I Petus 2:6-8
Nqe cim:
“Kuv xaiv ib lub pobzeb ua lub uas tseemceeb, kuv coj lub pobzeb ntawd mus teeb ua lub thawj rua hauv lub nroog Xi-oos; thiab yog leejtwg ntseeg nws yuav tsis poob ntsejmuaj ib zaug li.” (I Petus 2:6)
Lus nug rau sawvdaws xav:
– Vim li cas ntseeg tus Tswv tsis txajmuag?
– Cov neeg tsis ntseeg tus Tswv muaj txojkev xav thiab tus cwjpwm zoo li cas txog tus Tswv? Nqi zog yog dabtsi?
– Peb ua neej zoo li cas kom qhia tshwm lub neej tsis txajmuag vim yog ntseeg Tswv Yexus?
“lub pobzeb ua lub uas tseemceeb” uas Timthawj Petus hais no yog Tswv Yexus tau muab piv zoo li lub pobzeb tseemceeb uas yuav ua rau lub tsev ruaj, yog lub pobzeb muaj nqis, tsis muaj dabtsi yuav hloov tau. Tus neeg uas “ntseeg lub pobzeb ntawd”, ces yog nws txhim tsa kev ntseeg rau Tswv Yexus, tus uas ua txhua yam li Nws hais ntag, yog li tsis txajmuag ntseeg. Lo lus “txajmuag” muaj lub ntsiab hais tias tas kev cia siab vim ntseeg yuam kev. Ntseeg Tswv Yexus yuav tsis poob siab ib zaug li, vim Nws yog tus Cawmseej los cawm neeg ntiajteb (Loos 10:11-13). Peb muaj kev ruaj siab thaum los ntseeg Tswv Yexus “txhua tus uas ntseeg nws yuav tau txojsia ntev dhawv mus ibtxhis” (Yauhas 3:15). Yog li ntawd, peb cia li hais khov kho zoo li Timthawj Paulus hais: “Kuv yeej tsis txajmuag qhia txojmoo zoo li; txojmoo zoo yog Vajtswv lub hwjchim uas cawm tau txhua tus uas ntseeg dim…” (Loos 1:16). Dua li ntawd, nyob hauv lub ntiajteb no tsis muaj ib lub npe twg uas peb ntseeg thiab lees tau kev cawm dim zoo li ntseeg Tswv Yexus (Tes Haujlwm 4:12).
Tiamsis cov neeg uas tsis ntseeg Tswv Yexus, lawv saib Nws tsuas zoo ib yam li lub pobzeb uas raug tso tseg, tsis muaj nqis dabtsi, tsuas yog “neeg yuav dawm lub pobzeb ntawd thiab lub pobzeb ntawd yuav ua rau lawv ntog” (nqe 8). Qhov no muaj lub ntsiab tias cov neeg uas tsis kam ntseeg tus Cawmseej twb ua ib qho kev txhaum loj heev nyob hauv lawv lub neej. Lawv tig nraub qaum, tsis lees yuav tus uas muaj hwjchim cawm dim, tus uas pub kev ua neej kom muaj nqis, yog li lawv thiaj poob rau Vajtswv txhais tes txiav txim, vim “tus uas tsis mloog Leej Tub tej lus yuav tsis tau txojsia; Vajtswv yuav rau txim rau tus ntawd” (Yauhas 3:36). Qhov no yog qhov uas yuav tsum tshwm muaj, “yog lawv tsis ntseeg Vajtswv Txojlus, raws li Vajtswv twb pom zoo muab rau lawv lawm” (nqe 8).
Cov ntseeg yog cov uas twb qhia tawm kev ntseeg ntawm yus rau Tswv Yexus Khetos lawm. Yog li ntawd, peb yuav tsum qhia tshwm rau txhua tus neeg pom tias peb txaus siab rau qhov uas peb ntseeg Tswv Yexus thiab caw Nws los ua tus thawj hauv peb lub neej. Peb kuj yuav tsum qhia tshwm lub neej “ntseeg Vajtswv Txojlus”, qhia tawm los ntawm kev ua neej ntseeg ruaj, haum Vajtswv siab, tsis ntshai qhov raug txajmuag tabmeeg sawvdaws. Rau qhov “Tej nroj yeej txawj qhuav thiab tej paj yeej txawj zeeg; tiamsis peb tus Vajtswv txojlus nyob mus ibtxhis li” (Yaxayas 40:8).
Thov Vajtswv,
Vajtswv, nyuam yaus ua Koj tsaug vim Koj Txojlus qhia kom nyuam yaus tsis txhob txajmuag thaum ntseeg thiab qhia tus Tswv Yexus lub npe rau cov neeg uas nyob ib ncig. Thov Koj pab kom nyuam yaus ntseeg tias Koj yeej ua li Koj hais, nyuam yaus thiaj qhia tau tias yog Vajtswv menyuam. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb qhia tshwm lub neej tsis txajmuag, tiamsis muaj feem khav hauv tus Tswv lub npe zoo li cas?
Nyeem Vajluskub hauv peb xyoo: Yelemis 32
Kênh Youtube BHKTHN:
