Loos 13:1-7
Nqe cim:
“Sawvdaws yuav tsum mloog nomtswv lus, rau qhov tej nomtswv ntawd yog Vajtswv pom zoo thiaj muaj, thiab tej nomtswv ntawd puavleej yog Vajtswv tsa.” (Loos 13:1)
Lus nug rau sawvdaws xav:
– Cov ntseeg Yexus yuav tsum mloog nomtswv lus, yog vim qhov vimchij twg?
– Cov ntseeg Yexus cheemtsum yuav tsum ua dabtsi kom muaj txojkev sib txuas yog nrog tej nomtswv, koom tes txhim kho lub tebchaws kom nyob thajyeeb thiab ncaj ncees?
Cov ntseeg Yexus yuav tsum mloog nomtswv lus, ua raws tej kev caij tswj. Rau qhov Vajtswv yog tus tsa lawv los tswj teb kav chaw (nqe 1). Yog leejtwg tawmtsam cov nomtswv kav tebchaws lub hwjchim, tus ntawd kuj tabtom tsis mloog Vajtswv tus uas tsa nomtswv tej lus samhwm, tus ntawd yuav raug txim raws li txoj cai (nqe 2). Timthawj Paulus hais tias, tej nomtswv yog cov neeg uas Vajtswv tsa los ua haujlwm tswj saib kev thajyeeb thiab ua rau lub tebchaws nyob tiaj tus. Cov uas ua qhov zoo, ua raws txoj cai yeej tsis muaj qhov ntshai, tiamsis cov uas ua txhaum ces yuav ntshai ua ib ce tshee hnyo tabmeeg cov nomtswv thaum raug rau txim (nqe 3-4).
Tiamsis Vajtswv Txojlus kuj qhia rau peb paub tias muaj qee lub sijhawm tshwjxeeb, cov nomtswv ua tsis yog cai, tsis yog lawv tes haujlwm, thiab txhaum Vajtswv txoj kevcai, txawv txojkev ntseeg Yexus, thaum no peb yuav tsum xaiv mloog, ua raws li Vajtswv txoj kevcai. Vajtswv Txojlus qhia paub Daniyees tus qauv, txawm yog nyob txoj cai txwv los txhua hnub Daniyees yeej thov Vajtswv peb zaug (Daniyees 6:1-10). Timthawj Petus teb rau cov neeg txwv tsis pub mus qhia Vajtswv zaj li no: “Peb yeej yuav mloog Vajtswv lus heev dua li mloog neeg lus.” (Tes Haujlwm 5:29).
Cov ntseeg Yexus kuj tau nqua hu kom ua cov pejxeem zoo, uas pab tebchaws ntawm feem xyuam ua pejxeem, them se txaus nkaus kom muaj nyiaj hli them rau cov nomtswv ua haujlwm thiab siv ua tej yam muaj nqis rau cov pejxeem. Vajtswv xav kom peb ua neej nyob haum nrog txhua tus, thiab nrog cov nomtswv. “Nej yuav tsum them txhua yam se: se liaj se teb, se vaj se tsev thiab tej se nyiaj txiag uas nej khwv tau, nej yuav tsum hwm thiab saib taus txhua tus nomtswv huv tibsi.” (nqe 7).
Yog li, cia kom muaj lub neej kaj siab thiab muaj kev sib raug zoo nrog tej nomtswv, peb yuav tsum ua neej raws nraim li Vajtswv tus lw, qaij deb tej kev txhaum thiab xyaum ua qhov zoo. Peb mloog tej nomtswv lus thiab ua tiav feem them se tsis yog ntshai raug nplua, tiamsis yog vim lub siab, peb saib taus Vajtswv lub hwjchim tswj kav txawj ntse.
Thov Vajtswv,
Tus Tswv, Koj yog tus tsa muaj tej nomtswv los tswj teb kav chaw, nyuam yaus thov Koj tshoov cov nomtswv lub siab kom lawv paub hwm Koj thiab muaj kev txawj ntse kav tebchaws. Thov Vajtswv Koj pab kom nyuam yaus ua neeg mloog nomtswv lus thiab ua tiav feem xyuam. Nyuam yaus tuav Tswv Yexus lub npe thov, Amees.
Peb puas mloog nomtswv lus thiab them se txaus lawm tau?
Nyeem Vajluskub hauv peb lub xyoo: I Vajntxwv 8
Kênh Youtube BHKTHN:
