Klei Aê Diê Blŭ: Klei Bi Hriêng 11:24
Êlan kliăng: “Sa čô mnuih brei hŏng klei kmah, ƀiădah ăt đĭ mdrŏng hĭn, sa čô mnuih mkăn amâo brei ênŭm tui si klei djŏ ôh, ƀiădah ăt mâo klei kƀah.” (Klei Bi Hriêng 11:24)
Klei êmuh ksiêm mĭn: Ya jing dua phung mnuih hưn mdah hlăm êlan Klei Bi Hriêng anei? Ya boh tŭ mdê mdê tui si dua phung anei mă tŭ? Ya klei bi mđĭ ai drei amâodah klei hưn êlâo brei drei răng mơ̆ng klei hriăm anei?
Mtao Salômôn hưn mdah sa êlan hdră dlăng msĕ si bi mklăk hŏng klei bhiăn yang đar. Ƀiădah lĕ, êlan hdră anei knŏng BI MKLĂK hŏng KLEI MĬN lăn ala, ƀiădah DJŎ GUÔP hŏng KLEI MĬN mơ̆ng Klei Aê Diê Blŭ. Boh hră “brei hŏng klei kmah…” mñă wĭt 9 blư̆ hlăm Klei Aê Diê Blŭ čiăng lač “rah hŏng klei kmah, klei mơak ”. “Brei hŏng klei kmah” tinei jing klei bi mbha hŏng klei kmah, amâo tĭng yap kơ boh mnga ôh. Êlan bhiăn tinei jing ktang rah, ktang brei ktang lŏ “đĭ mdrŏng hĭn”. Mnuih ngă hma ktang rah lu ktang wiă lu hĭn (Khua Pô Mtô 11:1-2; II Kôrantô 9:6). Tĭng kơ klei hdĭp mngăt myang tơdah drei rah năng ai amâo wiă wĭt klei tŭ dưn mnơ̆ng mnuă ôh, ƀiădah dưi wiă ênoh yuôm klei hdĭp mngăt myang. Ai ktang, hruê mmông, prăk kăk drei tuh êyuh, Khua Yang srăng yua pioh đru pô mkăn dưi mâo klei bi mtlaih, pioh rŭ mdơ̆ng, bi mđĭ mngăt ai tiê lu mnuih.
Boh blŭ “amâo brei ênŭm tui si klei djŏ ôh” čiăng lač kơ klei riêt đei, leh anăn êlan 24b hlăm klei blŭ phŭn dưi mblang snei: “mâo đa pô kơ̆ng pioh kơ ñu pô mnơ̆ng năng brei kơ arăng…” amâodah “mâo đa pô kơ̆ng pioh kơ ñu pô êgao hnơ̆ng đei…”. Snăn drei dưi thâo săng, anăn jing pô kơ̆ng pioh kơ ñu mta mnơ̆ng năng djŏ gơ̆ brei kơ arăng, amâo ngă mta klei năng ngă, amâo kah mbha kơ arăng klei năng kah mbha. Tui si pruê̆ klei blŭ, mnuih čiăng kơ drei đru tinei jing phung ƀun ƀin yơh. Blŭ mdê hĭn, tơdah drei mâo klei dưi đru sa čô mnuih dôk mâo klei kƀah ƀiădah drei kơ̆ng pioh hĕ klei anăn, mblang jing drei dôk “amâo brei ênŭm tui si klei djŏ ôh” amâodah kơ̆ng pioh hĕ mta klei amâo dưi kơ̆ng pioh. Năng ai klei mdê ti krah klei tlĕ leh anăn “amâo brei ênŭm tui si klei djŏ ôh” amâo prŏng msĕ si drei mĭn ôh. Mnuih tlĕ jing mnuih mă mnơ̆ng amâo djŏ dŏ ñu ôh, bi mnuih “amâo brei ênŭm tui si klei djŏ ôh” kơ̆ng pioh hĕ kơ ñu pô mnơ̆ng năng djŏ jing dŏ kơ arăng.
Ya ngă “mnuih amâo brei ênŭm tui si klei djŏ ôh, ƀiădah ăt mâo klei kƀah”? Kyua tơdah kơ̆ng pioh hĕ kơ pô klei năng brei kơ arăng jing msĕ si gao klei bhiăn kpă ênô Aê Diê, leh anăn mnuih msĕ snăn sĭt nik knŏng mă tŭ klei Aê Diê ăl ngêñ (Klei Bi Hriêng 11:23).
Tĭng kơ sa nah mkăn, mnuih brei hŏng klei kmah srăng “đĭ mdrŏng hĭn”, srăng hơ̆k mơak, wăt tơdah ti dlông jhưng huă pô anei amâo mâo mnơ̆ng ƀơ̆ng huă jăk yuôm dưn mơh, ñu ăt “đĭ mdrŏng hĭn”, mơak hŏng klei hdĭp Khua Yang brei kơ ñu. Mklăk wĭt, mnuih amâo mâo ai tiê kmah, amâo thâo kah mbha kơ arăng mnơ̆ng ñu mâo, amâo srăng tuôm mâo klei “đĭ mdrŏng hĭn” ôh, kyuadah mnuih msĕ snăn amâo tuôm ƀuh kơ ñu mâo djăp leh ôh, êpa mhao čiăng hrui mkăm pioh kơ pô lu hĭn nanao, anăn yơh jing mnuih êpa nanao, mhao nanao, “kƀah” nanao.
Hlei drei jing hlăm dua phung mnuih anei?
Wah lač: Ơ Khua Yang, akâo Ih đru kâo thâo săng nanao jih jang mnơ̆ng kâo mâo jing kbiă hriê mơ̆ng Ih sơăi leh anăn kâo knŏng jing pô kiă kriê mnơ̆ng Khua Yang jao. Akâo Ih đru kâo hmiêt mkăp thâo brei kơ arăng tui si klei Ih čiăng.
Dlăng Klei Aê Diê Blŭ hlăm tlâo thŭn: Y‑Yêrêmi 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
