Klei Aê Diê Blŭ: Rôm 13:1-7
Êlan kliăng: “Brei jih jang mnuih gưt kơ phung khua kiă kriê. Kyuadah amâo mâo ôh klei dưi kiă kriê amâo kbiă hriê mơ̆ng Aê Diê, leh anăn klei dưi kiă kriê Aê Diê sơăi mjing leh” (Rôm 13:1)
Klei êmuh ksiêm mĭn: Ya ngă brei phung đăo gưt kơ phung khua kiă kriê? Ya phung đăo srăng ngă čiăng mâo klei bi mguôp djŏ hŏng phung khua kiă kriê čiăng đru mkŏ mjing klei hdĭp yang ƀuôn mâo klei êđăp ênang leh anăn kpă ênô?
Brei phung đăo gưt kơ phung khua kiă kriê, gưt kơ jih jang klei bhiăn mtrŭn leh. Kyuadah Aê Diê yơh mjing leh digơ̆ kơ bruă gĭt gai leh anăn brei klei dưi kiă kriê kơ digơ̆ (êlan 1). Kyuanăn hlei pô bi kdơ̆ng hŏng phung khua kiă kriê hlăm yang ƀuôn, pô anăn ăt dôk bi kdơ̆ng hŏng klei Aê Diê mtă mơh jing Pô mdưm leh digơ̆ kơ bruă kiă kriê, leh anăn pô anăn srăng tŭ klei bi kmhal tui si klei bhiăn (êlan 2). Khua ƀĭng kna Y‑Pôl mñă, phung khua kiă kriê jing phung dĭng buăl Aê Diê tiŏ hriê čiăng răng mgang klei êđăp ênang hlăm yang ƀuôn. Hlei pô ngă jăk, gưt kơ klei bhiăn amâo mâo klei huĭ ôh, ƀiădah hlei phung ngă jhat srăng huĭ ktư̆ yơ̆ng ti anăp phung khua kiă kriê kyuadah digơ̆ amâo suê̆ đao gưm hơăi mang ôh (êlan 3-4).
Ƀiădah lĕ, Klei Aê Diê Blŭ ăt brei drei thâo mơh hlăm đa đa klei, phung khua gĭt gai amâo ngă bruă djŏ ôh, diñu mtrŭn klei bhiăn bi kdơ̆ng hŏng klei bhiăn Aê Diê, bi klăk hŏng klei đăo leh anăn klei bhiăn phung đăo kơ Krist, hlăm klei anei, brei drei čuăn gưt kơ klei bhiăn Aê Diê. Klei Aê Diê Blŭ brei drei ƀuh klei bi hmô mơ̆ng Khua pô hưn êlâo Y‑Đaniel amâo huĭ ôh kơ klei arăng ghă ktang tĭt, sa hruê tlâo blư̆ ñu wah lač kơ Aê Diê (Y‑Đaniel 6:1-10). Khua ƀĭng kna Y‑Pêtrôs lŏ wĭt lač kơ klei arăng ghă amâo brei ñu hưn Anăn Khua Yang snei: “Hmei srăng gưt kơ Aê Diê hĭn hŏng gưt kơ mnuih” (Bruă Phung Khua Ƀĭng Kna 5:29).
Klei Aê Diê Blŭ mtă brei phung đăo jing phung ƀuôn sang thâo bi hmô jăk, ngă jih bruă arăng jao leh anăn bruă klam kơ sa čô mnuih ƀuôn sang, tuh jia bi ênŭm čiăng tla prăk mlan kơ phung khua kiă kriê, leh anăn yua kơ bruă mkŏ mjing čiăng ba klei hơĭt, klei êđăp ênang leh anăn klei tŭ dưn kơ mnuih ƀuôn sang. Khua Yang čiăng drei dôk êđăp ênang hŏng jih jang mnuih hlăm anăn mâo wăt phung khua kiă kriê. “Tla bĕ jih nư diih đuôm kơ diñu — mbha bĕ mnga kơ hlei pô čŭng, tuh bĕ jia kơ hlei pô rĭng, huĭ bĕ kơ hlei pô năng diih huĭ, mpŭ bĕ kơ hlei pô năng diih mpŭ” (êlan 7).
Snăn yơh, čiăng mâo klei hdĭp êđăp ênang leh anăn mâo klei bi mguôp jăk hŏng phung khua kiă kriê, brei drei hdĭp djŏ tui si hdră êlan Khua Yang mtă leh, weh đuĕ kơ klei jhat leh anăn ngă klei jăk. Drei gưt kơ phung khua kiă kriê leh anăn tuh jia bi ênŭm amâo djŏ drei huĭ kơ klei bi kmhal ôh, ƀiădah kyua ai tiê kpă, drei mpŭ kơ phung khua kiă kriê leh anăn mpŭ kơ klei kiă kriê hŏng klei thâo mĭn Aê Diê.
Si ngă drei gưt kơ phung khua kiă kriê leh anăn tuh jia ênŭm mơ̆?
Wah lač: Ơ Khua Yang, Pô mjing phung khua kiă kriê lăn čar, akâo Khua Yang mă bruă hlăm ai tiê phung khua gĭt gai čiăng digơ̆ thâo huĭ mpŭ kơ Ih leh anăn kiă kriê jăk hŏng klei thâo mĭn. Akâo Khua Yang đru kâo gưt kơ phung khua kiă kriê leh anăn bi leh ênŭm bruă klam kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
