I Pêtrôs 4:10-11
“’Bok Kei-Dei ăn kơ lu bơngai lui bơ̆n tôm tơdrong hơgei pha ra, na bơ̆n athei jang kiơ̆ kơ Sư ăn kơ bơ̆n hơgei noh, wă kơ bơ̆n gơh tơgŭm băl.” (I Pêtrôs 4:10)
Nơ̆r jet tơchĕng pơwao:
– Bơngai tơ năp jang kiơ̆ kơ Kră Yang ăn wă pơm kiơ?
– Bơngai ‘noh kăl kơ tơ’bôh Sư tơnăp, đei jơhngơ̆m awih awăn păng kơnhăm gĭt kăl hloh liơ?
– Lu bơ̆n jing bơngai jang kơ Kră Yang tơnăp kiơ̆ thoi Sư thoi yơ?
Kră Yang ‘Bok Kei-Dei ăn kơ lu bơngai lui bơ̆n hơgei phara kiơ̆ thoi Sư ăn, ưh kơ đei bu khan ưh kơ đei. Tơdrong Kră Yang mơnat ăn kơ bơ̆n ‘noh Sư ưh kơ wă kơ bơ̆n wei kơ bơ̆n kơdih dah mă jang kiơ̆ mơ̆ng kơ bơ̆n wă. Mălei Nơ̆r Kră Yang bơtho, “’Bok Kei-Dei ăn kơ lu bơngai lui bơ̆n tôm tơdrong hơgei pha ra, na bơ̆n athei jang kiơ̆ kơ Sư ăn kơ bơ̆n hơgei noh, wă kơ bơ̆n gơh tơgŭm băl.” (trong 10). Rim ‘nu bơngai lui kăl kơ tơdrong hơdah Kră Yang pơchrang ăn hăm Yang Bơhngol ‘Lơ̆ng păng đơ̆ng bơngai lui wơ̆ pran tơgŭm dih băl wă kơ bơ̆n gơh tơgŭm bơngai nai dơ̆ng, pơjing tơiung băl, wang pơih Dêh Char Kră Yang tơ anih Kră Yang pơjao kơ bơ̆n.
Bơngai jang tơnăp kiơ̆ thoi Kră Yang athei đei jơhngơ̆m tơnăp, adrin tơpă, đĭ jơhngơ̆m lăm tôm tơdrong Kră Yang pơjao. Kră Yang ‘Bok Kei-Dei ăn kơ bơngai lui bơ̆n tôm tơdrong hơgei phara. ‘Bơ̆t anăp Kră Yang, bơngai bơtho Nơ̆r Kră Yang kư̆m gĭt kăl lei lăi thoi bơngai bơ̆jang tơdrong nai. Kră Yang ưh kơ lăng tơdrong jang tih dah iĕ, tơdrong jang ‘bôh rơđah dah mă lăm hlơp mălei Kră Yang lăng ‘bôh lu bơngai jang đei jơhngơ̆m tơnăp dah mă ưh kơ tơnăp. Yua kơ thoi noh, dah wă pơtơm bơ̆jang tôm tơdrong ling lang đei jơhngơ̆m gơnang kơ jơhngơ̆m pran Kră Yang na đĭ jơhngơ̆m jang, đĭ jơhngơ̆m pran: “Dah Sư ăn kơ bơ̆n hơgei bơtho đe tơdrong Sư, bơ̆n athei adrin bơtho tơbăt kơ đe tơdrong Sư tơpă. Dah Sư ăn kơ bơ̆n hơgei gah tơdrong tơgŭm đe, bơ̆n athei gơnang kơ Sư tơpă, na bơ̆n gơh jang tơdrong tơgŭm đe. Thoi noh na đe băt kơ tơdrong jang bơ̆n, na ư-ang ‘Bok Kei-Dei păng đe gô băt kơ bơ̆n đơ̆ng Yêsu Krist tơgŭm…” (trong 11).
Bơngai jang kơ Kră Yang tơnăp ưh minh puăt, chă pơtrŏ, wă kơ jah đang đĕch, wer kơ tơdrong trăp chă wă kơ hiơch đĕch. Mălei pơtơm bơ̆jang hăm tơdrong krao khan, apinh Kră Yang ăn tơdrong gơh hơgei wă kơ đei dan tơdă lê̆ adrol păng hơmet pơ’lơ̆ng wă kơ tơdrong jang gơh keh ‘lơ̆ng tơdrong Kră Yang pơjao. Kăl kơ ‘blŏk Kră Yang Tơ’ngla lăng ‘bôh tôm tơdrong păng băt đĭ tơdrong jang lu bơ̆n oei jang ưh kơ trŏ kơ thoi kon bơngai. Păng tơdrong Kră Yang kơnhăm gĭt kăl hloh ‘noh Sư wă kơ bơngai jang tơnăp kiơ̆ thoi Sư noh lu bơngai bơtho Nơ̆r Kră Yang, dôm tơdrong jang awih awăn ưh kơ trŏ wă kơ kon bơngai ưang kơ bơ̆n “Thoi noh na đe băt kơ tơdrong jang bơ̆n, na ư-ang ‘Bok Kei-Dei păng đe gô băt kơ bơ̆n đơ̆ng Yêsu Krist tơgŭm…” (trong 11).
Kră Yang ăn kơ bơ̆n gơh hơgei wă kơ bơ̆n awih awăn, tơgŭm dih băl đon lui wă kơ pran wơ̆, pơjing Khul Bơngai Lui pran wơ̆ kơjăp lăm teh đak, păng adrol hloh kơ lăm tôm tơdrong wă ưang kơ Anăn Kră Yang. Apinh ‘nĕ kơ pơting băl bu hloh bu lŭch mălei athei apinh Kră Yang ăn kơ bơ̆n jing bơngai jang tơnăp kiơ̆ thoi Kră Yang pơtơm jang đơ̆ng tơdrong jang iĕ hloh. Ling lang tơ’bôh jơhngơ̆m chơt hiôk, đei jơhngơ̆m pran đơ̆ng Kră Yang ăn, lăm rim tơdrong jang, păng jang tơdrong kiơ kư̆m đĭ jơhngơ̆m jang thoi jang kơ Kră Yang mă khan jang tơgŭm băl tơdŭa bơ̆n (Kôlôssê 3:23). Hăm kư̆m kăl, chih răk nơ̆r Kră Yang bơtho thoi lăm kơthơ Philip 4:13: “Inh kĕ iŏk dôm tơdrong ‘noh yua kơ inh gơnang kơ Yêsu Krist na Sư ăn kơ inh kĕ iŏk dôm tơdrong ‘noh. Tơ̆ng ưh, inh ưh kơ kĕ ôh.”.
Ơ Kră Yang, inh bơnê kơ Ih yua kơ Ih ăn kơ inh dôm tơdrong gơh hơgei gah bơhngol. Apinh Yang Bơhngol ‘Lơ̆ng tơgum inh wă kơ inh jang keh dôm tơdrong jang mă Ih đei pơjao wă kơ Anăn Kră Yang gơh ưang đơ̆ng tơdrong arih inh bơ̆jang tơnăp kiơ̆ thoi Ih. Krao khan yua anăn Kră Yang Yêsu Krist, Amen.
Lu bơ̆n tam đĭ jơhngơ̆m awih awăn bơ̆jang kơ Kră Yang tơnăp kiơ̆ thoi Sư ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 19
Kênh Youtube BHKTHN:
