1 Kauleethaus 16:1-4
1 Nimno kuv yuav hais txog tej nyiaj uas nej sau xa mus pab cov Yudais uas ntseeg Vajtswv nram lub nroog Yeluxalees. Nej yuav tsum ua ib yam li tej uas kuv qhia kom cov ntseeg uas nyob hauv lub xeev Kalatias ua. 2 Txhua Hnubkaj nej yuav tsum muab tej nyiaj uas nej khwv tau los mentsis khaws cia. Tus uas tau ntau muab ntau, tus uas tau tsawg muab tsawg, yog nej ua li ntawd thaum kuv tuaj txog tsis tas yuav sau ntxiv lawm. 3 Thaum kuv tuaj txog, kuv yuav txib cov neeg uas nej twb xaiv tau lawm, xa ntawv thiab xa cov nyiaj ntawd mus rau nram lub nroog Yeluxalees. 4 Yog kuv xav hais tias tsimnyog kuv mus thiab kuv yuav coj lawv mus.
Nqi cim:
“Txhua Hnubkaj nej yuav tsum muab tej nyiaj uas nej khwv tau los mentsis khaws cia. Tus uas tau ntau muab ntau, tus uas tau tsawg muab tsawg, yog nej ua li ntawd thaum kuv tuaj txog tsis tas yuav sau ntxiv lawm” (1 Kauleethaus 16:2).
Lus nug rau sawvdaws xav:
- Tes haujlwm zoo uas Timthawj Paulus hais txog hauv ntu Vajluskub no yog dabtsi?
- Cov neeg txais qhov kev pab no yog leejtwg?
- Tus lw uas Timthawj Paulus qhia kom tso nyiaj sib pab zoo li cas? – Peb pom qhov zoo twg nyob hauv kev fij nyiaj rau Vajtswv?
Tom qab lo lus nqua hu “Nej yuav tsum rau siab ntso ua tus Tswv tes haujlwm” (1Kauleethaus 15:58), Timthawj Paulus qhia cov haujlwm uas Pawg ntseeg Kauleethaus cheemtsum ua, qhov ntawd yog muab tej nyiaj txiag coj mus pab rau cov ntseeg Yexus nyob nram lub nroog Yeluxalees (nqi 1). Txawm yog tsis hais meej txog yam kev txomnyem uas Pawg ntseeg hauv Yeluxalees raug, tiamsis peb paub hais tias nyob hauv muaj cov ntseeg Vajtswv (nqi 1), lossis hais dua lwm lo lus yog cov kwvtij koom ntseeg tib tug Tswv zoo li cov ntseeg nyob hauv nroog Kauleethaus thiab, lawv tabtom raug kev txomnyem, cheemtsum lwm lub Pawg ntseeg txojkev pab. Tes haujlwm pab no yuav tsum ua raws li cov lw: Tim ib, muab raws li lub peevxwm muab tau; tim ob, teem ib hnub muab uas yog hnubkaj lossis hnub thiv; tim peb, muab mentsis los khaws cia ua ntej.
Muaj qee qhov qauv zoo nyob hauv Timthawj Paulus cov lus qhia yuav tsum pab lwm tus yog li no. Thawj qhov, Pawg ntseeg hauv nroog Yeluxalees suav hais tias yog Pawg ntseeg niam, Pawg ntseeg Kauleethaus txhim tsa tom qab no tiamsis kuj tau nqua hu koom tes pab. Qhov no tshem tawm txojkev xav hais tias cov Pawg ntseeg txhim tsa tom qab no nyob tos lub Pawg ntseeg txhim tsa ua ntej txojkev saib xyias thiab pab, tshwjxeeb yog Pawg ntseeg niam. Qhov ob, cov ntseeg uas yog lwm haivneeg pab cov ntseeg uas yog neeg Yudais qhia paub hais tias hauv Yexus Khetos, nws tus ntoo khaublig twb rhuav tshem tus ntsa lajkab thaiv txhua haivneeg, tsis hais cov neeg txomnyem thiab tau zoo lossis tus ntse thiab tus ruam… (Efexus
2:13-14). Qhov peb, Kev pab yog nyob ntawm lub peevxwm thiab lub siab muab tau. Qhov plaub, muaj kev npaj khaws cia ua ntej. Qhov tsib, txais thiab xa cov nyiaj mus pab yuav tsum muaj timkhawv meej tseeb (nqi 3-4
Ntau zaus peb ua tsis tau qhov ntawm kev fij nyiaj pab lwm tus, vim peb tsuas tos, tsuas txais tej uas luag pab xwb tsis xav txog kev fij nyiaj pab lwm tus li. Lossis tsuas fij nyiaj rau hauv Pawg ntseeg xwb tsis xam pom lwm qhov uas muaj kev txomnyem li. Lossis fij nyiaj zoo ib yam li tiam Mauxes txoj kevcai, muab txaus ib feem kaum ces tas li ntawd, tsis xam pom qhov uas muab tshaj ib feem kaum. Lossis muab raws li siab xav xwb tsis npaj khaws cia ua ntej. Lossis ua tsis ncaj txog tej nyiaj txiag uas cov ntseeg fij pab lwm tus. Thov Vajtswv pab kom peb muaj tus qauv zoo hauv txojkev fij khoom nyiaj txiag raws li Timthawj Paulus qhia, kom peb txojkev fij nyiaj txiag haum Vajtswv siab thiab txhawb tau lwm tus lub zog.
Peb puas tau qhia tawm qhov zoo ntawm kev fij khoom nyiaj txiag lawm?
Thov Vajtswv:
Vajtswv! Nyuam yaus ua koj tsaug thaum pom cov ntseeg koj muaj kev sib hlub dhau los ntawm txojkev sib pab. Thov koj pab kom nyuam yaus qhia tshwm qhov zoo ntawm kev fij khoom nyiaj txiag raws li tus qauv uas Timthawj Paulus qhia rau cov ntseeg. Ameeg.
Email: kawmvajluskubtxhuahnub@gmail.com
Kênh Youtube BHKTHN:
