Klei Aê Diê Blŭ: I Kôrantô 7:1-11
Êlan kliăng: “Đăm bi hngah hdơ̆ng diih pô ôh, knŏng tơdah diih bi tŭ ư êjai đa đa hruê čiăng pioh mmông wah lač. Ƀiădah leh ruê̆ klei anăn, brei diih lŏ dôk mbĭt, huĭdah Satan mplư diih hŏng klei diih amâo dưi ư̆ ôh” (I Kôrantô 7:5)
Klei êmuh ksiêm mĭn: Ya klei phung đăo ti Kôrantô êmuh leh Khua ƀĭng kna Y-Pôl? Si klei Khua ƀĭng kna wĭt lač leh klă kơ klei êmuh anăn? Si drei yua klei anei hlăm klei bi dôk ung mô̆ pô?
Mdê hŏng klei mĭn ngă knhông hlue si klei čiăng hlăm phung Kôrantô (msĕ si kdrêč knhal tuč kdrêč 6), sa êpul phung đăo mkăn hlăm Phung Sang Aê Diê Kôrantô mâo klei êmuh mklăk wĭt hŏng Khua ƀĭng kna Y-Pôl snei: Klei knhông jing jhat, snăn djŏ mơ̆ phung đăo brei ư̆ ăn klei čiăng bi dôk êkei mniê kluôm dhuôm hŏng klei dôk hjăn păn amâodah mdei bi dôk ung mô̆ tơdah mâo leh gŏ sang?
Khua ƀĭng kna Y-Pôl wĭt lač leh klei êmuh anei snei, hlue si ñu, dôk hjăn jing jăk, ƀiădah amâo brei kơ grăp čô mnuih ôh (êlan 7). Hŏng mnuih mâo leh ung mô̆ snăn ung mô̆ amâo dưi bi lui ôh (êlan 10-11), ƀiădah klă klơ̆ng hĭn jing “ung dôk hŏng mô̆ ñu tui si klei bhiăn jing ung, leh anăn brei mô̆ msĕ mơh dôk hŏng ung ñu tui si klei bhiăn jing mô̆” (êlan 3). Boh hră “klei bhiăn” jing ung, mô̆ hlăm klei mblang klă hlăm êlan 4 leh anăn êlan 5 brei ƀuh sa klei čiăng lač hgăm ƀiădah djŏ klă, jing klei bi dôk plah wah dua ung mô̆. Hlue si Khua ƀĭng kna Y-Pôl, sa kdrêč kơ klei bi dôk ung mô̆ jing kyua klei kñăm “čiăng đăm mâo klei knhông” (êlan 2). Klei bi dôk êkei mniê jing kyua Aê Diê hrih mjing kơ anak mnuih hlăm klei jing ung mô̆ mơ̆ng hlăk êlâo kơ anak mnuih lĕ hlăm klei soh. Klei bi dôk êkei mniê hlăm boh klei jing ung mô̆ jing jăk siam leh anăn yuôm bhăn. Aê Diê brei bi trông kơ klei bi dôk êkei mniê hlăm Klei Aê Diê Blŭ, snăn drei ăt kăn dưi dlăng kơ klei bi dôk êkei mniê hlăm ung mô̆ jing jhat ôh, jing klei brei ư̆ ăn leh anăn hngah ôh. Kyua anăn, ung mô̆ “đăm bi hngah hdơ̆ng pô ôh”, êngao kơ tơdah bi tŭ ư êjai đa đa hruê čiăng pioh mmông wah lač (êlan 5a). Klei ñĕ, hngah kơ klei bi dôk ung hŏng mô̆ srăng mjing klei găl kơ yang jhat mplư tơdah ung amâodah mô̆ amâo dưi ư̆ ăn (êlan 5b). Khădah snăn, bruă “đăm hngah” anei ăt brei dưi thâo săng hlăm klei mtô bi djăp ênŭm hlăm kluôm Klei Aê Diê Blŭ jing ung mô̆ brei bi khăp, bi gưt hdơ̆ng pô (Êphêsô 5:21-33).
Msĕ hŏng klei mĭn mơ̆ng sa êpul phung đăo hlăm Phung Sang Aê Diê Kôrantô, năng ai đa đa phung đăo hruê anei ăt dlăng klei bi dôk êkei mniê plah wah ung mô̆ jing klei jhat, jing klei knư̆ ư̆ ăn knư̆ jăk. Klei Aê Diê Blŭ mtô klă klei knhông jing brei klei mĭn bŏ dlai rup klei knhông, klei bi dôk êkei mniê êlâo kơ jing ung mô̆, bi dôk êkei mniê êngao kơ ung mô̆, klei bi dôk hdơ̆ng êkei, mniê… Anei jing klei Aê Diê bi êmut snăk. Khădah snăn, hlăm boh klei djŏ klă jing klei ung mô̆ hlue si klei bhiăn, klei bi dôk êkei mniê jing klei amâo dưi hngah ôh ƀiădah brei mơak dưn hŏng bruă klam leh anăn klei khăp. Anăn jing sa hlăm dŭm klei ba klei jăk mơak kơ klei hdĭp ung mô̆.
Mâo mơ̆ ya klei soh hlăm klei mĭn kơ klei bi dôk êkei mniê hlăm drei brei mkra mlih?
Wah lač: Ơ Khua Yang, kâo bi mni lač jăk kơ Ih kơ klei klă sĭt hlăm klei hdĭp bi dôk ung mô̆. Akâo kơ Ih đru kâo thâo săng djŏ kơ klei bi dôk ung mô̆ čiăng kơ kâo mpŭ klei Aê Diê dlăng jing jăk, leh anăn ya klei Aê Diê bi êmut čiăng ñĕ kbưi.. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
