Tĭt 2:1-3
Trong tơm: “Ih athei bơtho khan kơ lu ‘bok kră ‘nĕ pă et sik suai, ‘nĕ kơ pơm kư̆ kă. Athei sư iŏk đon iơ̆m dim păng ih athei sư lui mă kơjăp, băt ‘mêm kơ ‘Bok Kei-Dei hăm bôl buăl. Mă đei tơdrong gleh pơmat dang yơ athei sư adrin khŏm khŏm đĕch.” (Tĭt 2:2)
Nơ̆r jet tơchĕng pơwao:
– Dôm nơ̆r Tĭt bơtho khan kăl kơ lăng iŏk đơ̆ng yơ?
– Lu yă ‘bok kăl kơ đei dôm tơdrong kiơ?
– Dôm lu bơngai oei moh lăm khul bơngai lui kăl kơ pơm kiơ wă tơgŭm lu bơngai kră?
Wă pơjah pơjăng hăm lu bơngai bơtho kư̆-kă ưh kơ ‘blep trŏ nơ̆r ‘Bok Kei-Dei, ‘bok Pôl pơkă kơ Tĭt athei bơtho kơ bơngai lui “Tơdrong ‘Bok Kei-Dei mă trŏ” wă khan bơtho dôm tơdrong ‘blep trŏ nơ̆r ‘Bok Kei-Dei tơpă, ‘nĕ kơ bơtho kiơ̆ kơ kơdih ôh dah mă bơtho pơgŏ pơđep đe. Hăm lu ‘bok kră, lu sư thoi ‘bok kră, thoi ‘bă, thoi mih, thoi ma, lăng thoi lu kră wei lăng bơngai lui. Bơngai mă năm hơdrol athei pơm trong mă ‘lơ̆ng wă kơ jơhnơr đơ̆ng rŏng rok kiơ̆, “ưh kơ sa dư păng alah kơ jang” thoi bơngai tơring đak Kret, lu sư athei oei sa gơh gơ̆t, tơplih kơ tơdrong arih “ưh kơ wă chu yom, dah ma pơma pơsôm, hơlĕnh plơ̆ plĕch kơ đe” (Tĭt 1:10-12), lu sư athei “pơm mă ‘lơ̆ng tơpăt gơh hơgei păng kĕ chơ̆n lăm tôm tơdrong” băt pơgơ̆t dôm tơdrong ‘maih pơm, nơ̆r pơma, jơhngơ̆m ‘maih wă Lu ‘bok kră, athei sư lui mă tơpă, băt ‘mêm kơ ‘Bok Kei-Dei hăm bôl buăl, wă bơwei tơdrong hiôk chơt lăm hnam dơnŏ păng chông anhăk bơngai lui. ‘Nĕ kơ pơm kư̆-kă thoi lĕ kơ pơma hơlĕnh păng “ih athei khă lu sư ‘nĕ pă pơm thoi noh dơ̆ng. Đei hnam dơnŏ mơ’nah mơ̆ng sư bơtho na đĭ kơ hnam dơnŏ sư jing hơwơ̆l kơ tơdrong ‘Bok Kei-Dei na achăng lê̆ tơdrong lui sư. Lu đe ei sư bơtho tơdrong ưh kơ trŏ kơ tơdrong bơtho. Lu sư bơtho thoi noh, lu sư wă kơ gơh iŏk jên đe đĕch” (Tĭt 1:11).
Hăm lu yă ‘bok, ‘bok Pôl khan “păng ih bơtho khan kơ lu yă kră athei sư iŏk đon tơpăt (3). Lu yă kră thoi mĕ, thoi yă, dang nă, dang duch. Lei jơhngơ̆m, nơ̆r pơma, jơ̆ng ti yak năm, lăm tơdrong jang, tah abăn ao kư̆m athei “trŏ hăm tơdrong ‘lơ̆ng rơgoh, ‘lơ̆ng tơpăt “tơdrong arih thoi noh bơih ‘bai pơhrăm hăm tơdrong arih tơpă, ‘bônh kơ hlôh wă pơm tơ’bôh ăn kơ kon sâu păng lu drŏkăn oei moh lăm hnam Kră Yang, “khă lu sư ‘nĕ pă bâu roi đe, ‘nĕ kơ et sik suai, athei bơtho mă trŏ kiơ̆ kơ nơ̆r ‘Bok Kei-Dei (trong 3) păng athei hiơ̆k bơtho kơ lu kon sâu tơdrong ‘lơ̆ng tơdrong trŏ, păng tơdrong mă kăl dêh noh ưh kơsĭ lu bơngai drŏkăn đĕch glăi mă drŏnglo kư̆m dai glăi mơ̆n noh jô̆ bâu roi đe! Apinh Kră Yang tơgŭm bơ̆n gơh wei ‘bơ̆r pơma bơ̆n.
Khul bơngai lui đei lơ bơngai ‘lơ̆p ‘lŏ phara băl thoi noh ưh kơweh ôh đei tơdrong pơma băl. ‘Bok Pôl bơtho Tĭt athei bơtho akhan kơ jơhnơr đơ̆ng rŏng kiơ̆ tơdrong Kră Yang pơkă, wă kơ lu sư arih trŏ thoi ‘Bok Kei-Dei wă. Dah lu yă ‘bok arih pơm kiơ̆ nơ̆r bơtho khan ‘nâu lei anăn Kră Yang đe ư-ang. Lu sư rai jê̆ Kră Yang hloh, păng pơm tơ’bôh ăn tơdrong ‘lơ̆ng kơ lu kon sâu păng lu hơ’lơ̆p jơhnơr đơ̆ng rŏng lăm khul bơngai lui rok kiơ̆, wă tơgŭm lu yă ‘bok arih kiơ̆ nơ̆r Kră Yang bơtho, lu bơngai oei moh kăl kơ tơ’bôh tơdrong pơyom, ‘mêm mơnat, đei jơhngơ̆m wei lăng lu yă ‘bok wă kơ khul bơngai lui gơh wơ̆ tŏk păng pơgơ̆p băl minh jơhngơ̆m đon.
Bơ̆n kăl kơ tơplih tơdrong kiơ đơ̆ng rŏng kơ pơhrăm ‘bai hŏk năr ‘nâu?
Ơ Kră Yang mă ‘mêm yom, apinh Ih tơgŭm inh băt tơpă, mă oei moh dah mă kră bơih, inh kư̆m kăl kơ hŏk pơhrăm lăm tơdrong arih đon lui, gơh gơ̆t, arih ‘lơ̆ng tơpăt, ‘mêm mơnat păng kĕ chơ̆n. Apinh Ih yua tơdrong arih inh pơm tơ’bôh tơdrong ‘lơ̆ng kơ lu bơngai jum dăr, krao khan hăm anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 30
Kênh Youtube BHKTHN:
