II Timautes 1:6-12
Nqe cim zaj kawm:
“Koj tsis txhob txajmuag ua timkhawv txog peb tus Tswv zaj thiab tsis txhob txajmuag rau qhov uas kuv raug kaw rau hauv tsev lojcuj. Kuv raug kaw li no twb yog vim kuv ua Yexus Khetos tes haujlwm. Koj yuav tsum ua siab ntev qhia Txojmoo Zoo, txawm yog koj raug kev txomnyem npaum li cas los Vajtswv yeej yuav txhawb koj lub zog kom koj ua tau.” (II Timautes 1:8)
Lus nug xav:
– Timthawj Paulus ntuas Timautes uas yog ib tug xibhwb hluas kom ua dabtsi thiab tsis txhob ua dabtsi?
– Nws tsa hais tawm tej yam dabtsi los txhawb tej lus ntuas ntawd?
– Vim li cas peb pheej txajmuag lossis tsis kam ua timkhawv txog tus Tswv rau lwm tus?
Tomqab uas Timthawj Paulus hais lus nug moo qhia txog txojkev sib raug zoo tshwjxeeb nrog nws tus tub sab ntsujplig, nws pib ntuas Timautes txog lub ntsiab tseemceeb ntawm tshooj 1 no los ntawm ob lo lus “yuav tsum” thiab ob lo lus “tsis txhob”. Nws hais tias: “koj yuav tsum siv lub tswvyim uas Vajtswv pub rau koj thaum kuv tsa tes rau koj thiab xa koj mus ua haujlwm” thiab “Koj yuav tsum ua siab ntev qhia Txojmoo Zoo, txawm yog koj raug kev txomnyem npaum li cas los Vajtswv yeej yuav txhawb koj lub zog kom koj ua tau”; “Koj tsis txhob txajmuag ua timkhawv txog peb tus Tswv zaj” thiab “tsis txhob txajmuag rau qhov uas kuv raug kaw rau hauv tsev lojcuj.” (nqe 6-8).
Dhau ntawm tej lus no thiab phau I Timautes, peb pom hais tias txawm Timautes twb rhais ruam mus ua Vajtswv tes haujlwm lawm los, nws tseem ntsib kev txajmuag thaum ua timkhawv txog tus Tswv thiab thaum raug kev txomnyem. Tej zaum yog vim nws lub siab txaj muag, vim nws tseem hluas, lossis vim nws txiv sab ntsujplig raug kaw hauv tsev lojcuj. Cov neeg uas tseem tsis tau ntseeg kuj yuav xav tias: Yog tus Tswv muaj hwjchim tiag, ua cas Nws tus tubtxib uas ua siab ncaj ho tseem raug kaw?… Peb tsis paub tias yog vim licas tiag. Tiamsis peb paub tseeb hais tias lub siab txajmuag, ntshai thiab tsis kam ua timkhawv tsis yog los ntawm Vajtswv los. Lub siab uas Vaj Ntsujplig pub rau peb yog “lub siab muaj hwjchim thiab kev hlub thiab kev tswj yus tus kheej rau peb” (nqe 7 HMOWSV). Thiab lub hauvpaus uas ua rau peb muaj lub siab tawv ntawd yog yam uas Vajtswv TWB UA rau peb lawm. Nws twb cawm peb dim thiab hu peb raws li Nws txoj koob hmoov hlub, tsis yog raws li peb tej haujlwm (nqe 9). Thiab peb paub tseeb hais tias tus uas peb ntseeg yog leejtwg (nqe 12). Qhov uas vamkhom tus Tswv thiab yam Nws twb ua lawm, tsis vamkhom tus kheej lossis lwm tus ntseeg, txawm lawv yog leejtwg los xij, pab Timthawj Paulus “tsis txajmuag”, txawm nws tabtom raug kaw thiab raug kev txomnyem los xij (nqe 12).
Niaj hnub nimno, muaj coob tus txajmuag, tsis kam qhia txog tus Tswv vim lawv tus kheej tabtom ntsib kev nyuaj siab, lossis vim pom lwm cov ntseeg raug tsimtxom thiab raug kev txomnyem. Muaj ntau zaus peb tham txog peb tus kheej lossis peb txojkev ntseeg xwb, tsis yog tham txog Tswv Yexus thiab yam uas Nws tau ua rau peb. Vim li ntawd peb thiaj txajmuag thaum pom peb tus kheej ua tsis tau zoo li lwm tus. Yuav kom peb muaj lub siab tawv qhawv ua timkhawv txog tus Tswv, peb yuav tsum nco ntsoov tias peb tsuas yog cov timkhawv uas qhia yam Vajtswv twb ua rau peb lub neej xwb. Txawm peb yog leejtwg, lossis tus uas peb tabtom qhia Txojmoo Zoo rau yog neeg zoo li cas los xij, tus Tswv yeej tseem hlub thiab cawm txhua tus uas ntseeg Nws. Cia peb tig ntsia ntsoov tus Tswv thiab yam Nws tau ua, kom peb tsis txhob txajmuag ua timkhawv txog Nws.
Thov Vajtswv,
Leej Txiv uas Dawbhuv, thaum nyuam yaus ntsia mus rau tus kheej lossis lwm tus, qee zaus nyuam yaus txaus siab, qee zaus txajmuag. Tiamsis thaum nyuam yaus tig ntsia Koj thiab yam Koj twb ua lawm, pab nyuam yaus sawv ruaj khov ua timkhawv txog Koj. Txij no mus, thov Koj pub nyuam yaus muaj lub siab tawv qhawv tshaj tawm Koj lub npe rau ntau leej. Nyuam yaus tuav Tswv Yexus Khetos lub npe thov, Amees.
Peb lub tsev kawm ntawv, peb qhov chaw ua haujlwm lossis peb lub zej lub zos puas paub tias peb yog cov ntseeg Tswv Yexus? Vim li cas?
Nyeem Vajluskub hauv peb lub xyoos: Xakhaliyas 14
Kênh Youtube BHKTHN:
