Klei Aê Diê Blŭ: Y-Mathiơ 20:17-19
Êlan kliăng: “Diñu srăng jao gơ̆ kơ phung tue čiăng kơ arăng tlao mưč, čăm gơ̆ hŏng klei hnuăt, leh anăn pơ̆ng gơ̆ ti kyâo bi kal; ƀiădah ti hruê tal tlâo Ñu srăng lŏ hdĭp.” (Y-Mathiơ 20:19)
Klei êmuh ksiêm mĭn: Êjai Yêsu đĭ nao kơ ƀuôn Yêrusalem, ya klei Khua Yang Yêsu lač leh hŏng phung khua ƀĭng kna? Ya ngă Ñu ñăk phung pluh dua čô ƀĭng kna hjăn čiăng lač? Ya klei hriăm drei mâo leh hriăm kơ klei Khua Yang Yêsu tŭ klei knap mñai?
Êjai Yêsu đĭ nao kơ ƀuôn Yêrusalem, Ñu ñăk phung pluh dua čô ƀĭng kna hjăn čiăng lač hŏng digơ̆ kơ klei knap mñai dôk guôn Ñu ti ƀuôn Yêrusalem. Khua Yang ñăk phung pluh dua čô ƀĭng kna hjăn čiăng lač hŏng digơ̆ kơ klei srăng truh kyua mâo phung ƀuôn sang dôk nao mbĭt hŏng Ñu ƀiădah wưng yuôm bhăn anei Khua Yang čiăng mtô hjăn phung khua ƀĭng kna.
Anei jing gưl tal tlâo Khua Yang lač hŏng phung ƀĭng kna kơ klei knap mñai Khua Yang tŭ (Y-Mathiơ 16:21; 17:22-23), leh anăn ăt jing klei blŭ klă nik hĭn. Klei kñăm Khua Yang lač hŏng phung khua ƀĭng kna truh tal tlâo kơ klei knap mñai leh anăn klei Ñu kbiă lŏ hdĭp jing čiăng kơ digơ̆ mprăp ai tiê amâo rŭng răng, huĭ hyưt, luč klei čang hmăng tơdah klei anei truh. Khua Yang ăt čiăng kơ phung ƀĭng kna thâo săng kơ klei kñăm Khua Yang hriê ti lăn ala leh anăn klei Ñu srăng tŭ čiăng bi tui anak mnuih. Khua Yang brei thâo Ñu srăng tuôm hŏng phung khua kiă kriê klei đăo, sa êpul hngah snăk kơ Ñu jing Yang Mêsi truh, diñu srăng ngă mnêč mă leh anăn bi mdjiê Khua Yang. Ñu ăt srăng tlă anăp hŏng knŭk kna Rôm, tŭ klei arăng mưč mač, ruă êka leh anăn arăng pơ̆ng ti kyâo ti kal, Ñu djiê ƀiădah truh hruê tal tlâo Ñu srăng kbiă lŏ hdĭp hŏng klei guh kơang (êlan 18-19).
Hruê anei, Phung Sang Aê Diê mñă kơ klei Khua Yang Yêsu tŭ klei knap mñai hlăm Klei Ƀơ̆ng Mnăm Sĭt Suôr. Êlan knap mñai Khua Yang jing boh phŭn kơ klei bi tui, tơdah amâo djŏ kyua klei knap mñai, klei Khua Yang Yêsu tŭ klei djiê, drei amâo dưi mâo klei pap brei kơ klei soh pô ôh, kyua “Sĭt nik tui si klei bhiăn păt čiăng jih jang mnơ̆ng arăng bi doh hŏng êrah, leh anăn tơdah amâo mâo ôh êrah tuh, amâo mâo klei pap brei kơ klei soh ôh” (Hêbrơ 9:22). Mơ̆ng Klei Ƀơ̆ng Mnăm Sĭt Suôr, drei ăt mâo klei mñă kơ klei hdĭp grăp hruê klă sĭt bi mơak kơ Khua Yang mơ̆? Khua ƀĭng kna Y-Pôl hia tơdah mtă kơ phung đăo ti Sang Aê Diê Philip “Kyuadah tui si kâo blŭ leh jêñ jêñ kơ diih, leh anăn lŏ blŭ ară anei hŏng klei hia, mâo lu phung hdĭp msĕ si phung roh hŏng kyâo bi kal Krist” (Philip 3:18). Phung ƀuôn sang Khua Yang brei hdơr snei, Khua Yang Yêsu djiê leh, leh anăn lŏ kbiă lŏ hdĭp leh čiăng kơ drei amâo lŏ huĭ ôh ƀiădah êđăp ênang ti anăp klei soh leh anăn tŭ klei phat kđi mơ̆ng klei soh, brei drei hdĭp hŏng sa klei hdĭp hdơr knga leh anăn bi guh kơang Anăn Ih. Leh anăn ăt brei hdơr, knhal tuč êlan knap mñai jing klei guh kơang mơ̆ng klei kbiă lŏ hdĭp yuôm bhăn. Snăn grăp blư̆ ƀơ̆ng kpŭng leh anăn mnăm êa hlăm Klei Ƀơ̆ng Mnăm Sĭt Suôr grăp čô drei brei ngă klei ƀuăn hiu hưn klei Khua Yang Yêsu djiê tơl truh hruê Ñu hriê.
Drei klă sĭt mgei ai tiê tơdah thâo Khua Yang tŭ klei knap mñai kyua pô mơ̆?
Wah lač: Ơ Khua Yang, kâo bi mni kơ Ih tuh leh êrah bi tui kâo. Akâo kơ Ih đru kâo jih ai tiê khăp kơ Ih, hdơr nanao kơ klei knap mñai Ih tŭ leh kyua kâo. Akâo kơ Ih đru kâo hdĭp bi guh kơang Anăn Ih leh anăn bi mơak kơ Ih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 20-21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
