Klei Aê Diê Blŭ: I Y-Pêtrôs 2:6-8
Êlan kliăng: “Nĕ anei, Kâo dưm ti ƀuôn Siôn sa klŏ boh tâo jing boh tâo kiêng, Kâo ruah leh leh anăn yap yuôm, leh anăn hlei pô đăo kơ ñu Aê Diê amâo srăng bi luč klei čang hmăng ñu ôh” (I Y-Pêtrôs 2:6)
“Nĕ anei, Kâo dưm ti Siôn sa boh tâo kiêng Kâo ruah leh, leh anăn yuôm, leh anăn hlei pô đăo kơ Ñu anăn amâo srăng hêñ ôh” (I Y-Pêtrôs 2:6) (1973 version)
Klei êmuh ksiêm mĭn: Ya ngă đăo kơ Khua Yang amâo srăng hêñ ôh? Phung amâo đăo kơ Khua Yang ôh ya diñu mĭn leh anăn si knuih diñu hŏng Khua Yang? Boh jhat kơ klei anăn ya jing? Si drei srăng hdĭp čiăng bi êdah klei mơak drei mâo kyua đăo leh kơ Yêsu Krist?
“Boh tâo kiêng Aê Diê ruah leh leh anăn yap yuôm” Khua ƀĭng kna Y-Pêtrôs lač tinei jing kơ Yang Yêsu Krist yơh, Pô arăng bi msĕ jing msĕ si sa klŏ boh tâo yuôm bhăn srăng bi kjăp jih sa boh sang, anăn jing sa klŏ boh tâo kiêng yuôm bhăn, amâo mâo mnơ̆ng mkăn dưi bi hrô ôh. Pô “đăo kơ ñu”, čiăng lač kơ pô mdơ̆ng atur klei đăo kơ klei hdĭp ñu ti dlông Khua Yang Yêsu pô, jing Pô sĭt suôr, kyuanăn amâo srăng hêñ ôh. Boh blŭ “hêñ” lŏ mblang jing luč klei čang hmăng kyua đăo amâo djŏ pô. Đăo kơ Yêsu Krist amâo srăng luč klei čang hmăng ôh kyuadah Ñu yơh jing Pô Bi Tui lăn ala (Rôm 10:11-13). Ai tiê drei mâo klei hơĭt sĭt tơdah đăo kơ Yang Yêsu kyuadah “čiăng kơ hlei pô đăo kơ Ñu dưi mâo klei hdĭp hlŏng lar” (Y-Yôhan 3:15). Kyuanăn, brei drei blŭ hŏng klei jhŏng msĕ si Khua ƀĭng kna Y-Pôl snei, “Sĭt nik kâo amâo hêñ ôh kơ klei mrâo mrang jăk, kyuadah ñu jing klei myang Aê Diê pioh bi mtlaih grăp čô hlei pô đăo, …” (Rôm 1:16). Êngao kơnăn, kyuadah ti gŭ adiê amâo mâo ôh anăn mkăn êngao kơ anăn Yêsu Krist arăng brei leh kơ mnuih čiăng kơ hŏng Ñu yơh drei dưi mâo klei bi mtlaih (Bruă Phung Khua Ƀĭng Kna 4:12).
Ƀiădah bi kơ phung amâo đăo ôh kơ Yêsu Krist, diñu yap Gơ̆ jing boh tâo kiêng phung mdơ̆ng sang hngah leh, amâo yuôm ôh, jing knŏng “sa klŏ boh tâo bi têč hnêč phung mnuih, leh anăn boh tâo prŏng bi lĕ buh diñu” (êlan 7). Klei anăn čiăng lač, phung amâo đăo ôh kơ Yêsu Krist ngă leh sa klei soh prŏng snăk hlăm klei hdĭp diñu. Diñu hngah leh, amâo tŭ ôh kơ Pô dưi bi mtlaih diñu, Pô brei kơ diñu klei hdĭp jăk mơak, kyuanăn yơh diñu srăng lĕ hlăm kngan Aê Diê čiăng tŭ klei phat kđi, kyuadah “hlei pô amâo gưt kơ Anak amâo srăng ƀuh ôh klei hdĭp, ƀiădah klei Aê Diê ngêñ dôk leh ti ñu” (Y-Yôhan 3:36). Klei anăn srăng truh sĭt nik “kyuadah diñu amâo gưt ôh kơ klei blŭ, tui si Aê Diê čuăn leh kơ diñu ngă” (êlan 8).
Phung đăo kơ Krist jing phung hưn klei đăo diñu mdơ̆ng leh ti dlông atur Yêsu Krist. Kyuanăn, brei drei bi êdah kơ jih jang mnuih ƀuh drei mơak êdimima kyuadah drei đăo leh kơ Khua Yang Yêsu leh anăn jum Ñu jing Khua kiă kriê kơ klei hdĭp drei. Msĕ mơh, brei drei bi êdah mơh kơ klei drei “gưt kơ klei blŭ” jing Klei Blŭ Aê Diê, bi êdah hŏng klei huĭ mpŭ leh anăn bi mơak kơ Khua Yang, amâo mâo huĭ amâodah hêñ ôh ti anăp jih jang mnuih. Kyuadah “Rơ̆k krô, mnga dliu, ƀiădah klei Aê Diê drei blŭ srăng dôk nanao hlŏng lar” (Y-Êsai 40:8).
Drei bi êdah klei drei amâo hêñ ôh, ƀiădah si drei bi êdah klei drei mơak kyua Anăn Khua Yang?
Wah lač: Ơ Khua Yang, kâo lač jăk kơ Ih lu êdimima, kyuadah Klei Ih Blŭ bi hriăm kâo amâo hêñ amâodah huĭ ôh tơdah đăo leh anăn hưn Anăn Yêsu kơ phung riêng gah. Đru kâo đăo kjăp kơ klei Ih jing sĭt suôr, čiăng kơ kâo mơak nanao kyuadah jing anak Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
