Klei Aê Diê Blŭ: Klei Bi Hriêng 10:2-3
Êlan kliăng: “Dŏ ngăn arăng mâo hŏng klei amâo kpă amâo jing yuôm ôh, ƀiădah klei kpă ênô bi mtlaih mơ̆ng klei djiê.” (Klei Bi Hriêng 10:2)
Klei êmuh ksiêm mĭn: Mtao Y-Salômôn mtô si klei thâo mĭn jing, si klei mluk jing? Si ngă klei mtô anei amâo djŏ nanao ôh hlăm klei hdĭp sĭt? Ya klei jing yuôm hĭn kơ klei mdrŏng sah leh anăn ngăn drăp?
Y-Salômôn lač kơ “Dŏ ngăn”, mblang jing klei mdrŏng sah, ngăn drăp. Tui si êlan 2, klei mluk mgu amâodah klei thâo mĭn amâo čuăn kyua ngăn dŏ mâo ôh, ƀiădah hŏng hdră êlan dưi mâo klei mdrŏng sah: “amâo kpă” amâodah “kpă”. Phŭn knhal klei anei kyuadah Aê Diê jing Pô dôk kiă kriê jih jang mnơ̆ng, Ñu ƀuh jih klei anak mnuih ngă leh anăn Ñu čuăn djăp mta klei anak mnuih dưi mă tŭ (êlan 3). Mrâo dlăng, mnuih kpă ênô msĕ si tŭ klei luč liê, kyua amâo mâo mnơ̆ng ôh, ƀiădah klei mnuih kpă ênô mă tŭ jing klei kiă kriê dlăng ba leh anăn klei thiê brei mơ̆ng Khua Yang, kơ jih jang mnơ̆ng digơ̆ kƀah (Klei Mmuñ Hđăp 37:25). Êjai phung mluk msĕ si mâo djăp mta mnơ̆ng, ƀiădah klei diñu amâo mâo jing klei mơak hŏng mnơ̆ng diñu mâo, kyuadah Khua Yang mă mđuĕ leh. Aê Diê Pô mâo jih klei dưi ti dlông djăp mta klei. Ñu jing mnư̆ kpal amâo dưi ƀuh hŏng ală kơ phung kpă ênô, kơ phung khăp bi mơak kơ Aê Diê, leh anăn đup gưt klei ktang myang Ñu. Ƀiădah Khua Yang mâo klei dưi mă mđuĕ klei phung ƀai tluh, bi kgăn êlan phung hngah kơ klei Khua Yang čiăng leh anăn ngă klei bi kdơ̆ng hŏng hdră êlan Khua Yang.
Klei mtô anei tăp năng msĕ si amâo djŏ ôh, tơdah lu phung đăo ti Sudan dôk djiê ư̆ êpa, phung huĭ mpŭ kơ Aê Diê tŭ klei ƀun ƀin knap mñai, êjai anăn phung luar, phung mplư mâo klei đĭ kyar! Boh sĭt, klei mtô anei jing djŏ nanao tơdah drei dlăng ti gŭ klei mngač Yang Krist leh anăn ênuk hlŏng lar. Năng ai jih jang klei anei amâo djŏ mtam ôh, ƀiădah ti KNHAL TUČ srăng djŏ nanao. Pô čih Klei Mmuñ Hđăp 73:16-17 lač snei: “Ƀiădah tơdah kâo duah čiăng thâo săng klei anăn, ñu jing klei dleh prŏng kơ kâo, tơl kâo mŭt leh hlăm adŭ doh jăk Aê Diê, hlăk anăn kâo thâo săng klei srăng truh kơ diñu ti hruê knhal tuč.”.
Phŭn knhal tal dua, kyuadah mâo lu klei mkăn jing yuôm hĭn kơ klei mdrŏng sah leh anăn ngăn drăp (êlan 2). Mtao Y-Salômôn brei ƀuh phung mluk mâo “Dŏ ngăn”, bi phung kpă ênô amâo ƀuh lač kơ “Dŏ ngăn” ôh! Snăn, klei mdrŏng sah amâo djŏ jing klei hơêč hmưi mơ̆ng Aê Diê nanao ôh, kyua klei mdrŏng sah mâo hŏng klei “amâo kpă” snăn “amâo jing yuôm ôh” leh anăn atăt kơ klei rai luč. Drei thâo kral mâo lu mta klei jing yuôm hĭn leh anăn mâo ênoh hĭn kơ ngăn drăp, jing klei amâo dưi mă tŭ hŏng ngăn drăp ôh. Klei yuôm bhăn leh anăn mâo ênoh hĭn ƀiădah klei mdrŏng sah leh anăn ngăn drăp amâo dưi blei ôh, anăn jing klei hdĭp, klei hdĭp sĭt êjai dôk hdĭp ti lăn ala leh anăn klei hdĭp hlăm ênuk hlŏng lar. Tơdah lač kơ phung mluk, mtao Y-Salômôn lač kơ “Dŏ ngăn” kyuadah knŏng sa mta mnơ̆ng anăn yơh phung mluk yap mâo ênoh yuôm hĭn leh anăn jing klei diñu tui tiŏ, ƀiădah tơdah lač kơ phung thâo mĭn, mtao lač kơ klei hdĭp, kyuadah knŏng phung thâo mĭn kơh dưi thâo săng ya klei jing yuôm hĭn kơ klei hdĭp mnuih (Y-Markôs 8:36; Y-Luk 12:15). Akâo Khua Yang brei drei đăo kjăp kơ Pô kpă ênô leh anăn klei khăp.
Si klei drei bi knal leh klei mtô anei?
Wah lač: Ơ Khua Yang, pŏk mblang ală kâo čiăng kơ kâo thâo ƀuh jih klei yuôm bhăn myang hlăm Ih, leh anăn tui duah ênoh yuôm anăn čiăng kơ kâo dưi hdĭp leh anăn hdĭp hlŏng lar. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Apđia
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
