Klei Aê Diê Blŭ: Galati 6:2-3
Êlan kliăng: “Đru bi gui klei ktrŏ hdơ̆ng diih, snăn bi sĭt klei bhiăn Krist.” (Galati 6:2)
Klei êmuh ksiêm mĭn: Ya bruă klam lŏ čuê kơ mnuih “mâo Yang Mngăt Jăk”? Ya ngă brei bi leh bruă klam anei? Ya ngă lu mnuih amâo dưi đru bi gui klei ktrŏ hdơ̆ng pô ôh?
Klei hdĭp phung đăo kơ Krist jing sa êlan nao hrăm mbĭt grăp čô hlăm sa găp djuê prŏng mrâo, jing Phung Sang Aê Diê, mâo klei bi mguôp leh anăn bi đru hdơ̆ng pô (Rôm 15:1; I Kôrantô 12:26). Hlăm Galati 6:1-5, tơdah leh mnuih “mâo Yang Mngăt Jăk” đru pô lĕ hlăm klei soh, lŏ bi mrâo klei bi mguôp hŏng Khua Yang leh anăn hŏng Phung Sang Aê Diê, snăn ăt lŏ “Đru bi gui klei ktrŏ hdơ̆ng diih” nanao. Boh blŭ “gui” mblang jing klam klei ktrŏ hŏng klei gĭr ktĭr, leh anăn boh blŭ anei čiăng lač kơ klei dôk găn ară anei hin, brei ƀuh klei anei jing bruă brei ngă nanao. Boh blŭ “klei ktrŏ” čiăng lač kơ sa mta mnơ̆ng ktrŏ êdimi, leh anăn dleh gui klam, tinei čiăng lač kơ djăp mta klei dleh dlan sa čô mnuih dôk tlă anăp. Grăp čô mâo sơăi klei ktrŏ pô dê, snăn ya ngă brei kâo lŏ gui thiăm klei ktrŏ pô mkăn lĕ? Kyuadah klei anăn jing “Klei bhiăn Krist”, klei bhiăn klei khăp (Y-Yôhan 13:34-35).
Ƀiădah lĕ, kna ti pruê̆ čih anei, snăn klei ktrŏ tinei wăt jing klei mplư ngă kơ pô lĕ hlăm klei soh lŏ wĭt kơ klei soh mrâo bi mtlaih leh. Klei mplư ktư̆ ktrŏ kjham leh anăn adôk nanao jing sa hlăm lu klei ktrŏ kjham hĭn kơ sa čô đăo kơ Krist brei gui. Dưi tlaih leh mơ̆ng sa mta klei soh, mblang jing amâo djŏ ôh amâo lŏ lĕ hlăm klei mplư anăn, amâodah amâo lĕ hlăm klei soh mkăn. Phung đăo kơ Krist mâo klei hdĭp myang mâo klei khăp sĭt kơ ayŏng adei, leh anăn sĭt êmĭt čiăng lŏ bi mrâo pô anăn hlăm klei êbat kyua Yang Mngăt Jăk, ăt srăng pioh mmông kơ pô anăn leh anăn adôk kăp đru mtă mtăn, bi mđĭ ai digơ̆ nanao. Klei anăn yơh jing “Đru bi gui klei ktrŏ hdơ̆ng diih”.
Ya ngă drei khăp leh, êdu êun đru leh ayŏng amai adei lĕ hlăm klei soh kmhal kơ klei soh (êlan 1), ƀiădah ăt lŏ mđing uêñ dlăng ba čiăng tơl digơ̆ kjăp hlăm klei hdĭp myang (êlan 2)? Klei ngă anăn kyuadah drei amâo knŏng bi leh bruă klam, ƀiădah wăt jing knhuah hdĭp thâo bi khăp hlăm klei hdĭp mơ̆ng Yang Mngăt Jăk msĕ mơh. Leh anăn bi mni lač jăk kơ Khua Yang kyuadah tơdah drei jing dŏ Khua Yang leh anăn Phung Sang Aê Diê, tơdah drei gưt asăp Klei Aê Diê Blŭ čiăng dôk hdĭp bi khăp, đru bi gui klei ktrŏ hdơ̆ng pô, snăn sĭt nik srăng mâo lu ayŏng amai adei mkăn đru gui brei klei ktrŏ kơ drei msĕ mơh.
Lu mnuih amâo dưi ôh “Đru bi gui klei ktrŏ hdơ̆ng diih” kyuadah diñu mgao đei, leh anăn “mĭn ñu jing pô prŏng” (êlan 3) kyuanăn amâo dưi bi ti gŭ ñu pô čiăng gui klei ktrŏ ôh. Boh sĭt, tĭng kơ klei hdĭp myang, jih jang drei “jing mnuih hơăi mang” sơăi, drei mâo klei bi mtlaih kyua klei pap prŏng, leh anăn lŏ êbat tui hlue Khua Yang ăt kyua klei pap mơh. Tơdah drei amâo djăl pral mđing uêñ kơ klei Yang Mngăt Jăk mtô lač, ƀuah mkra, snăn êlưih snăk drei “mplư ñu pô yơh” leh anăn dôk hdĭp sa klei hdĭp amâo ngă “bi sĭt klei bhiăn Krist” ôh.
Si bruă drei ngă đru leh leh anăn dôk đru bi gui brei klei ktrŏ kơ hdơ̆ng drei?
Wah lač: Ơ Khua Yang, brei kâo grăp hruê thâo kral Khua Yang hĭn, thâo kral sĭt klei pap Khua Yang pioh brei kơ kâo, čiăng kơ hŏng klei anăn, kâo dưi hdĭp sa klei hdĭp thâo khăp kơ phung ayŏng amai adei kâo, đru bi gui brei klei ktrŏ kơ hdơ̆ng hmei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mika 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
