Pajlug 11:24
24 Muaj qee leej siv lawv tej nyiaj txiag lawm laub lug los lawv tseem muaj txiag npluanuj, tiamsis muaj ibtxhia qia dub kawg los lawv pluag kawg li.
Lus nug rau sawvdaws xav:
- Ob hom neeg twg hais txog hauv nqe Pajlug no?
- Ob hom neeg no tau txais tej koob hmoov twg?
- Peb kawm tau cov lus ceebtoom lossis lub txhawb zog twg dhau los ntawm zaj kawm no?
Vajntxwv Xalumoos hais txog ib tug lw zoo li uas tsis haum. Tiamsis tus lw no tsuas yog TSIS HAUM rau neeg ntiajteb xwb, nws HAUM raws li Vajtswv Txojlus. Lo lus “siv…laub lug” hais txog 9 zaug hauv Phau Vajluskub, lo lus no txhais tau hais tias “ua siab dawb paug muab mus tsis khuvxim”. “Siv laub lug” ntawm no yog muab pub xyivfab hlo, lossis ntws lug tsis yuav rov qab. Tus lw no yog yim siv mus ces “yim muaj ntxiv xwb”. Cov neeg ua qoob yim cog noob ntau ces yim sau tau ntau (Tej Lus Qhia 11:1-2; II-Kauleethaus 9:6). Sab ntsujplig, thaum peb tseb lawm tej zaum yuav sau tsis tau raws li sab nqaij tawv ntshaw tiamsis yuav tau tej nqi zog ntawm sab ntsujplig. Peb tus dag zog, sijhawm, nyiaj txiag siv mus ua tus Tswv haujlwm yuav pab lwm tus tau kev cawm dim, txhim tsa, txhawb tau ntau leej txojkev ntseeg.
Nqe lus “qia dub kawg” txhais tau hais tias ua tsis ncaj, thiab nqe 24b lub ntsiab raws li hauvpaus lus ces yog: “Kuj muaj neeg khaws tej uas tsimnyog nws muab pub…cia” lossis “Kuj muaj neeg zais tej uas tsis tsimnyog nws tau lossis khaws cia ntau heev rau nws…”. Yog li ntawd, peb totaub hais tias muaj cov neeg khaws tej uas twb tsimnyog muab pub rau luag cia, tsis ua tej uas tsimnyog yus ua, tsis faib pub rau lwm tus. Raws li ntu Vajluskub no hais, cov neeg uas tsimnyog pab yog cov neeg pluag. Hais ua lwm seem lus, thaum peb muaj sijhawm pab ib tug neeg uas cheemtsum tiamsis peb ho muab khaws cia tsis pab ces txhais tau hais tias peb tabtom ua neeg “qia dub kawg” lossis khaws tej uas tsis tsimnyog yus khaws. Tej zaum ua tubsab thiab “qia dub” nws txawv tsis deb li peb xav. Tus neeg ua tubsab yog tus uas muab tej yam tsis yog yus li los ua yus tug, tus neeg “qia dub” kuj khaws tej yam uas yog lwm tus li rau nws thiab.
Vim li cas tus neeg “qia dub kawg los lawv pluag kawg li.”? Vim thaum khaws tej uas tsis yog lawv tug ces lawv ua txhaum Vajtswv tus lw ua zoo, thiab tus uas ua li ntawd yeej tau txais tus Tswv txojkev npautaws (Pajlug 11:23). Dua li ntawd, tus neeg ua siab dawb paug “lub neej yuav vammeej”, txaus siab, zoo siab txawm yog nws lub rooj mov tsis muaj qab noj los nws yeej “vammeej”, txaus siab rau lub neej uas tus Tswv pub. Tus neeg uas qia dub, tsis paub muab tej uas nws muaj faib pub rau lwm tus ces yuav tsis “vammeej”, vim tus neeg zoo li ntawd tsis muaj hnub txaus siab rau tej uas nws muaj, nws tsuas niaj hnub npaj kom nws muaj ntau, tus uas ua li no tsuas muaj kev tshaib nqhis, thiab “pluag kawg li.”
Thov Vajtswv,
Tus Tswv, thov Koj qhia kom nyuam yaus paub hais tias txhua yam puavleej yog Koj pub, nyuam yaus tsuas yog tus tubtxib saib xyuas tej uas Koj pub xwb. Nyuam yaus txaus siab hlo muab pub raws li Koj lub siab nyiam. Amees.
Peb tabtom yog leejtwg hauv ob hom neeg no?
Nyeem Vajluskub hauv peb lub xyoos: Yelemis 28
Kênh Youtube BHKTHN:
