Klei Aê Diê Blŭ: Klei Bi Hriêng 10:4-5
Êlan kliăng: “Sa čô anak êkei mkăm pioh êjai yan bhang jing thâo mĭn, ƀiădah sa čô anak êkei pĭt êjai yan puôt brei klei hêñ.” (Klei Bi Hriêng 10:5)
Klei êmuh ksiêm mĭn: Mtao Y-Salômôn lač kơ ya knuih pô thâo mĭn leh anăn pô alah? Si mblang kơ knuih anei? Si drei mă yua klei hriăm anei hlăm klei hdĭp?
Mtao Y-Salômôn kčưm dơ̆ng kdrêč 10 hdruôm hră Klei Bi Hriêng hŏng klei lač kơ gŏ sang, jing anôk kơ phung amĭ ama hdĭp huĭ mpŭ kơ Aê Diê leh anăn mtô bi hriăm phung anak Klei Aê Diê Blŭ, leh anăn wăt jing anôk kơ phung anak đup gưt kơ klei myang Klei Aê Diê Blŭ leh anăn kơ amĭ ama. Hlăm kdrŭn anôk gŏ sang anăn, brei grăp čô răng čhuang êbat hlăm êlan kpă ênô, êjai duah ƀơ̆ng leh anăn mă bruă (Klei Bi Hriêng 10:1-3). Leh anăn tinei yơh, mtao lač kơ knuih sa čô thâo mĭn hŏng bruă ñu mă. Dua êlan Klei Bi Hriêng hruê anei brei ƀuh mta yuôm, amâo djŏ ôh bruă anei jing yuôm hĭn kơ bruă adih, ƀiădah knuih êjai ngă bruă anăn: Pô mluk alah mă bruă leh anăn bi luč lu mmông găl, bi pô thâo mĭn kriăng mă bruă leh anăn thâo yua jăk jih mmông găl.
Tinei, drei ƀuh klei Aê Diê uêñ dlăng ba leh anăn thiê brei kơ pô thâo mĭn amâo lui ôh bruă klam ñu pô. Tĭng kơ Aê Diê, Ñu “amâo brei ôh phung kpă ênô ư̆ êpa” (êlan 3a), bi tĭng kơ anak mnuih, brei kriăng leh anăn mâo hdră mkra čiăng dưi bi leh jih mmông găl Khua Yang brei (êlan 4b-5a). anei jing sa êlan hdră myang yuôm čiăng kơ sa čô mnuih huĭ mpŭ kơ Aê Diê thâo ƀuh nanao klei Aê Diê răng kriê jăk siam leh anăn thâo hdơr knga kơ Ñu, mbĭt anăn wĭt lač hŏng klei gĭr mă bruă jih ai tiê pô (I Kôrantô 15:10; II Y-Pêtrôs 1:3-7).
Hĭn mơh, dua êlan Klei Bi Hriêng anei brei ƀuh pô alah jing pô amâo djŏ knŏng amâo mă bruă ôh, ƀiădah wăt amâo gĭr jih ai tiê ngă bruă jao kơ pô leh anăn bi luč mmông găl. Pô mluk amâo knŏng “pĭt” (êlan 5b) ƀiădah wăt jing pô “alah” mă bruă mơh (êlan 4a). Hruê anei, drei jing pô alah tơdah lui hĕ amâodah amâo ngă hŏng jih ai tiê bruă Khua Yang jao.
Khua ƀĭng kna Y-Pôl mñă: “Yua hruê diih bi jăk, kyuadah ênuk anei jing jhat” (Êphêsô 5:16). “Yua hruê diih bi jăk” ăt mblang jing “lŏ mă wĭt” amâodah “yua jih hnơ̆ng” hruê mmông drei mâo. Hlue si boh klei dôk găn, khua ƀĭng kna Y-Pôl mtă mtăn kơ drei brei dôk hdĭp thâo mĭn, thâo kral hruê mmông amâodah ênuk drei dôk hdĭp. Klei thâo mĭn anei ba bi mkă hŏng klei mluk. Pô mluk dôk hdĭp kyua kơ ñu pô, pô thâo mĭn hdĭp kơ Khua Yang leh anăn kyua Khua Yang. Tơdah thâo săng leh klei anei, brei drei bi mlih leh anăn răng kơ knhuah dôk hdĭp čiăng dưi ba klei tŭ dưn kơ Khua Yang. Brei kriăng mă bruă, gĭr yua jih mmông găl Khua Yang brei, pioh hriăm čiăng thâo leh anăn myơr asei mlei kơ bruă Ñu “kyuadah ênuk anei jing jhat”. Ala ƀuôn drei dôk hdĭp ară anei ƀrư̆ hruê jhat kjham hĭn êjai, kyuanăn brei jih ai tiê hiu hưn Klei Mrâo Mrang Jăk, dôk hdĭp thâo bi khăp, pŏk prŏng Ƀuôn Ala Mtao Aê Diê ti lăn.
Klei hriăm mñă kơ drei, ya kdrêč hlăm klei hdĭp drei čiăng mâo klei bi mlih?
Wah lač: Ơ Khua Yang, bi mni lač jăk kơ Khua Yang kyua klei pap Ih bi mtlaih leh anăn jih jang klei jăk jĭn myang Khua Yang brei kơ kâo. Kâo ƀuăn rơ̆ng dôk hdĭp hŏng klei kriăng, gĭr mprăp leh anăn yua bi jăk jih jang klei Khua Yang brei hŏng klei tŭ dưn kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 76-77
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
