Klei Aê Diê Blŭ: Klei Bi Hriêng 24:21-22
Êlan kliăng: “Kyuadah khua kiă kriê jing dĭng buăl kơ Aê Diê čiăng ngă klei jăk kơ ih. Ƀiădah tơdah ih ngă klei jhat, huĭ bĕ: kyuadah ñu amâo djă đao gưm hơăi mang ôh. Kyuadah ñu jing dĭng buăl Aê Diê čiăng bi truh klei Aê Diê ngêñ kơ hlei pô ngă klei jhat” (Rôm 13:4)
Klei êmuh ksiêm mĭn: Ya ngă Mtao Salômôn mtô brei anak ñu gưt kơ phung khua kiă kriê? Phung bi mguôp hŏng phung bi kdơ̆ng si srăng jing! Ya drei srăng ngă tơdah klei bhiăn phung khua kiă kriê bi klăk hŏng klei bhiăn Aê Diê?
Mtao Salômôn mtô brei anak ñu huĭ mpŭ kơ Aê Diê leh anăn gưt kơ phung khua kiă kriê. Pruê̆ blŭ “huĭ mpŭ kơ Yêhôwa leh anăn kơ mtao” (êlan 21) čih bi mguôp mbĭt čiăng kñăm kơ klei mtao jing pô kiă kriê Aê Diê mjing brei kiă kriê phung ƀuôn sang, dưi bi kmhal hlei phung ngă soh hŏng klei bhiăn, wăt dưi lui phung anăn hdĭp amâodah bi mdjiê tơdah ngă klei soh prŏng. Amâodah lač snei, phung khua kiă kriê jing phung Aê Diê yơh mjing leh, kyuanăn brei phung ƀuôn sang mpŭ leh anăn gưt (I Y-Pêtrôs 2:17). Êngao kơnăn, anak amâo dưi ngă klei bi mguôp hŏng phung bi kdơ̆ng ôh čiăng tlaih mơ̆ng klei bi rai. Boh blŭ “bi rai” hlăm êlan 22 mâo boh blŭ msĕ jing “knap mñai” Aê Diê leh anăn mtao srăng bi truh bhiâo riâo rit, phung bi kdơ̆ng amâo thâo êlâo ôh, jing phung ngă klei bi kdơ̆ng čiăng plah mă klei dưi leh anăn čăt đĭ hlăm bruă hŏng klei mĭn čiăng bi rai, amâo djŏ hŏng klei đup gưt ôh. Čiăng đĭ hlăm bruă hŏng klei kpă djŏ snăn brei gưt kơ klei dưi djŏ tui si klei bhiăn phung khua kiă kriê.
Klei Aê Diê Blŭ mñă kơ grăp čô drei čiăng klei hdĭp drei mâo klei êđăp ênang leh anăn bruă drei amâo mâo klei bi huĭ ôh, brei drei mpŭ kơ klei dưi djŏ hŏng klei bhiăn mơ̆ng phung khua kiă kriê, đăm bi mguôp mbĭt ôh hŏng phung ngă klei bi kdơ̆ng čiăng plah mă klei dưi. Khua ƀĭng kna Y-Pôl lač Aê Diê brei klei dưi kiă kriê kơ phung khua čiăng brei klei jăk, klei tŭ dưn kơ mnuih “Kyuadah khua kiă kriê jing dĭng buăl kơ Aê Diê čiăng ngă klei jăk kơ ih” (Rôm 13:4). Kyua mâo phung khua kiă kriê yơh phung ƀai leh anăn ngă klei jhat tŭ klei bi kmhal, bi phung mnuih jăk, kpă ênô srăng hdĭp êđăp ênang. Snăn yơh, tơdah gưt kơ phung khua kiă kriê kpă ênô, jing gưt kơ Aê Diê leh anăn ngă djŏ tui si klei bhiăn Ñu mơh. Knŏng tơdah klei bhiăn phung khua kiă kriê bi klăk hŏng klei bhiăn Aê Diê kơh drei srăng gưt leh anăn ngă tui si klei bhiăn Aê Diê hĭn kơ gưt tui si klei mtrŭn mơ̆ng phung khua kiă kriê. Khua ƀĭng kna Y-Pêtrôs leh anăn phung khua ƀĭng kna mkăn tơdah dôk dơ̆ng ti anăp phung khua phat kđi blŭ hŏng jhŏng klei snei: “Hmei srăng gưt kơ Aê Diê, hĭn hŏng gưt kơ mnuih” (Bruă Phung Khua Ƀĭng Kna 5:29). Akâo Khua Yang đru drei hŏng jih ai tiê knang kơ Ñu – Pô Mâo Jih Klei Myang, wah lač kơ phung khua kiă kriê leh anăn mpŭ kơ diñu čiăng kơ drei dưi kkuh mpŭ kơ Aê Diê leh anăn hưn Klei Mrâo Mrang Jăk hŏng klei êđăp ênang.
Drei knang kơ Aê Diê hŏng jih ai tiê leh anăn gưt kơ phung khua kiă kriê leh mơ̆?
Wah lač: Ơ Khua Yang, kâo bi mni kơ Ih brei phung khua kiă kriê ngă klei kpă ênô ti lăn ala anei. Akâo Khua Yang đru diñu thâo huĭ mpŭ kơ Khua Yang, mtrŭn klei bhiăn bi djŏ hŏng klei bhiăn Ih. Đru kâo thâo knang kơ Ih jih ai tiê leh anăn gưt kơ phung khua kiă kriê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yakơ 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
