Tơdrong Pơđơ̆k 10:4-5
“Bu băt mong ‘măn lê̆ lăm bơyan phang noh boih bơngai kon drŏ-nglo gơh hơgei; Mă-lei đei bơngai kon drŏ-nglo ayơ tep bơyan kĕch pŭ iŏk tơdrong mơlâu.” (Tơdrong Pơđơ̆k 10:5)
Nơ̆r jet tơchĕng pơwao:
– Pơtao Sôlômôn đei chih roi lăm lu bơngai hơgei păng bơngai kơtul lu tơdrong ayơ?
– Lu tơdrong ‘nâu đei gĭt kiơ?
– Lu bơ̆n yua iŏk ‘bai pơhrăm ‘nâu lăm chăl arih thoi yơ?
Pơtao Sôlômôn pơih blŭng a pơma lăm chăl 10 hla bơar Tơdrong Pơđơ̆k đei chih roi hơ’mon hnam dơnŏ noh bơih anih mĕ ‘bă arih hli yom kơ Kră Yang păng bơtho tơ’bôh kơ kon hơ’lơ̆p nơ̆r Kră Yang, păng kư̆m anih kon hơ’lơ̆p chu yom nơ̆r Kră Yang păng nơ̆r mĕ ‘bă. Lăm anih hnam dơnŏ noh, rim ‘nu athei pơ’lơ̆ng yak năm trong tơpăt kơplah oei arih păng jang sa (Tơdrong Pơđơ̆k 10:1-3). Păng lăm âu, pơtao pơma hăm jơhngơ̆m tơdrong jang kơ minh ‘nu bơngai hơgei. ‘Bar nơ̆r pơđơ̆k năr âu tơbăt tơdrong ưh kơ trŏ kơ tơdrong jang ayơ gĭt hloh kơ tơdrong jang ayơ, mălei jơhngơ̆m kơplah jang tơdrong noh, bơngai kơtul alah păng hŭt jơ năr, na bơngai hơgei pơnam păng chĕp kơjăp hloi.
Lăm âu bơ̆n ‘bôh tơdrong ‘Bok Kei-Dei wei lăng păng tơgŭm kơ bơngai hơgei ưh kơ achăng tŭk tơdrong jang kơdih. Gah ‘Bok Kei-Dei, Sư “ưh kơ lê̆ ôh lu bơngai tơpăt pơngot rơwĕt” (trong 3a), gah kon bơngai, athei pơnam păng đei tơdrong dan hơmet wă jang keh mă Kră Yang đei ăn (trong 4b-5a). ‘Nâu bơih tơdrong hơgăt gah bơhngol gĭt kăl wă kơ minh ‘nu bơngai hli yom kơ Kră Yang băt Kră Yang ‘Bok Kei-Dei ling lang wei păng băt bơnê kơ Sư, păng đei pơm tơwih kiơ̆ kơ jơhngơ̆m adrin kơdih (I Kôrintô 15:10; II Pêtrôs 1:3-7).
Hloh kơ noh dơ̆ng, ‘bar nơ̆r pơđơ̆k âu đei tơbăt bơngai alah ưh kơ trŏ khan ưh kơ jang kiơ hloi mălei sư ưh kơ adrin đĭ jơhngơ̆m lăm tơdrong jang đei pơjao păng yua iŏk jơ năr. Bơngai kơtul ưh kơ sĭ “tep” mălei tơ’bôh minh ‘nu bơngai “Alah” kơ jang (trong 4a). Dang ei, lu bơ̆n bơngai alah dah bơ̆n ưh kơ adrin đĭ jơhngơ̆m lăm tơdrong jang Kră Yang đei pơjao.
‘Bok Pôl đei tơ’blŏk: “Bơ̆n athei adrin pơm ‘lơ̆ng hăm adrin ră-roi kơ đe tơdrong Yêsu Krist yua kơ dang ei đei lơ bơngai kơnê̆ tơpă.” (Êphêsô 5:16). “Athei pơm ‘lơ̆ng” wă khan thoi âu dơ̆ng “athei huai iŏk” dah “adrin tôch bơneh” jơ năr bơ̆n kiơ̆ kơ chăl noh sơ̆ Pôl bơtho kơ bơ̆n arih mă hơgei, băt yua iŏk jơ năr păng jơ năr bơ̆n oei arih. Tơdrong hơgei ‘nâu đei pơting hăm tơdrong kơtul. Bơngai kơtul arih kiơ̆ kơdih, bơngai hơgei arih yua kơ Kră Yang. Mưh băt tơdrong ‘nâu lu bơ̆n athei tơplih păng kơchăng lăm tơdrong arih thoi yơ wă pơyua kơ Kră Yang. Athei pơnam, adrin yua iŏk jơ năr đơ̆ng Kră Yang ăn păng pơyơ̆r akâu jăn lăm tơdrong jang Kră Yang “Đei lơ bơngai kơnê̆ tơpă” bơ̆n oei arih tơ ala teh âu rai lơ tơdrong kơnê̆ păng rai răm, thoi noh na lu bơ̆n athei đĭ jơhngơ̆m ră roi Tơdrong ‘Nao ‘Lơ̆ng, arih băt ‘mêm mơnat, pơih să dêh char ‘Bok Kei-Dei tơ ala teh âu.
Ơ Kră Yang, inh bơnê kơ Ih yua kơ tơdrong Dŏng pơklaih păng tơdrong pŭn hiôk mă Ih ăn kơ inh. Inh pơkă arih jang pơnam, adrin hơmet păng yua iŏk mă dôm tơdrong Kră Yang ăn đei yua kơ Kră Yang. Krao khan yua anăn Kră Yang Yêsu Krist, Amen.
‘Bai pơhrăm đei tơ’blŏk ăn kơ bơ̆n kăl kơ tơplih lu tơdrong ayơ lăm chăl arih?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 76-77
Kênh Youtube BHKTHN:
