Mathais 19:1-6
Nqe cim zaj kawm hais tias:
“Nkawd tsis yog ob leeg lawm, tiamsis yog ib leeg xwb. Vajtswv twb muab nkawd los txis ua txij ua nkawm lawm, yog li ntawd neeg tsis txhob muab nkawd cais.” (Mathais 19:6).
Lus nug rau sawvdaws xav:
– Lub homphiaj cov neeg Falixais tuaj nrhiav thiab nug Tswv Yexus txog qhov kev sib nrauj yog dabtsi?
– Tswv Yexus teb rau cov Falixais zoo li cas?
– Peb kawm tau dabtsi hais txog qhov uas muaj nqis ntawm kev sib yuav?
Mathais tshooj 19 hais txog ib ntu sijhawm tshiab hauv Tswv Yexus kev ua haujlwm. Tomqab uas qhia tau ob xyoos nyob rau cheebtsam Kalilais, nimno tus Tswv pib mus qhia cheebtsam Yudas, pib qhia ntawm dej Yauladees sab tid. Muaj ntau leej tuaj nrhiav Tswv Yexus, Nws qhia thiab kho lawv tej mob zoo (nqe 1-2). Cov neeg Falixais kuj tuaj sim Yexus, lawv nug tej lo lus nyuaj, “puas pub rau ib tug txivneej twg muab nws tus pojniam nrauj?” (nqe 3). Lub homphiaj yog lawv cuab lus ua kom Yexus ua txhaum tawm tsam Mauxes, tus neeg uas cov Yixalayees sawvdaws hwm.
Tswv Yexus tsis teb kiag lawv cov lus nug tau lossis tsis tau, tiamsis Nws qhia rau cov Falixais paub txog Vajtswv txojkev npaj thaum tsim muaj kev sib yuav. Thib ib, kev sib yuav yog Vajtswv rhawv tsim rau tus txivneej thiab tus pojniam, nov yog qhov muaj nqis ntawm txojkev sib yuav. Thib ob, tus txivneej “mus nrog” tus pojniam nyob, nov hais txog kev koom ua ke ntawm kev txijnkawm, muab cais tsis tau. Thib peb, ob leeg los koom ua “ib lub cev”, nov hais txog ib leeg fij lossis muab tus kheej txaus nkaus rau tus txijnkawm, uas yog koom kev ntseeg, kev xav, thiab koom cev. Yog li, thaum peb ua kom kev sib yuav zoo thiab txaus nkaus li Vajtswv Txojlus qhia, ces yog peb tabtom ua rau Vajtswv, tus uas txis txijnkawm rau peb lub npe tau qhuas. Tswv Yexus hais qhov tseeb ntawm txojkev sib yuav: Tagnrho “tibneeg”, txhais tau hais tias txhua tus neeg, tsis hais pojniam txivneej tsis muaj cai yuav muab cov neeg uas Vajtswv txis lawm cais lossis nrauj li.
Lub ntiajteb tamsim no tabtom saib kev sib yuav tsis muaj nqis, coob leej nyiam yuav ntau tus pojniam ntau tus txiv, lawv tsuas xav ua nkauj ua nraug txaus siab xws li nyob ua ke, pw ua ke ua ntej tsis tau sib yuav, lossis pojniam yuav pojniam, txivneej yuav txivneej… mus txog qhov uas nyiam ces yuav, thaum twg tsis nyiam ces tso tseg, tsis muaj ib qhov kevcai tswj. Nyob rau lub ntiajteb saib kev sib yuav tsis muaj nqis no, cov ntseeg Yexus hajyam yuav tsum vamkhom tus Tswv txoj koob hmoov saib kev sib yuav kom muaj nqis raws li Vajtswv Txojlus qhia. Kev sib yuav ntawm cov ntseeg yuav tsum yog ib tug txivneej yuav ib tug pojniam xwb, cov uas sib yuav yuav tsum ua raws nraim li txoj cai sib yuav uas yog ua ncaj ncees rau tus txijnkawm, koom kev ntseeg, kev xav thiab koom cev. Cov ntseeg feem xyuam yog ua neej kom Vajtswv lub npe tau qhuas dhau los ntawm yus tsevneeg. Peb qhia tawm qhov muaj nqis ntawm kev sib yuav uas yog nyob sib hlub, hais tej kev sib cav sib ceg mus rau qhov zoo kom tsis muaj kev tso lossis kev sib nrauj.
Thov Vajtswv,
Tus Tswv, Koj yog tus txis neeg muaj txijnkawm. Thov Koj pab kom nyuam yaus ua lub neej txijnkawm sib hlub rau Koj tau ntsejmuag. Nyuam yaus tsevneeg yuav hlub Koj thiab ib leeg hlub ib leeg, qhia tawm qhov muaj nqis ntawm kev sib yuav rau ntau leej pom. Nyuam yaus tuav Tswv Yexus lub npe thov, Amees.
Peb puas ua rau tus Tswv tau ntsejmuag dhau los ntawm peb kev ua txijnkawm thiab kev sib hlub lawm tau?
Nyeem Vajluskub hauv peb lub xyoo: I Xamuyees 16
Kênh Youtube BHKTHN:
