Klei Aê Diê Blŭ: I Y‑Samuel 1:1‑10
Êlan kliăng: “H’An rŭng răng êdi leh anăn wah lač kơ Yêhôwa leh anăn hia ênguôt.” (I Y‑Samuel 1:10)
Klei êmuh ksiêm mĭn: Ya klei dleh dlan H’An dôk găn? Ya êlan hdră ñu ruah čiăng bi kdơ̆ng wĭt hŏng phung bi riêl ai ñu? Êlan hdră H’An brei kơ drei ya klei hriăm kơ klei wah lač tơdah dôk ti anăp klei rŭng răng?
H’An jing sa čô hlăm dua čô mô̆ Y‑Êlkana, ñu jing sa čô mnuih mâo klei đăo kjăp kơ Aê Diê, hŏng klei ñu atăt gŏ sang ñu sĭt suôr hlăm klei kkuh mpŭ leh anăn klei myơr. H’An dôk tlă anăp hŏng sa klei dleh dlah amâo mâo êlan dưi tlaih ôh, anăn jing klei plao, leh anăn klă sĭt klei dleh dlan anei kbiă hriê mơ̆ng ñu kyuadah H’Pênina mâo anak (êlan 2)! Anei ăt jing sa klei dleh prŏng kyua klei kpĭ mơ̆ng klei bhiăn hlăm ƀuôn sang phung Israel ngă bi hêñ kơ pô plao. Hĭn êjai, H’Pênina lŏ mđua thiăm klei ênguôt hnĭng kơ H’An tơdah bi riêl ai gơ̆ hŏng klei blŭ bi ruă ai tiê. Hlăm dhar kreh ênuk anăn, Y‑Êlkana mâo klei dưi ƀuah ăl kơ H’An, tơl wăt lui gơ̆, ƀiădah ñu ruah êlan klei pap, thâo săng klei ruă êka ai tiê H’An dôk găn, leh anăn gĭr čiu hnô brei kơ gơ̆.
Klei H’An wĭt ngă jing “hia leh anăn amâo ƀơ̆ng huă ôh” (êlan 7). Anei jing sa klei wĭt ngă hŏng klei djhưng ai dưi thâo săng, ƀiădah lĕ jing klei wĭt ngă amâo djŏ ôh. Tal sa, H’An rŭng răng kyuadah uêñ mĭn đei kơ klei dleh dlan ƀiădah wơr bĭt hĕ klei pap ñu dôk mâo tơdah Aê Diê brei kơ ñu sa čô ung thâo huĭ mpŭ kơ Aê Diê leh anăn khăp kơ ñu. Tal dua, H’An amâo ƀuh ôh klei Aê Diê čiăng kơ klei hdĭp ñu. Dua blư̆ hlăm êlan 5 leh anăn 6 blŭ kñăm kơ klei H’An jing plao dôk hlăm klei Aê Diê kiă kriê, leh anăn Ñu dôk mprăp klei jăk hĭn kơ H’An wăt kơ phung ƀuôn sang Ñu. Tal tlâo, klei H’An wĭt ngă ênguôt anăn bi hmăi kơ mnuih hlăm sang, klă sĭt ba klei bi ênguôt kơ ung ñu khăp (êlan 8). Tơdah drei tuôm brei klei bi djhưng ai ênguôt kiă kriê drei sui hruê, snăn dôk gŭ bĕ leh anăn čih jih klei pap Aê Diê brei leh, leh anăn dôk brei kơ drei, leh anăn myơr klei bi mni kơ Aê Diê.
Msĕ klei jing mniê plao ƀiădah mdê hŏng H’An, H’Račel ruah êlan bi lông hŏng H’Lêa, leh anăn ñu lač snei: “Kâo dưi leh”! (Klei Mphŭn Dơ̆ng 30:1‑8). Ƀiădah H’Račel dlưh lĕ tơdah ñu lŏ tui êlan H’Sara găn leh, jing aduôn ung ñu, leh anăn kyua klei phĭ hlăm ai tiê adôk nanao hlăm ai tiê ñu! Mklăk wĭt, hlăm klei rŭng răng pô, H’An mâo sa bruă ngă năng kơ drei tui hriăm. Ñu nao hia hŏng Aê Diê hrô kơ klei ăl kơ Aê Diê amâodah kơ H’Pênina (êlan 10). H’An ruah leh êlan wĭt ngă kơ phung bi riêl ai ñu kyua klei ñu plao, hŏng klei yua mnơ̆ng bi blah jing klei wah lač hrô kơ yua êlah kƀông thâo blŭ amâodah klei bi mneh msao.
Ya êlan drei khăng ruah tơdah tlă anăp hŏng phung mjhua klei dleh dlan drei dôk găn čiăng ngă kơ drei?
Wah lač: Ơ Khua Yang, bi mni kơ Khua Yang kyuadah hlăm si boh klei jing dưn, thâodah ruă snăk dưn, Khua Yang ăt dôk nanao mbĭt hŏng kâo, mđing hmư̆ leh anăn thâo săng kơ kâo. Brei kâo nao kơ Khua Yang leh anăn wah lač, hrô kơ klei wĭt ngă tui si mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
