Mathais 20:17-19
Nqe cim:
“Lawv yuav txiav txim coj nws mus tua povtseg, thiab muab nws rau lwm haivneeg, lawv yuav thuam nws thiab ua saib tsis taus nws, muab nws nplawm thiab muab nws ntsia rau saum ntoo khaublig; thiab peb hnub nws yuav sawv hauv qhov tuag rov qab los.” (Mathais 20:19)
Lus nug rau sawvdaws xav:
- Thaum Tswv Yexus nrog cov thwjtim mus nram Yeluxalees, Nws tau hais dabtsi rau lawv?
- Vim li cas Nws thiaj coj cov thwjtim mus rau ib qho thiab qhia twjywm rau lawv?
- Peb kawm tau dabtsi thaum paub txog Tswv Yexus txojkev txom nyem?
Thaum tabtom taug kev mus nram Yeluxalees, Tswv Yexus tau coj cov thwjtim mus rau ib cag thiab qhia twjywm rau lawv paub txog tej kev txomnyem uas tabtom tos Nws nram Yeluxalees. Nws ua li no vim muaj neeg coob coob nrog Nws taug kev mus, tiamsis lub sijhawm tseem ceeb no, Nws ho xav qhia tej yam tshwjxeeb rau cov thwjtim kom lawv paub.
Zaum no yog zaum peb uas Tswv Yexus qhia txog Nws kev txomnyem (Mathais 16:21; 17:22-23), thiab zaum no Nws qhia meej tshaj plaws. Lub hom phiaj uas tus Tswv qhia rau cov thwjtim 3 zaug txog Nws txojkev txomnyem thiab kev sawv hauv qhov tuag rov los yog kom cov thwjtim paub npaj siab, tsis txhawj ntshai, tsis poob siab thaum uas tej no tshwm sim tuaj. Tus Tswv kuj xav kom lawv to taub tiag tiag txog qhov uas Nws los rau hauv ntiajteb, thiab qhov uas Nws yuav tsum raug txomnyem kom cawm tau tibneeg. Tswv Yexus qhia tias Nws yuav raug cov thawjcoj uas ib txwm tsis kam lees tias Nws yog tus Mexiyas uas Vajtswv txib los, tuav tswvyim ntes thiab tua Nws povtseg. Tswv Yexus kuj yuav sawv ntawm nomtswv Loos xubntiag, raug thuam, raug ntaus, thiab raug ntsia saum tus ntoo khaublig. Nws yuav tuag, tiamsis hnub peb tomqab Nws yuav sawv hauv qhov tuag rov los ci ntsa iab (nqe 18-19).
Niaj hnub nimno, Pawg Ntseeg nco txog Tswv Yexus raug txomnyem dhau ntawm Yexus Rooj Mov Dawbhuv. Tswv Yexus txojkev txomnyem yog qhov tseem ntsiab ntawm txojkev cawmdim, yog tsis muaj Nws txojkev txomnyem thiab kev tuag, peb yuav tsis tau kev zam txim rau peb tej kev txhaum, vim “…raws li Vajtswv txoj Kevcai yuav luag txhua yam yuav tsum muaj nqaij ntuag ntshav nrog thiaj raws li kevcai. Yog nqaij tsis ntuag ntshav tsis nrog Vajtswv yeej zam tsis tau neeg lub txim” (Henplais 9:22). Dhau ntawm Yexus Rooj Mov, peb kuj tau qhuab ntuas txog kev ua neej txhua hnub puas tabtom ua rau tus Tswv zoo siab? Timthawj Paulus tau quaj thaum nws qhia cov ntseeg hauv Filipis hais tias, “Muaj ntau leej tsis ua lawv lub neej zoo, lawv thiaj saib tsis taus qhov uas Yexus Khetos tuag saum tus ntoo khaublig. Kuv twb qhia lawv zaj rau nej ntau zaus lawm. Nimno kuv rov qab qhia li no rau nej los kuv kua muag kawg li.” (Filipis 3:18). Vajtswv cov menyuam yuav tsum nco ntsoov hais tias, Tswv Yexus tau tuag thiab tau sawv hauv qhov tuag rov los kom peb tsis txhawj ntshai ntxiv tiamsis muaj kev qab siab tabmeeg kev txhaum thiab txoj kev txiav txim. Peb yuav tsum ua neej nyob nrog kev ua tus Tswv tsaug thiab ua kom Nws tau koob meej. Thiab peb yuav tsum nco ntsoov tias, qhov kawg ntawm txojkev txomnyem yog kev sawv hauv qhov tuag rov los ci ntsa iab. Yog li ntawd, txhua zaus uas peb noj lub ncuav thiab haus lub khob thaum koom Yexus Rooj Mov, peb txhua tus yuav tsum nco ntsoov ua raws li tej lus cogtseg qhia tus Tswv txoj kev tuag mus txog hnub Nws rov qab los.
Thov Vajtswv,
Tus Tswv, nyuam yaus ua Koj tsaug uas Koj tau muab Koj cov ntshav los cawm nyuam yaus dim. Thov pab nyuam yaus txawj hlub Koj, nco ntsoov tej kev txomnyem Koj raug vim nyuam yaus. Thov pab nyuam yaus ua neej nyob qhia tshwm Koj lub npe thiab ua rau Koj zoo siab. Nyuam yaus tuav Yexus Khetos lub npe thov, Amees.
Peb muaj kev xav licas thaum paub tias Tswv Yexus tau tiv kev txomnyem vim peb?
Nyeem Vajluskub hauv peb lub xyoos: Yaxayas 20-21
Kênh Youtube BHKTHN:
