II Xwmtxheej Vajntxwv 18:27-34
Nqe cim:
“Yog li ntawd, thaum lawv pom Vajntxwv Yehausafas, lawv thiaj xav hais tias nws yog cov Yixalayees tus vajntxwv, ces lawv thiaj mus caum nws tua. Tiamsis Yehausafas qw, thiab tus Tswv uas yog Vajtswv thiaj cawm nws thiab cov uas caum nws tua txawm tso nws tseg.” (II Xwmtxheej Vajntxwv 18:31).
Lus nug rau sawvdaws xav:
- Tus cevlus Mikayas hais dabtsi rau Vajntxwv Ahaj?
- Cov lus ntawd muaj tiav li cas?
- Vamkhom qhovtwg Vajntxwv Yehausafas tsis raug tua?
- Peb pheej ua dabtsi rau lub sijhawm yus raug kev sim siab txomnyem hauv lub neej?
Tus cevlus Mikayas hais rau Vajntxwv Ahaj hais tias nws yuav tsis rov los kaj siab lug, rau qhov Vajtswv yuav ua yam uas Nws twb hais lawm. Thaum paub hais tias nws yog tus uas Mikayas cevlus yuav tuag, Vajntxwv Ahaj txawm hnav cev ris tsho tubrog ua kom Mikayas cov lus hais tsis tiav. Nws hais rau Vajntxwv Yehausafas tias koj hnav koj cev ris tsho mus hauv tshavrog los tau. Kev ntaus rog lub sijhawm ntawd mas nrhiav tua kom tau yeebncuab tus vaj, yog li cov Xilias tus vajntxwv thiaj hais kom cov thawj tubrog uas tsav tsheb nees tua cov Yixalayees tus Vajntxwv Ahaj nkaus xwb. Thaum pom Vajntxwv Yehausafas hnav ris tsho vajntxwv, yeebncuab txawm tua; rau qhov lawv xav hais tias yog cov Yixalayees tus vajntxwv, Vajntxwv Yehausafas qw nrov nrov, ces tus Tswv cawm thiab ua rau cov yeebncuab khiav tas. Txawm yog Vajntxwv Ahaj hnav cev ris tsho thaiv hniav ntaj li tubrog los Vajtswv ua rau cov tubrog Xilias ib tug lam rub hneevnti tua mus, ua ciav xibxub “cia li ya mus raug kiag Vajntxwv Ahaj lub tsho hlau kis nruab nrab tshab plaws rau hauv nws lub cev” ua rau vajntxwv raug sab heev thiab tuag thaum hnub poob qho.
Peb pom txhua yam hauv kob rog no puavleej nyob tagnrho hauv tus Tswv lub hwjchim kav, Nws ua rau yeebncuab khiav deb Vajntxwv Yehausafas thiab ua rau xibxub ya mus raug Vajntxwv Ahaj lub tsho kis nruab nrab. Vajntxwv Yehausafas qw thov thiab tau tus Tswv cawm thaum nws nyob hauv qhov chaw txomyem uas ua raws li tus neeg phem tej lus hais thiab Vajtswv tus cevlus tej lus ntuas. Txawm yog Vajntxwv Ahaj raug mob tau ib hnub nkaus thiab pom kev ntaus rog ntxhov hnyo los nws siv zog nyiaj los ntawm nws lub peevxwm xwb. Nws sawv mus ntawm lub tsheb nees nrog cov Xilias sib tua, nws tsis thov tus Tswv pab li.
Thaum raug kev sim siab txomnyem, peb pheej muaj tus cwjpwm zoo li ob tug vajntxwv no. Xws li Vajntxwv Ahaj, thaum pom tau hais tias tsis muaj kev cia siab lossis twb txav deb tus Tswv heev ces tsis xav vamkhom Nws lawm. Xws li Vajntxwv Yehausafas, paub hais tias yus ua tsis tau, yus yog neeg txhaum tig los vamkhom tus Tswv thaum nyob rau lub tsamthawj txomnyem kawg nkaus los tseem ntseeg hais tias tus Tswv nyob ntawm nws ib sab mloog thiab pab nws. Txawm yog Vajntxwv Yehausafas ua txhaum los nws tseem muaj kev ntseeg thiab thov kev pab. Tus Tswv nyob rawv ntawm ib sab mloog thiab teb peb tej lus thov Nws.
Thov Vajtswv,
Tus Tswv uas muaj kev hlub, Koj yog tus uas ua siab ntev thiab muaj hwjchim. Nyuam yaus los cuag Koj thiab vamkhom Koj thaum ntsib kev txomnyem nyuaj siab. Thov Koj cia nyuam yaus lub neej nyob hauv Koj lub hwjchim. Amees.
Puas muaj ib qhov kev txomnyem loj twg ua rau peb tas kev cia siab tsis xav thov Vajtswv pab?
Nyeem Vajluskub hauv peb lub xyoo: Amaus 6:1-7:9
Kênh Youtube BHKTHN:
