Klei Aê Diê Blŭ: I Kôrantô 16:1-4.
Êlan kliăng: “Ti hruê tal sa grăp hruê kăm, brei grăp čô diih mkăm pioh mdê tui si ñu dưi ƀơ̆ng đĭ leh, čiăng kơ diih myơr amâo guôn ôh tơl kâo truh.” (I Kôrantô 16:2).
Klei êmuh ksiêm mĭn: Ya bruă jăk Khua ƀĭng kna Y‑Pôl lač hlăm trăn Klei Aê Diê Blŭ anei? Hlei phung mâo klei đru anei? Si ngă klei bhiăn Khua ƀĭng kna Y‑Pôl ktrâo lač hlăm bruă myơr prăk mah? Ya klei jăk drei ƀuh hlăm bruă myơr anei?
Leh klei iêô mthưr “mă bruă êbeh hĭn nanao kơ Khua Yang” (I Kôrantô 15:58), Khua ƀĭng kna Y‑Pôl lač mtam dŭm bruă klă klơ̆ng brei Sang Aê Diê Kôrantô ngă, anăn jing myơr prăk mah čiăng mơĭt kơ phung đaŏ ti Sang Aê Diê Yêrusalem (êlan 1). Wăt tơdah amâo lač klă ôh klei truh ti Sang Aê Diê Yêrusalem, ƀiădah drei thâo tinăn mâo phung đaŏ Khua ƀĭng kna Y‑Pôl lač jing phung doh jăk (êlan 1), amâodah jing phung ayŏng adei sa klei đaŏ hŏng phung ti Sang Aê Diê Kôrantô, digơ̆ ƀun ƀin dleh dlan, čiăng dŭm Sang Aê Diê mkăn đru brei. Bruă myơr brei dưi hluê ngă tui si klei bhiăn: Tal sa, tui hluê si klei dưi; tal dua, myơr hlăm sa hruê jing hruê tal sa hlăm hruê kăm, jing hruê Kjuh; tal tlâo, pioh hjăn ênoh mprăp leh čiăng myơr.
Mâo dŭm klei jăk siam hlăm klei bi hriăm đru dŏng mơ̆ng Khua ƀĭng kna Y‑Pôl. Êlâo hĭn, Sang Aê Diê Yêrusalem dưi dlăng jing Sang Aê Diê phŭn, Sang Aê Diê Kôrantô mkŏ mjing êdei ƀiădah ăt đru hlăm bruă đru dŏng. Bruă anei bi luč klei mĭn lač dah dŭm anôk mkŏ mjing êdei knŏng čang hmăng klei kriê dlăng leh anăn đru mơ̆ng dŭm anôk mâo êlâo, boh nik mơ̆ng Sang Aê Diê phŭn. Tal dua, klei bi đru mơ̆ng phung nah êngao pioh kơ phung đaŏ Yuđa brei ƀuh hlăm Khua Yang Yêsu Krist, kyâo bi kal bi rai jih dŭm mtih kgăn plah wah mnuih wăt tơdah hlei djuê ana jing, gưl mnuih, amâodah klei thâo… (Êphêsô 2:13-14). Tal tlâo, bruă myơr tui hluê si klei mâo leh anăn tui si ai tiê amâo kčah dŭm mâo ôh. Tal pă, mâo klei mprăp êlâo. Leh anăn tal êma, bruă mă leh anăn mơĭt prăk myơr klă mngač (êlan 3-4).
Lu blư̆ drei bi luč hĕ knuih jăk siam mơ̆ng klei myơr kyua knŏng dôk čang guôn klei đru brei, knŏng čiăng tŭ mă ƀiădah amâo mĭn ôh kơ bruă myơr. Amâodah knŏng myơr kơ Sang Aê Diê pô đuč amâo mđing ôh ai tiê kơ klei čiăng ti anôk mkăn hlăk dôk bŏ hŏng klei kbah, dleh dlan. Amâodah myơr msĕ si klei bhiăn, myơr djăp sa kdrêč hlăm pluh dlăng djăp leh, ka tuôm bi mĭn ôh kơ klei myơr êbeh sa kdrêč hlăm pluh. Amâodah myơr tui si klei khăp amâo mâo klei mprăp êlâo ôh. Amâodah kƀah klei klă mngač kơ ngăn prăk. Akâo kơ Khua Yang đru drei ba yua dŭm klei jăk hlăm klei myơr hluê si klei Khua ƀĭng kna Y‑Pôl mtô hlăm klei drei myơr čiăng bi mơak kơ Khua Yang leh anăn ba klei bi mđĭ ai hdơ̆ng drei.
Drei bi êdah mơ̆ klei jăk siam hlăm klei myơr?
Wah lač: Ơ Khua Yang Aê Diê! Kâo bi mni lač jăk kơ Ih kyua ƀuh klei khăp plah wah ayŏng adei sa klei đaŏ dưi bi êdah mơ̆ng mnơ̆ng bi kah mbha, bi đru hlăm klei hdĭp. Akâo kơ Khua Yang đru kâo bi êdah klei jăk siam hlăm klei myơr tui si klei bi hmô Khua ƀĭng kna Y‑Pôl mtô.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 15:32 – 17:6
Kênh Youtube BHKTHN:
