Klei Aê Diê Blŭ: II Y-Timôthê 1:6-12
Êlan kliăng: “Snăn đăm hêñ ôh hưn klei Khua Yang drei, kăn hêñ rei kơ kâo pô jing mnă kyua ñu, ƀiădah tŭ bĕ kdrêč klei knap mñai kyua klei mrâo mrang jăk hlăm klei myang Aê Diê” (II Y-Timôthê 1:8)
Klei êmuh ksiêm mĭn: Khua ƀĭng kna Y-Pôl mtă kơ Khua pô mtô hlăk ai Y-Timôthê, ya klei dưi ngă leh anăn ya klei amâo dưi ngă ôh? Ya jing atur ñu bi êdah kơ klei mtă anăn ? Ya klei khăng ngă kơ drei mâo klei hêñ tơdah hưn klei Khua Yang kơ pô mkăn?
Ti tluôn klei kkuh čhưn bi êdah klei sĭt suôr mdê hŏng anak ñu hlăm klei đăo, Khua ƀĭng kna Y-Pôl dơ̆ng kơ klei mtă mtam jing klei kñăm phŭn kơ kdrêč 1 hŏng dua boh blŭ “brei/bĕ” leh anăn dua boh blŭ “đăm/kăn”: “brei lŏ bi mrâo klei Aê Diê brei kơ ih” leh anăn “tŭ bĕ kdrêč klei knap mñai kyua klei mrâo mrang jăk hlăm klei myang Aê Diê”; “đăm hêñ ôh hưn klei Khua Yang drei” leh anăn “kăn hêñ rei kơ kâo pô jing mnă kyua Ñu” (êlan 6-8).
Mơ̆ng klei mtă anei, wăt hŏng hră I Y-Timôthê êlâo tinăn, drei dưi ƀuh wăt tơdah jing leh sa čô khua pô mtô, Khua pô mtô hlăk ai Y-Timôthê ăt dôk mâo klei hêñ mơh tơdah hưn klei Khua Yang leh anăn tŭ klei knap mñai. Klei anăn năng ai kyua klei blao kyuadah ñu dôk hlăk ai amâodah kyua ama ñu hlăm mngăt dôk hlăm war mnă. Phung ka đăo ôh srăng lač Aê Diê mâo klei myang ya ngă amâo bi mtlaih ôh dĭng buăl sĭt suôr Ñu mơ̆ng war mnă…Drei amâo thâo ôh, ƀiădah klei drei thâo sĭt jing klei hêñ, klei blao, klei huĭ tơdah hưn klei Khua Yang amâo kbiă hriê mơ̆ng Aê Diê ôh. Mngăt Yang Mngăt Jăk brei kơ drei jing mngăt ktang, thâo khăp leh anăn dôk djŏ hnơ̆ng (êlan 7). Leh anăn atur kơ mngăt ktang anăn jing jih jang klei Khua Yang NGĂ LEH kơ drei. Khua Yang bi mtlaih leh anăn iêô leh drei tui si klei pap Ñu, amâo djŏ kyua bruă drei ngă ôh (êlan 9); leh anăn kyua klei thâo kral sĭt nik hlei Khua Yang jing (êlan 12). Klei knang kơ Khua Yang pô leh anăn kơ bruă Khua Yang ngă leh, amâo djŏ knang kơ ñu pô amâodah knang kơ phung đăo mkăn ôh, măng ai hlei digơ̆ jing, đru Khua ƀĭng kna Y-Pôl “amâo hêñ ôh”, wăt tơdah ñu pô dôk hlăm war mnă, tŭ klei knap mñai dưn (êlan 12).
Hruê anei lu mnuih mâo klei hêñ hưn Anăn Khua Yang kyuadah diñu pô dôk hlăm klei dleh dlan, amâodah kyua phung đăo mkăn dôk tŭ klei knap mñăi kyua klei arăng ngă jhat. Drei amâo hưn ôh klei mrâo mrang jăk djŏ kơ Khua Yang Yêsu leh anăn bruă Ñu ngă leh kơ drei, ƀiădah drei hưn kơ drei pô, kơ bruă klei đăo drei kyuanăn lu blư̆ drei mâo klei hêñ kyua amâo hmao ôh pô mkăn. Čiăng jing jhŏng hưn kơ Khua Yang, hdơr bĕ, drei jing knŏng phung hưn bi sĭt lŏ yăl dliê wĭt ya klei Khua Yang ngă leh kơ klei hdĭp drei. Măng ai hlei drei jing, si pô drei hưn jing dưn, Khua Yang ăt khăp leh anăn bi mtlaih jih jang hlei pô đăo kơ Ñu. Dlăng bĕ kơ Khua Yang leh anăn bruă Ñu ngă leh čiăng drei amâo mâo klei hêñ ôh hưn Anăn Ñu.
Sang hră drei hriăm, anôk drei mă bruă, anôk drei dôk hdĭp thâo mơ̆ kơ drei jing phung đăo Klei Mrâo Mrang Jăk? Ya ngă?
Wah lač: Ơ Ama Pô Doh Jăk, tơdah dlăng kơ kâo pô leh anăn kơ mnuih mkăn, mâo blư̆ kâo bi mni, mâo blư̆ kâo hêñ, ƀiădah tơdah kâo dlăng kơ Ih leh anăn bruă Ih ngă leh, đru kâo jhŏng hưn Anăn Ih nanao. Mơ̆ng hruê anei, đru kâo jhŏng hưn Anăn Ih kơ lu mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y- Sakari 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
