Hơriso 103:6-18
“Thoi ‘bă ‘mêm kơ kon hơ’lơ̆p sư dang yơ. Kră Yang ‘mêm kơ lu bơngai bu mă hli yom kơ Sư dang noh mơ̆n.” (Hơriso 103:13)
Nơ̆r jet tơchĕng pơwao:
– Pơtao Đawit ưang kơ tơdrong ‘mêm Kră Yang thoi yơ?
– Sư tơbăt tơdrong ‘mêm mơnat Kră Yang thoi yơ?
– Bơ̆n kăl kơ pơm kiơ wă iŏk tơdrong ‘mêm mơnat Kră Yang?
“’Mêm mơnat” jơ̆ minh nơ̆r roi gah jơhngơ̆m iơ̆m dim păng tơdrong ‘mêm ‘Bok Kei-Dei, pơma hơđăl gah tơdrong Kră Yang ưh kơ phak kon bơngai mă trŏ kơ phak, mălei Sư mơnat dŏng pơklaih. Tơdrong ‘noh tơ’bôh tơdrong ‘mêm păng tơdrong Kră Yang bơ̆jang lăm tơdrong pơmat păng tơdrong yoch kon bơngai. Jơhngơ̆m ‘mêm mơnat Kră Yang noh tơ’bôh hơđăl lăm to jơhngơ̆m truh tơ pơm tơ’bôh hloi. Mă khan lơ wơ̆t kon bơngai pơm ưh kơ chu păng pơm yoch hăm Kră Yang, Sư kư̆m ưh kơ sek tơlang hloi ôh kiơ̆ kơ tơdrong lu bơ̆n gô iŏk. Tơplơ̆ dơ̆ng, Kră Yang ‘Bok Kei-Dei tơ’bôh jơhngơ̆m ‘mêm mơnat hăm bơ̆n hăm trong wơh Kon Pôm Sư jur tơ ala teh đak wă lôch tang tơdrong yoch bơ̆n (Rôm 8:5-8). Lăm chăl nơ̆r ‘Bok Kei-Dei ‘nâu Pơtao Đawit ưang kơ Kră Yang ‘mêm păng tơdrong Sư mơnat ling lang hăm kon bơngai. Đei roi kơ Sư bơih Tơ’ngla “Kră Yang đei tơdrong ‘mêm mơnat. Huay ‘bônh kơ blĕk păng ‘bĕnh kơ tơdrong ‘mêm.” (trong 8). Pơtao tơ’blŏk ming dôm tơdrong ‘Bok Kei-Dei đei pơm hăm kon pơlei Isơrael. Sư tơ’bôh kơ ‘bok Môis păng kon pơlei Sư băt dôm tơdrong jang Sư (trong 6-7). Mă lu sư blah găn Kră Yang, mălei tơdah lu sư tơbral, Sư oei mơnat păng hơmet lu sư.
Pơtao Đawit tơbăt: “Sư huay pơm kơ lu bơ̆n kiơ̆ thoi yoch lu bơ̆n ôh; Kŭm ưh kơ hil ‘mong kiơ̆ kơ tơdrong kơnê̆ lu bơ̆n pơm boih.” (trong 10). ‘Nâu bơih tơdrong pơlung tih ăn kơ kon pơlei Sư. Dah Kră Yang ưh kơ mơnat lei na ưh kơ đei bu gơh kĕ dơ̆ng ‘bơ̆t tơdrong tơpăt Sư. Jơhngơ̆m ‘mêm mơnat Kră Yang noh minh tơdrong pŭn hiôk tih dêh tơpă, ưh kơ sĭ ‘bơ̆t jơ mă gơh klaih na kư̆m đĭ chăl arih bơngai lui hloi. Lăm trong 13, Kră Yang ‘Bok Kei-Dei yua iŏk rup pơtih gia ‘bă hăm kon wă tơ’bôh jơhngơ̆m ‘mêm mơnat Sư. Hăm lơ bơngai, tơdrong pơting ‘nâu dang ei hloi hơtŭt ‘bơm jơhngơ̆m yua kơ mưh bơ̆n lăng ming, mă lơ dah tŏ sĕt đei mĕ ‘bă tơ’bôh jơhngơ̆m ‘mêm ‘brơ̆k kơplah lăng ming tơdrong arih gah bơhngol, lu bơngai mă băt hli yom kơ Kră Yang đei mơn tơdrong ‘mêm mơnat Kră Yang đơ̆ng tơdrong ‘nâu truh tơdrong to.
Tuch luch, bơngai chih hla bơar khan hơđăl Kră Yang băt kơ bơ̆n ‘bônh kơ rơdu yua kơ đei man hăm ‘mui teh (trong 14). Đơ̆ng noh, bơ̆n kăl kơ gơnang kơ Tơ’ngla pơjing bơ̆n jơ̆ Tơ’ngla mơsêh, ‘bĕnh tơdrong ‘mêm păng băt mơnat. Kră Yang ‘Bok Kei-Dei ling lang wei nơ̆r Sư pơkă. Kră Yang gô mơnat ling lang kơ bơngai mă hli yom kơ Sư, tơdrong iơ̆m dim Sư oei oei ling lang kơ lu bơngai ‘noh (trong 13, 17). Rim ‘nu kơ bơ̆n athei kơdâu tơ Kră Yang, apinh Kră Yang mơnat kơ lu bơngai rơdu, ưh kơ pran, dah mă ‘bơ̆t jơ mă bơ̆n hiơt bơnê kơ Kră Yang. Wă kơ gơh iŏk tơdrong mơnat Kră Yang ăn.
Kơkuh kơ Ih Kră Yang, inh bơnê kơ Ih yua kơ tơdrong ‘mêm Ih tih dêh lăm chăl arih inh. Apinh Kră Yang tơgŭm inh arih hli yom kơ Ih wă kơ inh gơh iŏk tơdrong mơnat đơ̆ng Ih ‘măn kơ inh, krao khan yua anăn Kră Yang Yêsu Krist, Amen.
Bơ̆n hăm hlôi mơn tơdrong ‘mêm mơnat Kră Yang ăn kơ bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 7
Kênh Youtube BHKTHN:
