I Kôrintô 7:1-11
“Ưh kơ gơh sơ-ih băl ôh, mă-lei dah klo akăn biĕm pôm đon wă krao khan kơ Kră Yang tơdrong kiơ kiơ na biĕm wă pơdơh kơ tơdrong tơngôi noh, kư̆m bưh mơ̆n. Mă-lei tôch kơ năr biĕm pơkă krao khan noh boih, na biĕm tơngôi băl thoi đêl dơ̆ng, hli kơnh yang Satan pơhlŭ biĕm ngôi pơyô kư̆ kă yua kơ iĕm ưh kơ kĕ gơ̆t.” (I Kôrintô 7:5)
Nơ̆r jet tơchĕng pơwao:
– Lu bơngai lui tơ Kôrintô jet ‘bok Pôl tơdrong kiơ?
– ‘Bok Pôl tơl nơ̆r lu sư jet noh tôm tơdrong thoi yơ?
– Lu bơ̆n yua iŏk nơ̆r bơtho âu thoi yơ lăm ŭnh om lu bơ̆n?
Tơplơ̆ hăm tơdrong tơchĕng hlôh băt rơngei hloh hnang gah ‘maih wă sĕch akar đei lơ bơngai tơ pơlei Kôrintô (thoi tuch luch lăm chăl 6), minh khul bơngai nai tơ lăm Khul Lui nai tơ lăm Kôrintô đei nơ̆r jet tơplơ̆ hăm ‘bok Pôl khan: Tơngôi băl ‘noh kơnê̆, thoi noh na bơngai lui hăm gơh kĕ ĕnh kơ tơngôi băl ling lang athei oei minh ‘nu minh drô̆ dah pơdơh kơ hơdai klo kăn tơdah đei hnam dơnŏ bơih?
‘Bok Pôl đei tơl nơ̆r jet âu khan, kiơ̆ kơ sư, oei minh ‘nu minh drô̆ ‘noh ‘lơ̆ng, mălei ưh kơ đĭ rim ‘nu (trong 7). Hăm lu bơngai mă đei hnam dơnŏ klo kăn ưh kơ gơh achăng băl ôh (trong 10-11), mă hơđăl hloh noh “klo trŏ kơ ngôi kơ akăn sư kơdih, na akăn sư kư̆m chu kiơ̆ kơ đon klo sư wă” (trong 3). Nơ̆r “athei chu kiơ̆” đơ̆ng tơdrong tơblang rơđah lăm trong 4 păng trong 5 wă tơ’bôh kơ bơ̆n hlôh lăm to mălei ‘noh jơ̆ tơpă, ‘noh jơ̆ tơdrong hơdai bre klo kăn. Kiơ̆ kơ ‘bok Pôl, minh tơdrong lăm ŭnh om yua kơ kơnhăm wă huay kơ pơm pơyô kư̆ kă (trong 2). Klo kăn minh sĕch akar ‘noh đơ̆ng Kră Yang ‘Bok Kei-Dei pơjing ăn kơ kon bơngai jing klo kăn adrol kơ kon bơngai pơm yoch. Tơdrong minh sĕch akar blŭng a sơ̆ ‘noh ‘lơ̆ng dêh păng gĭt găl dêh. Kră Yang ‘Bok Kei-Dei ăn tơdrong pơjing klo kăn kiơ̆ kơ lăm Sơ̆p hla bơar ‘Bok Kei-Dei, lei lu bơ̆n ưh kơ gơh lăng tơdrong jing minh sĕch akar lăm ŭnh om ‘noh kơnê̆, athei kĕ pơgơ̆t păng weh wer. Đơ̆ng noh, klo kăn “’Nĕ kơ sơ ih băl” ‘nguaih kơ lăm tơdrong minh sĕch akar bre klo kăn ‘noh tơdrong pơm ăn trong kơ yang satan pơhlŭ pơlung kơplah klo kăn ưh kơ kĕ gơ̆t (trong 5b). Mă khan thoi ei ră, “‘nĕ kơ sơngah” âu kư̆m kăl kơ hlôh tơdrong bơtho lăm Sơ̆p Hla bơar ‘Bok Kei-Dei ‘noh klo kăn athei ‘mêm mơnat dih băl, chu yom dih băl (Êphêsô 5:21-33).
Nhen thoi tơdrong tơchĕng ưh kơ trŏ lăm minh Khul bơngai lui lăm hnam akŭm Kôrintô, kư̆m đei minh ‘bar ‘nu bơngai lui dang ei kư̆m lăng tơdrong minh sĕch akar bre klo kăn noh khan kơnê̆, ‘noh tơdrong rai kĕ gơ̆t rai ‘lơ̆ng. Sơ̆p Hla bơar ‘Bok Kei-Dei đei bơtho hơđăl nhen pơm pơyô kư̆ kă noh kơ̆l ‘ngok ‘bĕnh blai păng oei ‘blŏk nhen thoi rup jing sĕch akar, pơm kư̆ kă adrol kơ jing klo kăn, plah klo kăn đe, pơm kư̆ kă tơduă drŏnglo drŏkăn.v.v… ‘nâu jơ̆ tơdrong krưp dêh lăm măt Kră Yang lăng. Mă khan thoi ei, đơ̆ng blŭng a sơ̆ trŏ ‘lơ̆ng ‘noh ŭnh om chu yom pơm kiơ̆ trŏ ‘blep, jing minh sĕch akar ‘noh minh tơdrong ưh kơ gơh weh wer mă ‘noh hiôk chơt hăm tơdrong athei chu băl păng ‘mêm mơnat, ‘noh jơ̆ minh lăm lu tơdrong kăl ba ăn hiôk chơt chăl arih bre klo kăn.
Ơ Kră Yang, inh bơnê kơ Ih lăm tơdrong bơtho sĭt tơpă lăm chăl arih klo kăn. Apinh Ih tơgŭm inh hlôh trŏ gah tơdrong minh sĕch akar wă kơ inh chu yom tơdrong ŭnh om đơ̆ng Kră Yang ‘noh jơ̆ ‘lơ̆ng, păng khan tơdrong Kră Yang lăng kơnê̆ krưp ‘noh kơnê̆ wă kơ weh wer. Krao khan yua anăn Kră Yang Yêsu Krist, Amen.
Hăm đei pơm glăi ayơ lăm tơdrong tơchĕng gah minh sĕch akar lăm lu bơ̆n kăl kơ hơmet ming?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 4
Kênh Youtube BHKTHN:
