Klei Aê Diê Blŭ: Y-Philêmôn êlan 1-3
Êlan kliăng: “Jăk mơak yơh phung đru brei klei êđăp ênang hdơ̆ng mnuih, kyuadah Aê Diê srăng pia diñu phung anak Aê Diê.” (Y-Mathiơ 5:9)
Klei êmuh ksiêm mĭn: Khua ƀĭng kna Y-Pôl čih hră kơ Y-Philêmôn hlăm ya boh klei? Hlăm bruă klam jing pô đru brei klei êđăp ênang hdơ̆ng mnuih, si ñu bi êdah ai tiê mđing uêñ kơ Y-Philêmôn? Si klei brei drei ngă hlăm bruă đru brei klei êđăp ênang hdơ̆ng mnuih?
Khua ƀĭng kna Y-Pôl čih hră Y-Philêmôn hlăm brô thŭn 60 êdei kơ klei Kkiêng kơ Khua Yang, hlăk êjai ñu dôk tŭ klei arăng ngă jhat kyua Klei Mrâo Mrang Jăk mơ̆ng Khua Yang Yêsu Krist ti Rôm. Amâo msĕ si hră mkăn ôh, Khua ƀĭng kna Y-Pôl amâo hưn mthâo ôh bruă ngă khua ƀĭng kna akŏ hră čih ƀiădah luă gŭ lač pô jing mnă. Ñu amâo yua ôh klei dưi khua ƀĭng kna čiăng mtrŭn asăp ƀiădah čih kơ Y-Philêmôn hŏng ai tiê êdu êun, jĕ giăm mơ̆ng sa čô găp akâo kơ găp pô tŭ jum mnuih hlŭn mơ̆ng ñu. Kyua anăn akŏ hră ñu čih pô jing “Kâo gơ̆ Y-Pôl, sa čô mnă Krist Yêsu …” (êlan 1a). Hlăm mnă, ñu mâo klei găl đru Y-Ônêsim jing sa čô hlŭn tlĕ đuĕ, đăo kơ Khua Yang. Ară anei, ñu čih hră kơ Y-Philêmôn, jing khua hlŭn Y-Ônêsim, akâo kơ ñu pap brei leh anăn jum pô hlŭn anei. Klei anăn brei ƀuh wăt hlăm mnă, ăt kăn dưi bi kgăn mơh Khua ƀĭng kna Y-Pôl ngă bruă đru brei klei êđăp ênang plah wah Y-Ônêsim hŏng Khua Yang, mbĭt anăn ăt jih ai tiê đru kơ Y-Philêmôn leh anăn hlŭn Y-Ônêsim êđăp ênang hdơ̆ng diñu.
Khua ƀĭng kna Y-Pôl dôk jing sa čô mnă, ăt jing khua gĭt gai hlăm klei đăo, ñu bi êdah klei mđing uêñ kơ Y-Philêmôn leh anăn phung găp djuê gơ̆ (êlan 2a). Mơ̆ng klei wah lač, ƀrư̆ brei ƀuh ai tiê leh anăn klei mđing uêñ mơ̆ng Khua ƀĭng kna Y-Pôl hlăm klei čang hmăng jing pô đru ba klei êđăp ênang, “Brei diih mâo klei pap leh anăn klei êđăp ênang mơ̆ng Aê Diê Ama drei leh anăn mơ̆ng Khua Yang drei Yêsu Krist” (êlan 3). Ñu wah lač kơ Y-Philêmôn leh anăn phung găp djuê dưi mâo klei êđăp ênang hlăm klei pap bi mtlaih mơ̆ng Aê Diê leh anăn mơ̆ng Khua Yang Yêsu Krist. Anei jing klei jăk mơak leh mâo klei êđăp ênang hŏng Aê Diê.
Khua Yang Yêsu mtô leh: “Jăk mơak yơh phung đru brei klei êđăp ênang hdơ̆ng mnuih, kyuadah Aê Diê srăng pia diñu phung anak Aê Diê” (Y-Mathiơ 5:9). Kyua anăn, jing anak Aê Diê, drei mâo bruă klam jih ai tiê, jih ai ktang đru ayŏng adei pô bi grăng hŏng Aê Diê leh anăn hdơ̆ng pô. Ngă kơ mnuih bi grăng jing sa bruă brei mâo klei săn asei, duh myơr hlăm ai tiê luă gŭ, thâo gĭr. Kyua lu blư̆ hŏng bruă klam bi grăng, drei srăng tŭ klei arăng ƀuah ăl, blŭ jhat, mčeh luar, klei luč liê prăk mah,… Biădah anei jing sa bruă čiăng êdi đru Phung Sang Aê Diê sa ai leh anăn mđĭ kyar boh lu leh anăn boh êlam. Leh anăn anei jing sa hlăm dŭm kleijăk mơak mâo Khua Yang Yêsu mtô hlăm Klei Mtô ti dlông čư̆. Akâo kơ Aê Diê đru grăp čô drei amâo jing mnuih bi kah phung, ngă luč klei êđăp ênang ôh ƀiădah jing pô ba klei êđăp ênang kơ jih jang mnuih.
Drei srăng găn jih ya klei gun kpăk čiăng ngă bruă đru brei klei êđăp ênang?
Wah lač: Ơ Khua Yang khăp hơiêng. Kâo bi mni lač jăk kơ Ih kyua kâo dưi jing anak Ih, dưi mâo klei êđăp ênang hŏng Khua Yang leh anăn hŏng mnuih. Akâo kơ Ama khăp hơiêng thiăm klei ktang čiăng kơ kâo hdĭp êđăp ênang leh anăn dưi đru ayŏng adei kâo mâo klei êđăp ênang hŏng Khua Yang leh anăn hdơ̆ng pô. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
