih tơdrong arih rai wă hiong bơih, tơdrong lôch wă truh ngei ngei. Lăm jơ ‘năr hrei hrei âu, tơdrong sư tơchĕng tơ gah Kră Yang păng tơ “hnam akŭm” Sư (trong 5, 8). Sư oei chang gô tơdrong dŏng pơklaih đơ̆ng Kră Yang, Sư mơ̆ng nơ̆r Sư păng dŏng pơklaih Sư.
Kră Yang gơh pơm tôm tơdrong, ‘lơ̆ng rơgoh, păng kư̆m ‘bok mă ‘mêm mơnat. Dang ei, Kră Yang kư̆m oei yua tơdrong gleh truh dang pơmat dêh, apinh lu bơ̆n ‘nĕ kơ bơ̆l hăl gleh lap, tôch đon, dah pơma jô̆ jŏk kơ Kră Yang, mălei athei ngoi tơ Kră Yang Tơ’ngla mă ‘mêm mơnat, krao khan ham Sư thoi ‘bok Jôna adrol sơ̆.
Ơ Kră Yang ‘mêm mơnat, apinh Ih mơnat ăn kơ inh yua kơ lơ wơ̆t inh pơm yoch, ưh kơ chu yom Ih. Apinh Ih tơgŭm inh ling lang chu yom Ih păng đei jơhngơ̆m ‘mêm mơnat kơ lu bơngai tam mă băt kơ Ih tơpă hăm tơdrong wă kơ gơh chông anhăk lu sư wih brŏk tơ Ih. Yua anăn Yêsu Krist, Amen!
Lu bơ̆n tam đĭ jơhngơ̆m krao khan tơbral hăm Kră Yang lăm dôm tơdrong bơ̆n tơchĕng, nơ̆r pơma ưh kơ trŏ hăm Kră Yang, păng wă tơpă ră roi Tơdrong ‘Nao ‘Lơ̆ng dŏng pơklaih lơ bơngai ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 19
Kênh Youtube BHKTHN:
