Klei Aê Diê Blŭ: Y‑Mathiơ 19:1-6
Êlan kliăng: “Snăn diñu amâo lŏ jing dua ôh, ƀiădah knŏng sa kđeh. Snăn đăm brei mnuih bi ktlah ôh ya mnơ̆ng Aê Diê bi mguôp leh mbĭt” (Y‑Mathiơ 19:6)
Klei êmuh ksiêm mĭn: Phung Pharisi nao leh anăn êmuh Khua Yang Yêsu kơ klei lui mô̆ kơ ya klei diñu kñăm čiăng? Si ngă Khua Yang Yêsu lŏ wĭt lač kơ phung Pharisi anei? Ya klei hriăm drei mâo kơ boh yuôm kơ klei bi dôk ung mô̆?
Y‑Mathiơ kdrêč 19 jing gru bi knăl kơ gưl mrâo hlăm bruă Khua Yang Yêsu ngă. Leh êbeh kơ dua thŭn mtô ti čar Galilê, ară anei Khua Yang dơ̆ng kčưm mă bruă ti krĭng čar Yuđa ti hang nah dih êa krông Yurdan. Mâo lu mnuih tui hlue Khua Yang, Ñu mtô leh anăn bi hlao klei ruă duam digơ̆ (êlan 1-2). Phung Pharisi hriê msĕ mơh čiăng lông dlăng Khua Yang hŏng sa klei êmuh dleh, “Bhiăn mơ̆ arăng lui mô̆ kyua djăp mta klei?” (êlan 3). Diñu čiăng bi lĕ Khua Yang čiăng Gơ̆ bi kdơ̆ng hŏng Y‑Môis, jing sa čô khua gĭt gai phung Israel mpŭ snăk.
Khua Yang Yêsu amâo wĭt lač klă dưi amâodah amâo dưi ôh, ƀiădah Ñu lŏ bi hdơr kơ phung Pharisi kơ klei Aê Diê čiăng tal êlâo tơdah Aê Diê mjing klei bi dôk ung mô̆. Tal sa, Aê Diê yơh mkŏ mjing klei bi dôk ung mô̆ knŏng kơ sa čô êkei leh anăn sa čô mniê, čiăng lač klei bi dôk ung mô̆ dôk kjăp nanao hlŏng lar. Tal dua, êkei “srăng bi mguôp hŏng mô̆ ñu” čiăng lač kơ klei bi mguôp sĭt suôr plah wah ung hŏng mô̆, amâo dưi bi ktlah ôh. Tal tlâo, dua čô diñu srăng jing “sa kđeh”, lač kơ klei bi myơr kluôm ênŭm hdơ̆ng ung mô̆, bi mguôp jing sa hlăm mngăt, ai tiê leh anăn asei mlei. Snăn yơh, tơdah drei djă pioh sa klei bi dôk ung mô̆ jăk siam leh anăn klă ênŭm tui si Klei Aê Diê Blŭ mtă, jing drei dôk bi guh kơang kơ Aê Diê Pô mkŏ mjing leh klei bi dôk ung mô̆ drei yơh. Khua Yang Yêsu bi klă sa klei sĭt nik kơ klei bi dôk ung mô̆ snei, “Snăn đăm brei mnuih” čiăng lač kơ jih jang mnuih, wăt ung amâodah mô̆ amâo dưi bi ktlah ôh klei bi dôk ung mô̆ Aê Diê bi mguôp leh mbĭt.
Phung mnuih ênuk anei amâo dlăng yuôm ôh kơ klei bi dôk ung mô̆, lu mnuih dlăng yuôm kơ bruă ngă čiăng bi hrăp klei kđeh čiăng si tô hmô klei hdĭp mbĭt msĕ si ung mô̆, bi dôk amâo mâo klei bi kuôl kă ôh, amâodah bi dôk êkei hdơ̆ng êkei, mniê hdơ̆ng mniê… atăt truh kơ klei tơdah khăp bi dôk, amâo lŏ khăp ôh bi lui, amâo mâo klei bi kă ôh. Ti krah lăn ala dlăng hơăi mang kơ klei bi dôk ung mô̆, phung đăo srăng knang hĭn kơ Khua Yang čiăng mpŭ kơ klei bi dôk ung mô̆ msĕ si Klei Aê Diê Blŭ mtă leh. Brei klei phung đăo kơ Krist bi dôk ung mô̆ jing klei bi mguôp plah wah sa čô êkei hŏng sa čô mniê, brei phung mŭt hlăm klei bi dôk ung mô̆ gưt kơ klei bi kuôl kă hlăm klei bi dôk ung mô̆ anăn jing dôk sĭt suôr, bi mguôp jing sa hlăm mngăt, ai tiê leh anăn asei mlei. Bruă klam kơ phung đăo jing hŏng gŏ sang pô hdĭp bi guh kơang kơ Khua Yang. Drei bi êdah boh yuôm kơ klei bi dôk ung mô̆ hŏng klei bi khăp sĭt suôr, mgaih mkra klei amâo bi djŏ hŏng êlan hdră jăk leh anăn đăm mâo klei mĭn čiăng bi lui ung mô̆ ôh.
Drei bi guh kơang kơ Khua Yang hŏng klei drei khăp leh anăn bi dôk ung mô̆ mơ̆?
Wah lač: Ơ Khua Yang, jing Pô mkŏ mjing klei bi dôk ung mô̆ kơ anak mnuih. Đru kâo hdĭp bi guh kơang kơ Ih hlăm klei kâo khăp leh anăn bi dôk ung mô̆. Đru gŏ sang kâo khăp kơ Ih leh anăn bi khăp hdơ̆ng ung mô̆ čiăng bi êdah boh yuôm kơ klei bi dôk ung mô̆ kơ lu mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
