Klei Aê Diê Blŭ: Klei Bi Hriêng 21:3-15
Êlan kliăng: “Ngă klei kpă ênô leh anăn klei djŏ jing klei Yêhôwa mơak lu hĭn kơ mnơ̆ng ngă yang” (Klei Bi Hriêng 21:3)
Klei êmuh ksiêm mĭn: Ya klei Khua Yang čiăng kơ klei hdĭp phung anak ƀuôn sang Ñu bi êdah? Si pô čih hưn mdah klei jing phung ƀai leh anăn phung kpă ênô? Si knhuah hdĭp kpă ênô leh anăn djŏ drei dôk hdĭp?
Drei khăng bi msĕ jih jang bruă bhiăn klei đăo msĕ si klei nao bi kƀĭn hlăm sang kkuh mpŭ, klei myơr, amâodah mă bruă… hŏng klei huĭ mpŭ kơ Khua Yang. Jih jang bruă anei brei ngă sơăi tơdah phung đăo kơ Krist mâo knhuah hdĭp huĭ mpŭ. Ƀiădah lĕ, hlăm trăn Klei Aê Diê Blŭ anei, sa čô mtao thâo mĭn Y-Salômôn mñă brei drei hdơr snei: Aê Diê yap yuôm hĭn knuih jing drei hŏng klei ngă bruă hdră bhiăn klei đăo (êlan 3). Aê Diê hmăng hmưi klei hdĭp phung anak ƀuôn sang Ñu bi êdah klei kpă ênô leh anăn klei djŏ Ñu. Khua pô hưn êlâo Y-Mika pô, ăt brei thâo snei mơh: “leh anăn ya klei Yêhôwa mtă brei ih ngă. Jing klei ngă klei kpă leh anăn khăp klei pap, leh anăn êbat mbĭt hŏng Aê Diê ih hŏng klei luă gŭ.” (Y-Mika 6:8). Sĭt snăn êdi, Khua Yang čiăng kơ klei hdĭp drei bi êdah nanao ai tiê leh anăn knuih Ñu jing. Klei bi mơak kơ Khua Yang amâo djŏ knŏng ngă bruă kkuh mpŭ ti êngao ôh, ƀiădah brei mâo knhuah dôk hdĭp kpă ênuah, hdĭp jăk leh anăn ngă klei djŏ (êlan 3).
Mtao Y-Salômôn hưn êlâo brei răng kơ “ai tiê mgao”, jih jang hdră mnêč jêč ruăt leh anăn klei tŭ dưn amâo djŏ. Knŏng klei kpă ênô leh anăn klei luă gŭ ba wĭt klei mưn sui dlông, êjai anăn êlan wê leh anăn klei krưh mgao srăng atăt kơ klei rai luč (êlan 4-6). Dŭm êlan tui čuê hưn mdah kơ êlan phung ƀai, phung kƀah klei thâo pap (êlan 7-10). Klei brei ƀuh, bruă kngan drei ngă bi êdah klei tluh čiăng hlăm lam. Tơdah drei čiêm rông klei soh, ti knhal tuč klei soh srăng ktư̆. Tơdah drei tui tiŏ Khua Yang, klei hdĭp drei srăng bi êdah “klei kpă ênô leh anăn klei djŏ” Ñu. Lŏ čuê, pô čih brei thâo, mnuih thâo mĭn hriăm mơ̆ng klei arăng mtô bi hriăm, bi phung mluk bi kdơ̆ng (êlan 11). Ñu kñăm, Aê Diê pô yơh jing Pô kpă ênô srăng phat kđi phung ƀai (êlan 12). Êlan 13 kñăm kơ klei thâo pap kơ mnuih ƀun ƀin knap mñai. Drei thâo Khua Yang uêñ mĭn kơ phung ƀun ƀin leh anăn Ñu mtă brei drei mâo ai tiê thâo pap kơ digơ̆ (Klei Mmuñ Hđăp 41:1; Klei Bi Hriêng 19:17). Ti knhal tuč, êlan 15 hưn mdah sa klei sĭt nik ktang kjăp snei: “Tơdah arăng ngă klei djŏ phung kpă ênô hơ̆k mơak, ƀiădah phung ngă jhat srăng mâo klei huĭ snăk.”. Klei djŏ amâo knŏng jing bruă hlăm ala ƀuôn, ƀiădah wăt jing sa hdră êlan klei hdĭp myang msĕ mơh. Tơdah ngă klei djŏ Khua Yang, srăng ba hriê klei mơak leh anăn klei êđăp ênang kơ phung kpă ênô, ƀiădah srăng jing klei huĭ hyưt kơ phung bi kdơ̆ng.
Drei dôk hdĭp hlăm ala ƀuôn bŏ hŏng klei amâo mtăp mđơr leh anăn kƀah klei ênuah. Kyuanăn, čiăng dưi djă pioh knhuah hdĭp kpă ênô ti anăp Khua Yang, brei drei knang kơ klei pap Khua Yang čiăng kơ Khua Yang bi mlih drei kluôm dhuôm leh anăn mđĭ thiăm klei đăo drei čiăng kơ drei dưi dôk kjăp ti dlông klei sĭt nik Klei Aê Diê Blŭ.
Tơdah tuôm hŏng klei dleh kyua dôk hdĭp kpă ênô, si drei srăng ngă?
Wah lač: Ơ Khua Yang, bi mni lač jăk kơ Khua Yang jing Pô kpă ênô khut khat. Akâo Khua Yang mñă kơ kâo êlan hdră kpă ênô Ih leh anăn đru kâo dôk hdĭp kpă ênô hlăm ală Khua Yang wăt ti anăp jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
