Klei Aê Diê Blŭ: I Y-Pêtrôs 5:1-4
Êlan kliăng: “Brei diih kiă phung biăp Aê Diê jao leh kơ diih, amâo djŏ hŏng klei mgô̆ ôh, ƀiădah hŏng klei čŏng čiăng, amâo djŏ kyua ênoh mưn čhŏ mrŏ ôh, ƀiădah hŏng klei khăp hŏng jih ai tiê” (I Y‑Pêtrôs 5:2)
Klei êmuh ksiêm mĭn: “Phung khua mduôn” čiăng lač kơ hlei phung? Ya jing bruă klam, knuih mă bruă, leh anăn klei mưn kơ diñu? Si drei dôk ngă bruă klam kơ sa čô mgăt biăp?
Lŏ čuê klei mtă kơ phung đăo dôk tŭ klei knap mñai hlăm pui klei lông dlăng brei digơ̆ ăt ngă klei kpă leh anăn jao mngăt digơ̆ kơ Pô Hrih Sĭt Suôr (I Y-Pêtrôs 4:12-19), Khua ƀĭng kna Y‑Pêtrôs čih klei mtă kơ “phung khua mduôn” hlăm phung digơ̆. Tơdah blŭ djŏ kơ “phung khua mduôn”, Khua ƀĭng kna Y-Pêtrôs čiăng lač kơ jih jang phung khua kiă kriê Phung Sang Aê Diê. Hlăm klei mtă anei, phung khua mduôn tinei čiăng lač kơ jih jang phung drei yơh, jing phung Aê Diê jao leh brei kiă kriê phung biăp điêt leh anăn prŏng Ñu, jing phung bi đru đăo leh anăn phung anak čô hlăm gŏ sang.
Hlăm klei jing sa čô khua mduôn mơh, Khua ƀĭng kna Y-Pêtrôs jing pô nao êlâo hlăm bruă kiă biăp Khua Yang Yêsu pô jao leh ti hang êa ksĭ Tibêrias snei: “Čiêm bĕ phung biăp Kâo” (Y‑Yôhan 21:17), jao leh bruă klam kơ jih jang “phung khua mduôn” snei, “Brei diih kiă phung biăp Aê Diê jao leh kơ diih” (êlan 2). Ñu mtă brei pô kiă biăp ngă bi ênŭm bruă Aê Diê jao leh hŏng knuih: Tal sa, mă bruă hur har hŏng jih ai tiê, “amâo djŏ hŏng klei mgô̆ ôh, ƀiădah hŏng klei čŏng čiăng, amâo djŏ kyua ênoh mưn čhŏ mrŏ ôh, ƀiădah hŏng klei khăp hŏng jih ai tiê” (êlan 2). Tal dua, pô kiă amâo kiă kriê hŏng klei ktư̆ juă ôh phung biăp Aê Diê jao leh, ƀiădah mă bruă hŏng klei bi hmô jăk kơ phung biăp hlăm klei đăo leh anăn klei dôk dơ̆ng ƀơ̆ng huă. Đăm ngă ôh klei mtô mdê mơh, klei ngă mdê mơh (êlan 3; Y-Markôs 10:42-45). Tal tlâo, brei drei thâo klă, grăp čô drei knŏng jing phung mgăt biăp điêt, mâo Khua Yang Yêsu jing Khua, jing “Khua Mgăt Biăp” (êlan 4) jao phung biăp prŏng amâodah điêt Ñu blei leh hŏng êrah Ñu pô. Đăm duah ôh mnơ̆ng, klei dưi, klei arăng mpŭ, klei hing ang, klei bi mni amâodah ya mta jing dŏ lăn ala anei, ƀiădah duah bĕ klei mưn prŏng hlăm adiê pioh leh kơ phung dĭng buăl sĭt suôr, jing “đuôn mtao klei guh kơang” dôk nanao hlŏng lar Khua Mgăt Biăp srăng mưn hruê Ñu lŏ hriê (êlan 4).
Hruê anei, grăp čô drei jing mgăt biăp kơ Khua Yang sơăi. Drei amâo bi msĕ ôh phung biăp Aê Diê jao leh prŏng hĕ amâodah điêt, ƀiădah brei drei mă bruă hŏng klei luă gŭ, răng kriê klei hdĭp myang phung biăp hŏng klei čŏng čiăng, amâo duah klei mưn hŏng mnơ̆ng dhơ̆ng, amâodah duah klei hing ang kơ pô ôh. Čiăng dưi jing msĕ snăn, brei drei hur har hriăm Klei Aê Diê Blŭ, hdĭp tui si klei Khua Yang mtă čiăng ngă klei bi hmô jăk kơ phung biăp drei răng kriê. Tơdah drei hŏng jih ai tiê, sĭt suôr, leh anăn hur har mă bruă hŏng klei mĭn sa čô dĭng buăl tui knuih Khua Yang, drei srăng mă tŭ đuôn mtao klei guh kơang Khua Yang pioh leh kơ phung khăp kơ Ñu.
Si ngă ih uêñ mĭn leh anăn răng kriê phung biăp Khua Yang jao leh kơ ih hŏng jih ai tiê mơ̆?
Wah lač: Ơ Khua Yang, Pô jing Mgăt Biăp Jăk, brei bĕ kơ kâo klei ktang leh anăn ai tiê hur har čiăng kơ kâo dưi bi leh bruă klam jing pô kiă phung biăp Ih jao leh hlăm Phung Sang Aê Diê leh anăn hlăm gŏ sang. Đru kâo jing sa čô dĭng buăl jăk leh anăn sĭt suôr kơ Ih nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
