I Pêtrôs 5:1-4
“Iĕm athei wei-lăng kơ lu bơngai mă ‘Bok Kei-Dei pơjao kơ iĕm mă ‘lơ̆ng, thoi tơ’ngla triu wei-lăng triu sư. Iĕm jang ‘nĕ gô đe bơtho, gô đe khan, iĕm athei jang kơdih mă tơnăp kiơ̆ thoi ‘Bok Kei-Dei lăp đon; ‘nĕ kơ jang pơtrŏ wă kơ gơh sa jên đĕch ôh, athei tơgŭm lu sư mă tơpă.” (I Pêtrôs 5:2)
Nơ̆r jet tơchĕng pơwao:
– “Lu bơngai wei lăng” pơma kơ lu đe bu?
– Tơdrong hiơ̆k pŭ iŏk, jơhngơ̆m pơm tơ’bôh păng tơmam apah ‘măn kơ lu sư noh kiơ?
– Bơ̆n oei pơm kiơ̆ tơdrong hiơ̆k pŭ iŏk đơ̆ng bơngai wei lăng thoi yơ?
‘Moi pơtrơp nơ̆r pơlung kơ lu bơngai lui mă đei tơdrong gleh pơlong lăng truh pơmat lăm ŭnh athei adrin pơm ‘lơ̆ng păng pơjao bơhngol bơ̆n kơ Tơ’ngla pơjing tơpăt (I Pêtrôs 4:12, 19). ‘Bok Pêtrôs chih nơ̆r pơlung “lu bơngai pơm kră wei lăng khul bơngai lui”. Kơplah pơma kơ “bơngai pơm kră wei lăng” ‘Bok Pêtrôs wă pơma kơ lu bơngai wei lăng Khul bơngai lui. Lăm tơdrong jang lu bơngai wei lăng dang ei, lu bơngai wei lăng bơih mă wei lăng bơ̆n, lu bơngai mă Kră Yang pơjao wei lăng khul triu tih, iĕ noh bơih bơngai lui dah kon sâu lăm hnam dơnŏ.
Lăm tơdrong jang Kră wei lăng, ‘bok Pêtrôs bơngai năm adrol lăm tơdrong jang wei lăng đơ̆ng Kră Yang Yêsu pơjao tơ đak dơsĭ Tiberiat: “lei ih rong triu inh” (Yôhan 21:17), đei pơjao kơ đĭ “kră wei lăng” khan “Iĕm athei wei lăng lu bơngai mă ‘Bok Kei-Dei pơjao kơ iĕm mă ‘lơ̆ng” (trong 2). Sư pơkă kơ lu bơngai kră wei lăng athei jang keh tôm tơdrong Kră Yang pơjao: Mă mônh, đĭ jơhngơ̆m bơ̆jang, “iĕm jang ‘nĕ gô đe bơtho, gô đe khan, iĕm athei jang kơdih mă tơnăp kiơ̆ thoi ‘Bok Kei-Dei lăp đon, ‘nĕ kơ jang pơtrŏ wă kơ gơh sa jên đĕch ôh, athei tơgŭm sư mă tơpă (trong 2). Mă ‘bar, bơngai wei lăng ưh kơ yua iŏk tơdrong pran kơdih wă pơgơ̆r lu khul triu Kră Yang pơjao kơ bơ̆n ôh, mălei bơ̆jang hăm tơdrong arih pơm kơmĭl lơ̆ng kơ bơngai lui đơ̆ng đon lui păng tơdrong arih sa bơ̆n. ‘Nĕ kơ bơtho thoi âu, arih thoi to (trong 3; Markôs 10:42-45). Mă pêng, athei băt hơđăl, bơ̆n âu thoi bơngai wei triu iĕ đĕch, Kră Yang Yêsu bơih Yŏng Tơ’ngla, Sư bơih “Tơ’ngla tơm wei triu” (trong 4). Pơjao kơ dôm khul triu tih dah iĕ mă Sư đei răt hăm pham Sư kơdih. ‘Nĕ kơ yua mŭk tơmam, tơdrong pran, anih jang, đe ưang, tơdrong ưang dah mă dôm tơdrong kiơ gah lăm chăl âu, mălei athei lăng gah tơmam apah tih hloh tơ kơpal plĕnh ‘măn kơ lu đĭch đam mă tơnăp, noh bơih “găl pơkao ‘lơ̆ng rŏ” đei yua sĭt ling lang đơ̆ng Tơ’ngla wei triu Tih hloh apah kơplah Sư jur dơ̆ng (trong 4).
Dang ei, rim kơ bơ̆n tă kơ bơngai wei triu Kră Yang ngăl. Bơ̆n ‘nĕ kơ pơtŏ pơting gah khul triu mă Kră Yang pơjao kơ bơ̆n tih dah iĕ, mălei athei chu yom bơ̆jang bơwei tơdrong gah bơhngol bơngai lui hăm jơhngơ̆m lăp đon ‘maih kơdih, ưh kơ druh kiơ̆ yua kơ jên tơmam, dah mă chă wă kơ đe ưang kơ akâu kơdih. Wă kơ gơh đei thoi noh, bơ̆n athei pơnam kơ hŏk pơhrăm nơ̆r Kră Yang, arih kiơ̆ nơ̆r Kră Yang bơtho wă pơm kơmĭl ‘lơ̆ng kơ bơngai lui mă bơ̆n bơwei. Dah bơ̆n đĭ jơhngơ̆m, tơnăp păng adrin bơ̆jang hăm jơhngơ̆m thoi đĭch đam kiơ̆ kơmĭl Kră Yang, bơ̆n kư̆m gô iŏk tơmam apah agăl pơkao ‘lơ̆ng rŏ Kră Yang ‘măn kơ lu bơngai ‘mêm kơ Sư.
Ơ Kră Yang Tơ’ngla wei triu iơ̆m dim, apinh Ih ăn thim tơdrong pran păng đei jơhngơ̆m ‘maih wă kơ inh pơm keh tơdrong jang bơngai wei lăng bơngai lui mă Kră Yang đei pơjao lăm khul bơngai lui păng hnam dơnŏ. Apinh Ih ăn kơ inh jing đĭch đam iơ̆m dim tơnăp kiơ̆ thoi Ih. Krao khan yua anăn Kră Yang Yêsu Krist, Amen.
Bơ̆n hăm đĭ jơhngơ̆m hiơ̆k bơngơ̆t, bơwei khul bơngai lui mă Kră Yang pơjao kơ bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Tơ’bôh 1
Kênh Youtube BHKTHN:
