Tơdrong Pơđơ̆k 21:3-15
“Pơm tơdrong tơpăt, băt pơm tơdrong trŏ Noh Kră Yang lăp đon hloh kơ tơmam soi pơyơ̆r.” (Tơdrong Pơđơ̆k 21:3)
Nơ̆r jet tơchĕng pơwao:
– Kră Yang wă kơ tơdrong arih lu kon Kră Yang pơm tơ’bôh tơdrong kiơ?
– Bơngai chih hla bơar roi thoi yơ dah bơngai pơm kơnê̆ păng bơngai tơpăt?
– Bơ̆n pơm kiơ̆ tơdrong arih tơpăt păng tơdrong trŏ thoi yơ?
Lu bơ̆n ngăl pơjah băl dôm tơdrong bơ̆jang păng giĕng tơdrong lui thoi kơ năm tơ hnam akŭm, pơyơ̆r, dah bơ̆jang awih awăn… hăm jơhngơ̆m lui yom kơ Kră Yang. ‘Nâu bơih dôm tơdrong kăl kơ pơm dah bơngai lui đei tơdrong arih lui yom. Mă khan lei ră, lăm chăl nơ̆r ‘Bok Kei-Dei ‘nâu, pơtao Sôlômôn gơh hơgei tơ’blŏk kơ bơ̆n khan: ‘Bok Kei-Dei lăng gĭt tơdrong ‘lơ̆ng bơ̆n hloh kơ lu tơdrong giĕng păng tơdrong bơ̆jang lăm tơdrong lui (trong 13). Kră Yang wă kơ lu kon Sư pơm tơ’bôh tơdrong tơpăt păng tơdrong trŏ Sư. Kơdih ‘bok Michê kư̆m đei tơbăt: “Ơ kon bơngai: Tơdrong mă Kră Yang wă kơ ih pơm ‘lơ̆ng tơpăt, wă kơ đei tơdrong ‘mêm mơnat păng yak năm hăm jơhngơ̆m iơ̆m dim, pơyom kơ ‘Bok Kei-Dei ưh?” (Mika 6:8). Tơpă thoi ei, Kră Yang ling lang wă kơ tơdrong arih bơ̆n, pơm tơ’bôh jơhngơ̆m lui păng tơdrong ‘lơ̆ng Sư. Tơdrong mă Sư lăp đon ưh kơ sĭ lu tơdrong bơ̆jang kơkuh gah ‘nguaih na jô̆ minh tơdrong arih pơm trŏ tơpăt, iơ̆m dim păng trŏ (trong 3).
Pơtao Sôlômôn chrih khă gah “jơhngơ̆m pơang”, dôm tơdrong đei hơmet hăt hot păng đei yua ưh kơ trŏ. Lăp đei tơdrong tơpăt trŏ glăi iŏk đon ala đĕch na đei tơdrong apah sot đunh lăm trong năm ưh kơ topăt păng jơhngơ̆m pơang gô ba truh tơdrong răm ‘băm (trong 4-6). Lu trong pơtrơp dơ̆ng đei roi tơbăt kơ trong yak năm lu bơngai kơnê̆, bơngai ưh kơ đei jơhngơ̆m ‘mêm mơnat (tron 7-10). Tơdrong ‘nâu tơ’bôh tơdrong bơ̆n pơm jang tơ’bôh tơdrong gah lăm. Dah bơ̆n wei rong tơdrong yoch, tuch luch tơdrong yoch gô blah drŭt. Dah bơ̆n druh kiơ̆ Kră Yang, tơdrong arih bơ̆n gô pơm tơ’bôh “tơdrong tơpăt, băt pơm tơdrong trŏ” Sư. Pơtrơp dơ̆ng, bơngai chih hla bơar tơbăt bơngai gơh hơgei pơhrăm iŏk đơ̆ng tơdrong bơtho tơ’bôh, păng bơngai kơtul gô blah găn (trong 11). Sư khan hơđăl ‘Bok Kei-Dei bơih Tơ’ngla ‘lơ̆ng tơpăt sek tơlang lu bơngai pơm kơnê̆ (trong 12). Trong 13 pơma hơđăl gah jơhngơ̆m ‘mêm mơnat hăm bơngai dơnuh hin. Bơ̆n băt Kră Yang hiơ̆k tơgŭm lu bơngai dơnuh păng Sư tơtă nơ̆r kơ bơ̆n athei đei jơhngơ̆m ‘mêm mơnat hăm lu sư (Hơriso 41:1; Tơdrong Pơđơ̆k 19:17). Tuch luch, trong 15 pơma re pran minh tơdrong tơpăt: “Pơm tơdrong tơpăt noh băt pơhiôk, lu bơngai pơm ‘lơ̆ng, mălei đei tơdrong hli kơ lu bơngai pơm kơnê̆”. Tơdrong tơpăt ưh kơ sĭ lăm tơdrong teh đak đĕch ôh, na kư̆m tơm tơdrong kăl gah bơhngol mơ̆n. Kơplah đei pơm kiơ̆ tơdrong tơpăt, Kră Yang gô ba ăn tơdrong chơt hiôk păng hơđơ̆ng kơ bơngai tơpăt, mălei oei hli kơ lu bơngai pơm kơnê̆.
Bơ̆n oei arih lăm minh teh đak ‘bĕnh kơ tơdrong ưh kơ tơpăt păng kơ’bah kơ tơdrong pơm ‘lơ̆ng tơpăt, kơlih kơ thoi noh, wă kơ gơh bơwei tơdrong arih trŏ ‘bơ̆t anăp Kră Yang, bơ̆n athei kăl gơnang kơ Kră Yang wă kơ gơh đei Kră Yang tơplih tôm tơdrong păng thim đon lui wă kơ gơh dơ̆ng kơjăp lăm tơdrong tơpăt sĭt Kră Yang.
Ơ Kră Yang, inh bơnê kơ Ih, yua kơ Ih bơih Tơ’ngla ‘lơ̆ng tơpăt dêh. Apinh Ih tơ’blŏk kơ inh tơdrong tơm kăl tơpăt Ih păng tơgŭm inh băt arih trŏ lăm măt Ih kư̆m thoi ‘bơ̆t anăp kon bơngai, krao khan yua anăn Kră Yang Yêsu Krist, Amen.
Kơplah tơ’bơ̆p tơdrong pơmat yua kơ arih pơm trŏ, bơ̆n hơmet thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 8
Kênh Youtube BHKTHN:
