Tơdrong Pơđơ̆k 10:2-3
“Mŭk tơmam đei đơ̆ng pơm kư̆ kă ưh kơ yua kiơ; Mă-lei đei tơdrong tơpăt gơh klaih đơ̆ng lôch.” (Tơdrong Pơđơ̆k 10:2)
Nơ̆r jet tơchĕng pơwao:
– Pơtao Sôlômôn bơtho thoi yơ wă khan hơgei, thoi yơ khan bơngai kơtul?
– Yua kơ kiơ todrong bơtho ‘nâu ưh kơ trŏ lăm tơdrong tơpă?
– Tơdrong kiơ gĭt hloh kơ tơdrong mơdrŏng păng mŭk tơmam?
Pơtao Sôlômôn đei chih roi “tơmam” wă khan mơdrŏng, đei mŭk tơmam. Kiơ̆ kơ trong 2, tơdrong pơm kư̆ kă dah gơh hơgei ưh kơ trŏ khan pơkeh đơ̆ng mŭk tơmam bơ̆n đei mălei bơ̆n gơh mơdrŏng noh yua kơ đơ̆ng: “pơm kư̆ kă” dah “pơm tơpăt”. Yua kơ Kră Yang ‘Bok Kei-Dei pơgơ̆r, Sư ‘bôh đĭ dôm tơdrong kon bơngai pơm păng Sư pơm pơkeh dôm tơdrong kon bơngai yua iŏk (trong 3). Lăng ‘bôh bơngai tơpăt pŭ iŏk pơmat yua kơ ưh kơ đei kiơ, mălei tơdrong mă bơngai tơpăt đei noh Kră Yang wei lăng păng tơgŭm tơmam tôm mah (Hơriso 37:25). Lăm noh lu bơngai pơm kư̆ kă sư kư̆m ưh kơ đei yua iŏk tơdrong kiơ mă lu sư lăp đon yua kơ Kră Yang pơdrâu iŏk đĭ đăng lu sư. ‘Bok Kei-Dei wei pơgơ̆r tôm tơdrong. Kră Yang bơih thoi dur pơlei kơjăp kơ bơngai ‘lơ̆ng tơpăt, ‘maih wă tơpă pơm kơ Kră Yang lăp đon păng chu kơ Sư tôm tơdrong. Mălei Kră Yang gơh pơrăm lê̆ tơdrong tơchĕng lu bơngai kơnê̆ pơgăn lu bơngai pơrơ̆ng pơrăm tơdrong Kră Yang dan hơmet.
Tơdrong bơtho ‘nâu phŏ lăng nhen ưh kơ trŏ, kơplah lơ bơngai lui tơ dêh Sudan pơngot rơwĕt, bơngai hli yom kơ Kră Yang đei pơngot rơwĕt, na kơplah lăm lu bơngai hơlĕnh, pơdăr rai mơdrŏng! Tơpă nơ̆r bơtho ‘nâu ling lang trŏ kơplah lu bơ̆n lăng tơ hơdah ‘Bok Krist păng lăng tơ chăl arih ling lang. Phŏ lu tơdrỏng ‘nâu ưh kơ đei hloi dang ei, mălei TUCH LUCH sư gô trŏ. Bơngai chih hla bơar Hơriso 73:16-17 pơma khan: “Mưh inh tơchĕng wă kơ băt đĭ tơdrong noh, lei gleh dêh kơ inh. Ding truh tơ inh mơ̆t lăm anih rơgoh Kră Yang ‘Bok Kei-Dei, Lei inh băt gah năr tôch lu sư.”
Tơdrong mă ‘bar, yua kơ đei lu tơdrong gĭt hloh noh, tơdrong mơdrŏng đei ‘bôh păng mŭk tơmam (trong 2). Pơtao Sôlômôn tơbăt lu bơngai pơm kư̆ kă đei “tơmam” na lu bơngai tơpăt ưh kơ đei pơma ‘bơm kiơ gah “tơmam” hloi! Thoi noh, tơdrong mơdrŏng ưh kơ trŏ khan đơ̆ng ‘Bok Kei-Dei ăn, yua kơ mơdrŏng noh đei đơ̆ng pơm “kư̆ kă” lei na “ưh kơ yua kiơ” păng gô năm tơ hiong răm. Bơ̆n băt kơnăl dôm tơdrong gĭt păng gĭt kăl hloh mŭk tơmam, dôm tơmam bơ̆n ưh kơ gơh kơ yua wă kơ gơh đei. Tơdrong gĭt kăl păng gĭt hloh noh tơdrong mơdrŏng đei ‘bôh păng mŭk tơmam ưh gơh răt tơdrong arih, tơdrong arih tơpă kơplah oei arih lăm chăl âu păng chăl arih đơ̆ng rŏng. Kơplah pơma kơ lu bơngai pơm kư̆ kăn lei pơtao Sôlômôn đei chih roi “tơmam” yua kơ noh tơmam gĭt lu bơngai pơm kư̆ kă lu sư lăng gĭt păng druh kiơ̆ tơmam noh, mălei pơma kơ lu bơngai hơgei lei pơtao đei chih roi gah tơdrong arih, yua kơ đei lu bơngai pơm ‘lơ̆ng đĕch hlôh ayơ mă tơdrong gĭt hloh kơ bơngai nai (Markôs 8:36; Luka 1215). Apinh Kră Yang ăn kơ bơ̆n lui kơjăp lăm ‘Bok Krist tơpăt păng ‘mêm mơnat.
Ơ Kră Yang, apinh Ih pơih măt inh lăng ‘bôh dôm tơdrong gĭt kăl gah bơhngol lăm Ih păng chơ chă tơdrong gĭt noh wă kơ gơh arih ling lang. Krao khan yua anăn Kră Yang Yêsu Krist, Amen.
Lu bơ̆n ‘bôh mơn tơdrong bơtho ‘nâu thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Ôbadia
Kênh Youtube BHKTHN:
