Klei Aê Diê Blŭ: Y‑Mathiơ 18:5-6
Êlan kliăng: “Ƀiădah hlei pô ngă kơ sa čô hlăm phung hđeh điêt anei đăo kơ kâo brei gơ̆ lĕ hlăm klei soh, jing jăk hĭn brei arăng kă sa boh êsŭng prŏng ti kkuê ñu leh anăn dlăm hlăm êa ksĭ êlam brei ñu djiê mngăt.” (Y‑Mathiơ 18:6)
Klei êmuh ksiêm mĭn: Ya boh tŭ tơdah sa čô tŭ jum “sa čô hđeh”? Si boh jhat tơdah sa čô ngă kơ ayŏng amai adei pô luč klei đăo? Si Khua Yang čiăng kơ drei hdĭp hdơ̆ng pô?
Lŏ dơ̆ng mtô kơ Ƀuôn Ala Mtao, Khua Yang Yêsu yua rup “sa čô hđeh” čiăng bi hmô kơ phung đăo kơ Khua Yang hŏng klei luă gŭ. Hlăm klei blŭ jăk snăn “Hlei pô jum sa čô hđeh msĕ snei hlăm anăn kâo jing jum kâo yơh”. Hlei pô “jum” phung jing dŏ Aê Diê jing diñu dôk drông Khua Yang Pô. Boh blŭ “jum” lač kơ ai tiê drông phung tue yuôm, srăng duh kơ klei digơ̆ čiăng hŏng klei mđing uêñ mdê hjăn leh anăn jăk hĭn. Khua Yang Yêsu čiăng mđĭ ai ai tiê thâo khăp, mđing uêñ bi jum plah wah phung khua ƀĭng kna hrô kơ bi tăng hlei dưi hlei tlaih, hlei pô kdlưn hĭn amâodah hơăi.
Hlăm klei amâo jăk, tơdah hlei pô khăp kơ klei dưi leh anăn čŏng čiăng hiu mplư, jak iêô amâodah hmăi hŏng ya hdră ngă kơ ayŏng adei mkăn ngă soh, pô anăn srăng tŭ klei jhat kjham snăk kơ pô. Rup kă sa boh êsŭng prŏng ti kkuê ñu leh anăn dlăm hlăm êa ksĭ êlam jing sa klei bi kmhal kjham snăk. Khua Yang lač kơ hlei pô ngă kơ ayŏng adei pô ngă soh, luč klei đăo snăn năng tŭ klei bi kmhal huĭ hyưt anei. Khua Yang Yêsu čiăng hưn brei răng kơ phung khua ƀĭng kna wăt tơdah hdĭp ti krah lăn ala bŏ hŏng klei soh ƀiădah diñu amâo dưi yua ôh klei soh jhat mơ̆ng lăn ala čiăng ngă hŏng ayŏng adei pô, tơdah diñu čŏng ngă kơ ayŏng adei pô ngă soh čiăng kơ digơ̆ lĕ hlăm klei soh, phung anăn srăng tlă anăp hŏng klei Khua Yang bi kmhal kjham snăk.
Klei mĭn phung mnuih soh jhat jing knŏng bi mĭn kơ hjăn pô hrô kơ bi mĭn kơ phung mkăn snăn drei ăt ênưih hdĭp mbĭt hdơ̆ng pô hlăm ai tiê bi keh nač, bi êmut, bi lông. Klei Aê Diê Blŭ mñă kơ drei brei hdĭp mbĭt hŏng klei khăp, klei pap, jih ai tiê jum leh anăn bi đru hŏng jih ai tiê. Klei hdĭp drei brei mđing kơ klei tŭ dưn pô mkăn hĭn kơ knŏng mĭn mă klei tŭ kơ pô. Brei hdơr tơdah drei ngă klei jăk kơ ayŏng amai adei pô jing drei dôk ngă kơ Khua Yang. Drei amâo dưi hdĭp mgưt ôh ƀiădah kyua Khua Yang dôk hdĭp hlăm drei snăn drei dưi hdĭp hŏng ayŏng adei pô hŏng klei êdu êun, mđing uêñ, jih ai tiê jum digơ̆. Khua Yang ăt hưn brei răng drei đăm ôh kyua klei keh nač, ai tiê phĭ, ai tiê ngêñ, khăp kơ klei dưi…yua hdră msĕ si lăn ala čiăng ngă jhat, mplư, jak iêô ayŏng adei pô ngă soh leh anăn duah klei bi ngă hdơ̆ng pô. Knuih hdĭp anăn klă sĭt srăng tŭ boh jhat kjham snăk mơ̆ng Khua Yang.
Hlăm klei drei hdĭp hŏng ayŏng adei pô, mâo mơ̆ ya klei brei drei kmhal, bi mlih čiăng bi mơak kơ Aê Diê?
Wah lač: Ơ Khua Yang, bi mni kơ Ih kyua mñă kơ kâo kơ ai tiê jum ayŏng amai adei kâo, akâo kơ Ih đru kâo đăm ôh kyua klei ră, klei bi keh nač ngă kơ ayŏng amai adei pô ngă soh. Akâo kơ Ih đru kâo khăp nanao kơ Ih leh anăn khăp kơ phung riêng gah kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
