Klei Aê Diê Blŭ: Rôm 12:2
Êlan kliăng: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih, čiăng kơ diih dưi thâo ya jing klei Aê Diê čiăng jăk, mơak, leh anăn klă.” (Rôm 12:2)
Klei êmuh ksiêm mĭn: Si mblang “Ênuk anei” jing? Ya ngă khua ƀĭng kna Y‑Pôl mtă mtăn “đăm jing msĕ si phung ênuk anei”? Si ngă čiăng dưi bi mlih mrâo klei mĭn? Si brei drei duh kơ knhuah hdĭp phung đăo čiăng dưi jing msĕ si Khua Yang Yêsu hĭn grăp hruê?
Boh blŭ “ênuk anei” (amâodah “lăn ala”) hlăm Klei Aê Diê Blŭ mâo lu klei mblang mdê mdê: Tal sa, jing êngĭt adiê mtŭ mlan boh lăn mnơ̆ng dhơ̆ng (Klei Mmuñ Hđăp 90:2); tal dua, jing phung mnuih (Y‑Yôhan 3:16); tal tlâo, jing yang klei mmăt yang jhat djă kŏ, bi kdơ̆ng hŏng Aê Diê (II Kôrantô 4:3‑4). “Ênuk anei” hlăm Rôm 12:2 djŏ hŏng klei mblang tal tlâo. Anei jing mta phŭn Y‑Yakơ hưn êlâo kơ phung ƀuôn sang Aê Diê brei răng:“ngă mah jiăng hŏng lăn ala jing roh hŏng Aê Diê” (Y‑Yakơ 4:4).
“Đăm jing msĕ si phung ênuk anei,” tĭng kơ klei blŭ êdu ai mtă mtăn kơ drei đăm tui ngă hlue ôh, čiăng lač amâo msĕ sa jar, ư ai mbĭt hŏng lăn ala, kyuadah klei anăn srăng atăt truh kơ “klei tluh” msĕ si hră čih I Y‑Yôhan 2:16 khua ƀĭng kna Y‑Yôhan lač leh, “klei kđeh tluh, klei ală tluh, klei mgao hlăm klei hdĭp”. Anei jing klei tluh kơ lăn ala, kơ ênuk anei brei phung đăo khut khat amâo tui ngă hlue ôh. Tĭng kơ klei blŭ mơak, brei drei “bi mlih”, anei jing klei bi mlih mơ̆ng hlăm lam leh anăn bi êdah truh ti êngao. Boh blŭ “bi mlih” tinei ăt jing boh blŭ pioh yua kơ klei asei mlei Khua Yang Yêsu mâo klei bi mlih ti dlông čŏng čư̆ (Y‑Mathiơ 17:2). Klei bi mlih kčưm dơ̆ng mơ̆ng ai tiê klei mĭn: klei bi mĭn, knhuah bi mĭn. Klei lŏ kkiêng mrâo jing boh klei truh mtam knŏng sa blư̆ hlăk mmông drei mă tŭ Khua Yang Yêsu jing Pô Bi Mtlaih, ƀiădah klei bi mlih klei mĭn jing klei truh nanao dơ̆ng mơ̆ng mmông drei đăo kơ Khua Yang hlŏng truh kơ hruê drei djiê. Kyuanăn, drei amâo mdei ôh duh kơ knhuah hdĭp phung đăo čiăng kơ grăp hruê jing msĕ si Khua Yang Yêsu hĭn.
Mâo tlâo mta klei kơ klei bi mlih mrâo klei mĭn: Yang Mngăt Jăk, Klei Aê Diê Blŭ leh anăn asei drei pô. Yang Mngăt Jăk jing Pô mtrang mngač leh anăn brei klei myang bi mlih (II Kôrantô 3:17‑18); Klei Aê Diê Blŭ, Klei Blŭ sĭt nik mơ̆ng Aê Diê jing pui kđen pŏk mblang klei mĭn (Klei Mmuñ Hđăp 119:105); kdrêč bruă drei brei răk dlăng, ksiêm mĭn leh anăn gưt ngă hlue Klei Aê Diê Blŭ (Y‑Yôsuê 1:8). Knhal tuč, klei bi mlih knŏng truh tơdah drei đup gưt, ngă tui si Klei Aê Diê Blŭ mtô, čiăng lač klei bi mĭn brei mjing bruă ngă (Y‑Yakơ 2:26). Hŏng klei gưt ngă hlue yơh đru drei thâo săng klă ya klei jing jăk siam, klă ênŭm, bi mơak kơ Aê Diê.
Lăn ala đoh ktŭng phung ƀuôn sang Aê Diê hdĭp tui si ênuk anei nanao. Brei drei djă păn kjăp Klei Aê Diê Blŭ, čuăn amâo hdĭp tui msĕ si lăn ala ôh, amâo tui hlue phung lu ôh… ƀiădah dôk hdĭp tui si Klei Aê Diê Blŭ mtô čiăng kơ mngăt ai tiê mlih mrâo bi mơak kơ Aê Diê. Tơdah drei mđing uêñ duh kơ knhuah hdĭp phung đăo, Yang Mngăt Jăk srăng brei klei pap, mtô lač atăt gai čiăng kơ boh Yang Mngăt Jăk srăng bi êdah mơ̆ng knhuah hdĭp drei.
Si ngă drei mâo mơ̆ ya mta kdrêč ăt dôk ngă tui hlue ênuk anei?
Wah lač: Ơ Khua Yang, akâo Ih đru kâo amâo ngă tui hlue ênuk anei ôh, ƀiădah êpa mhao duh kơ knhuah hdĭp phung đăo hŏng êa ksâo myang klei đăo čiăng kơ kâo đĭ hriê kơ prŏng hlăm mngăt ai tiê leh anăn mguôp kdrêč lu hĭn kơ bruă Sang Aê Diê.
Dlăng Klei Aê Diê Blŭ hlăm tlâo thŭn: Y‑Đaniel 5:17‑6:18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
