Pajlug 24:21-22
Nqe cim:
“Rau qhov nomtswv yog Vajtswv tus tubtxib uas ua haujlwm pab nej. Tiamsis yog nej ua txhaum, nej yeej yuav ntshai nws, rau qhov nws muaj hwjchim rau txim rau nej! Nws yog Vajtswv tus tubtxib uas rau txim rau cov neeg ua txhaum” (Loos 13:4)
Lus nug rau sawvdaws xav:
– Vim li cas vajntxwv Xalumoos qhia kom menyuam yuav tsum hwm nomtswv?
– Cov neeg uas koom siab nrog tus neeg ntxeev siab yuav zoo li cas?
– Peb yuav ua dabtsi thaum uas nomtswv tej kevcai tsis raws li Vajtswv siab nyiam?
Vajntxwv Xalumoos qhia menyuam yuavtsum hwm Vajtswv thiab hwm nomtswv. Lo lus “hwm tus TSWV thiab hwm vajntxwv” (nqe 21) sib txuas ua ke xav qhia meej hais tias, vajntxwv yog tus uas tau Vajtswv pub cai los tswj kav pejxeem, muaj cai rau txim rau txhua tus pejxeem uas ua txhaum kevcai, muaj cai tseg txojsia lossis rau txim tuag rau tus uas ua txhaum loj. Hais ua lwm seem, cov nomtswv yog cov uas tau Vajtswv tsa, vim li ntawd cov pejxeem yuavtsum hwm thiab mloog lawv lus (1 Petus 2:17). Dua li ntawd, qhia kom tsis txhob koom nrog cov neeg ntxeev siab thiaj tsis raug kev puastsuaj. Lo lus “puastsuaj” hauv nqe 22 muaj lub ntsiab yog“kev puastsuaj loj” lossis “kev tuag” uas Vajtswv thiab vajntxwv yuav tso los raug thaum tsis nco ceevfaj mus ua txhaum, thaum ua neeg ntxeev siab, thiab thaum tsim kev kub ntxhov xav txeeb meejmom hwjchim tsis yog los ntawm kev mloog lus. Xav kom tau nce qib hauv yus tus kheej ces yuavtsum ua haujlwm zoo thiab hwm txoj cai uas yog kev yog cai ntawm cov nomtswv hauv txhua lub tsamthawj.
Vajtswv Txojlus ntuas peb txhua tus hais tias, yuav muaj lub neej kaj siab, thiab tsis raug txim ces yuavtsum hwm txoj cai uas Vajtswv thiab nomtswv tau teeb tseg kom ua, tsis txhob koom nrog cov neeg tuav tswvyim ua phem los txeeb lub meejmom hwjchim. Timthawj Paulus hais tias, Vajtswv pub cai rau nomtswv tswj kav, yog xav kom muaj kev thajyeeb kom zoo rau tibneeg kev noj nyob “rau qhov nomtswv yog Vajtswv tus tubtxib uas ua haujlwm pab nej. Tiamsis yog nej ua txhaum, nej yeej yuav ntshai nws, rau qhov nws muaj hwjchim rau txim rau nej! Nws yog Vajtswv tus tubtxib uas rau txim rau cov neeg ua txhaum” (Loos 13:4). Los ntawm kev ncaj ncees ntawm kev txiav txim ces tus neeg ua txhaum yuav raug txim, tiamsis leejtwg ua zoo, ua ncaj ncees yuav tau nyob kaj siab. Yog li ntawd, thaum mloog cov nomtswv uas kav ncaj ncees lus, kuj yog mloog Vajtswv lus thiab ua raws li Nws txoj kevcai. Tsuas yog thaum nomtswv txoj cai mus tsis raws li Vajtswv siab nyiam peb thiaj xaiv mloog Vajtswv lus heev dua mloog nomtswv lus. Timthawj Petus thiab cov timthawj thaum nyob ntawm cov thawjcoj rooj txiav txim, lawv hais khov kho hais tias: “Peb yeej yuav mloog Vajtswv lus heev dua li mloog neeg lus” (Tes Haujlwm 5:29). Thov Vajtswv pab kom peb tso siab rau Vajtswv tus ua tau ib puas tsav yam, thov Vajtswv pab cov nomtswv thiab hwm lawv kom peb muaj lub neej kaj siab pehawm Vajtswv thiab qhia Nws txoj Moo zoo.
Thov Vajtswv,
Vajtswv, Nyuam yaus ua Koj tsaug uas Koj pub rau cov nomtswv muaj cai siv txoj kev ncaj ncees los tswj kav hauv ntiajteb no. Thov Koj pab kom lawv paub hwm thiab ntshai koj, paub muab tej kevcai lij choj uas phim Koj tej lus qhia los tswj kav tibneeg. Thov Koj pab kom nyuam yaus tso siab tagnrho rau Koj thiab mloog cov nomtswv lus. Nyuam yaus tuav Tswv Yexus Khetos lub npe thov. Amees.
Peb puas tso siab rau Vajtswv kawg siab ntsws thiab mloog nomtswv lus?
Nyeem Vajluskub hauv peb lub xyoos: Yakaunpaus 2
Kênh Youtube BHKTHN:
