Klei Aê Diê Blŭ: II Klei Yăl Dliê 18:27‑34
Êlan kliăng: “Tơdah phung khua kahan gai êdeh aseh ƀuh Y‑Jôsaphat, diñu lač, “Anei yơh mtao Israel.” Snăn diñu weh bi blah hŏng gơ̆; leh anăn Y‑Jôsaphat ur, leh anăn Yêhôwa đru gơ̆. Aê Diê brei phung roh đuĕ mơ̆ng gơ̆” (II Klei Yăl Dliê 18:31)
Klei êmuh ksiêm mĭn: Si klei Khua pô hưn êlâo Y‑Mika lač kơ Mtao Ahap? Si klei hưn êlâo anăn truh? Mơ̆ng ya klei Mtao Jôsaphat tlaih djiê? Ya klei drei khăng ngă tơdah dôk hlăm klei lông dlăng hlăm klei hdĭp anei?
Khua pô hưn êlâo Y‑Mika bi mklă Mtao Ahap amâo dưi wĭt êđăp ênang ôh kyua Aê Diê srăng ngă klei Ñu lač leh. Hlăk thâo pô jing mnuih hlăm klei hưn êlâo djiê brŭ anei, Mtao Ahap ngă mgưt sa čô kahan čiăng kơ klei hưn êlâo anăn amâo truh sĭt. Ñu lač kơ Mtao Jôsaphat hơô yơh ao mtao leh anăn nao bi blah. Klei bi blah ênuk anăn khăng duah mdjiê mtao tĭng dah dih, kyua anăn Mtao Syria mtrŭn asăp kơ phung khua gĭt gai êdeh aseh knŏng ksŭng ngă kơ hjăn Mtao Ahap mơ̆ng Israel. Leh ƀuh Mtao Jôsaphat hơô ao mtao, phung roh ksŭng ngă kyua mĭndah mtao Israel, Mtao Jôsaphat ur ktang, Yêhôwa Aê Diê bi mtlaih leh anăn ngă kơ phung roh đuĕ kbưi mơ̆ng ñu. Mtao Ahap wăt tơdah hơô ao msei mgang leh anăn ngă mgưt kahan ƀiădah Aê Diê ngă mâo sa čô êkei mnah hna ñu pliă plia leh anăn “djŏ mtao Israel ti anôk plah wah kkaih ao msei hŏng dŏ guôm đah đa” ngă kơ mtao êka kjham, leh anăn truh yang hruê lĕ snăn djiê.
Drei ƀuh djăp mta klei bi blah anei dôk ti gŭ klei Yêhôwa Aê Diê kiă kriê, gĭt gai, mơ̆ng bruă ngă kơ phung roh đuĕ kbưi hŏng Mtao Jôsaphat truh kơ bruă gai ƀrăm phiơr djŏ kơ Mtao Ahap leh anăn djŏ ti anôk plah wah kkaih ao msei hŏng dŏ guôm đah da. Mtao Jôsaphat dưi tlaih mơ̆ng klei djiê kyua thâo kwưh akâo leh anăn Aê Diê lŏ dơ̆ng đru ñu wăt tơdah ñu pô ba pô lĕ hlăm klei huĭ hyưt anei tơdah bi hgŭm, hlue ngă si asăp phung ƀai leh anăn amâo uêñ kơ klei mtă mơ̆ng khua pô hưn êlâo Aê Diê tiŏ hriê. Mtao Ahap wăt tơdah mâo jih sa hruê êka kjham leh anăn ƀuh klei bi blah ktang tĭt ƀiădah ăt gĭr hŏng ai hjăn pô. Ñu djă păn ti êdeh, bi kdơ̆ng hŏng phung Syria hŏng ai ktang pô leh anăn amâo kwưh akâo kơ Aê Diê ôh.
Tơdah dôk hlăm klei rŭng răng huĭ hyưt, drei khăng mâo knuih msĕ si sa hlăm dua čô mtao anei. Amâodah msĕ si Mtao Ahap, kyua boh klei luč jih klei čang hmăng amâodah ƀuh pô kbưi snăk hŏng Aê Diê leh anăn êlan Ñu anăn amâo lŏ čiăng knang kơ Ñu ôh. Amâodah msĕ si Mtao Jôsaphat, thâo pô êdu awăt, soh jhat ƀiădah ăt đăo kơ klei Aê Diê kiă kriê leh anăn hlăm boh klei huĭ hyưt hĭn ăt knang kơ Aê Diê dôk giăm pô leh anăn thâo tơdah kwưh akâo, klă sĭt Ñu srăng hmư̆. Mtao Jôsaphat wăt tơdah soh čhuai ƀiădah ñu ăt jing mnuih mâo klei đăo kyua anăn dưi bi mtlaih. Khua Yang srăng dôk giăm mđing hmư̆ leh anăn wĭt lač klei kwưh akâo hŏng klei đăo drei hlue si klei Ñu kiă kriê.
Ya klei dleh dlan prŏng đei tơl drei luč klei čang hmăng amâo lŏ čiăng kwưh akâo kơ Khua Yang?
Wah lač: Ơ Khua Yang jing Pô bŏ hŏng klei pap, bŏ hŏng klei myang. Akâo kơ Ih đru kâo nao giăm Ih nanao leh anăn knang kơ Ih hlăm djăp boh klei wăt tơdah huĭ hyưt dưn mơh. Akâo kơ Ih kiă kriê nanao klei hdĭp kâo hlăm klei myang Ih.
Dlăng Klei Aê Diê Blŭ hlăm tlâo thŭn: Y‑Amôs 6:1‑7:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
