Blŭng a 7:1-24
“Đĭ đăng adrĕch khŭl arih kơpal teh pơrăm pơlôch đĭ, đơ̆ng kon bơngai truh tơ kon sem brem, lu hơdrông kơep lep ler, lu sem păr; lăp Nôê hăm lu bơngai, lu sem brem lăm duk đĕch oei arih.” (Blŭng a 7:23)
Nơ̆r jet tơchĕng pơwao:
– Roi tơ’bôh tơdrong phak ‘noh krưp dang yơ?
– Lu đe bu Kră Yang dŏng păng dŏng thoi yơ?
– Yua kơ kiơ Kră Yang dŏng lu sư?
– Lu bơ̆n gô pơm kiơ tơgŭm lu bơngai cheng bơ̆n kơplah Kră Yang wă phak?
Kơplah tơdrong kơnê̆ ‘bĕnh ‘bang tơ ala teh âu, ‘Bok Kei-Dei pơkă pơrăm đĭ đăng teh đak hăm đak lip. Đak lip âu ưh kơ trŏ minh anih iĕ ayơ noh đĕch ôh mălei lip đĭ đăng dêh char, đak lip tih tơpă, kơplah đak lơ̆p lah lai jơ̆p kơpal teh , mă khan kơpal kông kơ jung, pơrăm đĭ dôm sem brem noh (trong 19-23). ‘Nâu bơih tơdrong phak krưp tih, ưh kơ đei bu kĕ hlôi.
Mălei đei lu mơ’nah gơh klaih. Trong 7 đei chih: “Nôê hăm akăn sư mơ̆t lăm duk, hơdai lu kon lu mŏ mai sư wă kơ klaih đơ̆ng đak lơ̆p. Dôm lu kon sem brem mă ‘lơ̆ng rơgoh păng lu kon sem brem mă ưh kơ ‘lơ̆ng rơgoh, lu sem păr, lu kon hơdrông kơep lep ler kơpal teh,” (trong 7, 8). ‘Bok Kei-Dei wei lăng tơdrong arih kon bơngai păng lu sem brem sư wă pơjing adrĕch adrung ‘nao đơ̆ng rŏng kơ đak lơ̆p. Kră Yang dŏng lu sư hlôi đơ̆ng đak lơ̆p kơplah ăn lu sư mơ̆t lăm duk. Sơ̆p hla bơar ‘Bok Kei-Dei đei tơbăt kơplah lu sư păng sem dơrong đei rơih iŏk mơ̆t lăm duk bơih na Kră Yang tang lê̆ ‘măng duk (trong 16). Kră Yang bơih Tơ’ngla dŏng lu sư păng wei lăng tơdrong arih mă đơ̆ng Sư rơih iŏk.
Sơ̆p hla bơar ‘Bok Kei-Dei chih ăn kơ ‘bok Nôê: “Kră Yang khan kơ Nôê thoi âu: Ih păng đĭ-đăng hnam dơnŏ ih mơ̆t bĕ lăm duk, yua kơ lăm lu bơngai chăl dang ei Inh ‘bôh ih jơ̆ minh ‘nu bơngai tơpăt.” (trong 1). Kră Yang dŏng ‘bok Nôê păng hnam dơnŏ sư yua kơ Kră Yang ‘bôh sư bơngai “‘lơ̆ng tơpăt”. Mălei tơdrong tơm kăl mă Nôê jing bơngai ’lơ̆ng tơpăt ‘bơ̆t anăp Kră Yang noh yua kơ đon lui, thoi nơ̆r Kră Yang đei chih lăm Hêbrơ 11:7 “’Bok Nôê sơ̆ kư̆m yua kơ sư lui, na lăp sư kơtơ̆ng ‘Bok Kei-Dei khan kơ sư ning-mônh gô đei tơdrong truh na sư lui hloi. Sư pơm minh pôm duk tih wă dŏng pơklaih hnam dơnŏ sư. Sư chu ‘Bok Kei-Dei, thoi noh na sư tơbăt kơ bơ̆n ‘Bok Kei-Dei jô̆ đĭ đăng kon bơngai nai yoch ngăl. Pôm ‘bok Nôê đĕch ‘Bok Kei-Dei jô̆ bơngai ‘lơ̆ng, yua kơ sư đei đon lui kơ ‘Bok Kei-Dei kơjăp.” Jơ̆ minh ‘nu bơngai arih tơ ala teh âu, sĭt tơpă ‘bok Nôê ưh kơ trŏ bơngai ‘lơ̆ng tôm tơdrong. Tơdrong tơpăt sư “Yua kơ đon lui” păng đon lui noh tơ’bôh đơ̆ng tơdrong jang sư đĭ jơhngơ̆m hli yom păng arih chu kiơ̆ nơ̆r Kră Yang.
Rim bơngai lăm teh đak âu tă kơ pơm yoch ngăl păng đĭ đăng lu sư trŏ kơ pŭ iŏk tơdrong phak noh. Mălei bơnê kơ Kră Yang yua kơ tơdrong ‘mêm Sư ăn đĕch kơ bơ̆n. Kră Yang ‘Bok Kei-Dei ăn tơdrong ‘mêm mơnat Sư păng dŏng pơklaih bơngai bu lăp đon lui gơnang kơ Kră Yang Yêsu Krist. Păng Kră Yang wă kơ lu bơngai gơh klaih noh chă ră roi Tơdrong ‘Nao ‘Lơ̆ng gah tơdrong dŏng pơklaih Sư kơ lơ bơngai tơ ala teh âu wă kơ lu sư dai gơh klaih đơ̆ng tơdrong phak tuch luch kơnh.
Ơ Kră Yang, inh băt kơ inh bơngai pơm yoch, păng trŏ kơ Ih wă phak. Mălei yua kơ tơdrong ‘mêm ăn đĕch đơ̆ng Ih, yua kơ đon lui kơ Kră Yang Yêsu, na inh gơh klaih đơ̆ng tơdrong phak krưp noh. Apinh ih tơgŭm inh arih rim năr trŏ kơ tơdrong dŏng pơklaih, păng ưh kơ pơdơh ră roi tơdrong ‘mêm noh kơ bơngai tam mă băt kơ Ih. Krao khan yua anăn Kră Yang Yêsu Krist, Amen.
Lu bơ̆n pơkă pơkăm arih thoi yơ wă tơ’bôh jơhngơ̆m bơnê kơ Kră Yang yua kơ đei klaih đơ̆ng tơdrong phak noh?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 15
Kênh Youtube BHKTHN:
