Yakơ 4:4-6
“Iĕm pơm thoi noh, thoi lĕ kơ bơngai drŏ-kăn kơđang kơ̆l ako klo sư, na jing ‘mêm kơ bơngai mă ayăt kơ klo sư dơ̆ng. Iĕm ưh tam băt ôh hă, dah iĕm ‘mêm kơ tơdrong ala teh iĕm dang ayăt kơ ‘Bok Kei-Dei? Thoi noh bơngai bu oei ‘mêm kơ tơdrong ala teh, bơngai noh ayăt kơ ‘Bok Kei-Dei boih.” (Yakơ 4:4)
Nơ̆r jet tơchĕng pơwao:
– ‘Mêm kơ tơdrong ala teh wă khan kiơ?
– Kră Yang thoi yơ hăm lu bơngai ‘mêm kơ tơdrong ala teh?
– Lu bơ̆n athei arih thoi yơ wă kơ jô̆ bơ̆n oei dơ̆ng gah Kră Yang?
Nơ̆r “tơ ala teh ” lăm Sơ̆p Hla bơar ‘Bok Kei-Dei yua lơ tơdrong phara băl, mălei pơma lơ ‘biơ̆ noh (1) Plĕnh teh, kơtuăl teh; (2) khul bơngai, kon bơngai; (3) đei tơproh, chăl arih ahrei, tơplơ̆ hăm tơdrong ‘Bok Kei-Dei wă. Lăm chăl trong nơ̆r ‘Bok Kei-Dei ‘nâu. ‘Bok Yakơ yua nơ̆r “tơ ala teh” kiơ̆ kơ tơdrong mă 3 wă pơma chrih kơ lu bơngai jô̆ sư bơngai lui mălei oei ‘mêm kơ tơdrong tơ ala teh âu mă ưh kơ băt ‘mêm kơ Kră Yang.
‘Bok Yakơ krao lu bơngai mă ‘mêm kơ tơdrong ala teh “bơngai drŏkăn kơ đang kơ̆l ako klo sư” (trong 4). Nơ̆r ‘nâu anat dêh wă pơm tơ’bôh rup ưh kơ ‘lơ̆ng gah lu bơngai “oei pơm yoch gah bơhngol” wă khan ưh kơ tơnăp hăm Kră Yang, Sơ̆p Hla bơar ‘Bok Kei-Dei ngăl yua rup wă pơtih gia klo kăn wă roi tơ’bôh tơdrong tơ’bưh Kră Yang hăm kon pơlei Sư. Khul bơngai lui, lu bơngai lui kơ Yêsu, jô̆ khan “akăn” păng Kră Yang Sư thoi “klo” tơdrong tơ’bưh Kră Yang hăm lu bơngai lui kơ Sư ‘noh tơdrong tơ’bưh ‘mêm mơnat dih băl, juăt băl dêh păng chu yom dih băl, kơlih kơ thoi noh dah bơngai bu jô̆ kơ sư bơngai lui mălei arih kiơ̆ kơ sĕch akar, lei bơngai noh pơm ayăt kơ tơdrong ‘mêm Kră Yang. Trong 5, ‘bok Yakơ roi tơbăt lu bơngai thoi noh “dang ayăt kơ ‘Bok Kei-Dei”, păng Yang Bơhngol ‘Lơ̆ng pơgơ̆r lăm jơhngơ̆m bơngai lui, ưh kơ lăp đon ôh, bơngai oei ‘mêm kơ tơdrong ala teh, Kră Yang gar noh tơdrong gar ‘lơ̆ng rơgoh, hơpơi kon pơlei Kră Yang băt chu yom dih băl, păng ‘mêm kơ Kră Yang.
Lu bơngai lui mă oei arih tơ ala teh âu, mălei ưh kơ pơm kiơ̆ tơdrong ala teh ôh. Kră Yang krao bơ̆n wă tơguăt hăm Sư, dơ̆ng hơdai Sư, wă kơ jing ‘boh păng hơdah tơ ala teh âu, lăm trong 6. ‘bok Yakơ ăn kơ lu bơ̆n đei hơmĕng păng pơlung bơ̆n Kră Yang ăn đĕch kơ bơ̆n tơdrong ‘mêm Sư tih tơpă dah bơ̆n băt iŏk đon ala. Bơngai iŏk đon ala băt chu yom kơ Kră Yang tơplih kơ Sư đei jơhngơ̆m pơang, ‘maih chă trong kiơ̆ kơ jơhngơ̆m kơdih wă. Arih iŏk đon ala gô ba bơ̆n năm truh tơ tơdrong băt kơdih bơ̆n bơngai yoch, đơ̆ng noh tơ’bôh jơhngơ̆m tơbral păng apinh tơdrong ‘mêm Kră Yang mơnat.
Apinh Kră Yang ăn kơ rim ‘nu lu bơ̆n iŏk đon ala na năm tơ Kră Yang, đĭ jơhngơ̆m gơnang kơ Sư, pơnam pơhrăm nơ̆r Kră Yang tơnăp lăm tơdrong krao khan chơ chă kiơ̆ kơ Kră Yang wă na đơ̆ng noh lu bơ̆n sơng iŏk tơdrong ‘mêm ‘bĕnh blai đơ̆ng Kră Yang kơplah bơ̆n oei arih tơ ala teh âu, đei jơ năr chông ba bơngai tam mă lui wă kơ lu sư lui kơ ‘Bok Kei-Dei.
Ơ Kră Yang, apinh Ih tơgŭm inh băt kơnăl inh kơdih bơngai yoch păng arih iŏk đon ala năm tơkan tơ Ih, chang gô tơdrong ‘mêm đơ̆ng Ih. Apinh Ih tơgŭm inh băt oei jê̆ Ih ling lang pơhrăm pơtơ̆p pơjuăt gah bơhngol wă kơ arih lăm chăl âu, pơchrang hơdah tơdrong ‘lơ̆ng Ih, tơgŭm lơ bơngai tơ ala teh âu băt chă dêh char ‘lơ̆ng Ih. Krao khan yua anăn Kră Yang Yêsu Krist, Amen.
Chăl arih lu bơ̆n tơbăt kơ lu bơ̆n oei pơm buăl hăm bu? Na bơ̆n tơ’bôh gah tơdrong bơ̆n dơ̆ng gah Kră Yang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 25
Kênh Youtube BHKTHN:
