Klei Aê Diê Blŭ: Klei Mtô Mñă Klei Bhiăn 32:15-18
Êlan kliăng: “Hlăk anăn ñu lui wir Aê Diê pô mjing ñu leh, leh anăn mưč kơ Boh Tâo pô bi mtlaih ñu.” (Klei Mtô Mñă Klei Bhiăn 32:15b)
Klei êmuh ksiêm mĭn: Hlăm ti wưng phung ƀuôn sang Israel lui Aê Diê? Si klei Aê Diê ngêñ ti anăp klei soh jhat phung ƀuôn sang Ñu? Mơ̆ng klei ênguôt hnĭng phung ƀuôn sang Israel, ya klei mñă kơ drei?
Leh yăl dliê klei yuôm bhăn Aê Diê ngă leh kơ djuê ana Israel hlăm klei mmuñ pô, Y‑Môis hưn brei phung ƀuôn sang Aê Diê răng kơ klei čhal lač klei soh. Mphŭn kčưm êlan 15 jing klei čih kơ phung ƀuôn sang Israel jing hriê kơ prŏng leh anăn êmŏng leh dưn klei hdĭp djăp ênŭm ti Lăn Aê Diê Ƀuăn. Klei bi ƀuh kơ hlăk dôk hdĭp djăp ênŭm, êbeh dlai, phung ƀuôn sang srăng ƀrư̆ hdơr knga kơ Aê Diê hĭn leh anăn khăp kơ Ñu hĭn. Ƀiădah klei hdĭp mdrŏng sah anăn jing êlan atăt truh kơ hruê mmăt tĭt hĭn hlăm hƀuê ênuk phung ƀuôn sang Israel. Kyua tơdah djăp ênŭm leh, phung ƀuôn sang Aê Diê lŏ nao myơr mnơ̆ng ngă yang kơ yang jhat, nao kkuh kơ rup diñu ka tuôm thâo, jing rup hơăi mang phung aê diñu amâo tuôm huĭ ôh (êlan 17).
Amâo mâo ôh hlei pô thâo săng jih klei Aê Diê ngêñ jing si ngă tơdah ƀuh phung ƀuôn sang Ñu ngă leh klei soh jhat snăn. Tơl Y‑Môis yua leh klei blŭ msĕ si “mčhur”, “bi riêl ai” jing “đĭ ai” čiăng lač kơ klei Aê Diê ngêñ. Dưi lač, klei phung ƀuôn sang Israel ngă soh amâo djŏ jing amâo hdơr knga hŏng Aê Diê đuč ôh, ƀiădah klei soh prŏng hĭn jing diñu lui leh Aê Diê jing Pô hrih mjing leh diñu leh anăn bi mtlaih leh diñu mơ̆ng krĭng hlŭn čiăng jing sa djuê ana pioh hjăn kơ Aê Diê. Kyua klei hngah kơ phŭn agha, lui Pô sa anăn mâo klei myang răng mgang leh anăn kiă kriê diñu, ngă leh kơ hƀuê ênuk phung ƀuôn sang Israel êdei anăp bŏ hŏng êa ală leh anăn klei ênguôt hƀlŏk prŏng snăk.
Tơdah tuôm hŏng klei dleh dlan hlăm klei hdĭp, drei khăng păn kjăp kơ Aê Diê čiăng kwưh akâo, khădah snăn tơdah djăp mta klei êđăp ênang, găl ênưih leh, drei ênưih lui Aê Diê. Tơdah djăp bruă hlăm klei hdĭp jăk nanao, drei ăt ênưih wơr hĕ klei jăk Aê Diê ngă leh kơ pô. Hlăk anăn, drei ƀuh pô amâo lŏ čiăng jưh knang lu kơ Aê Diê ôh, leh anăn ƀrư̆ ƀrư̆ kbưi hŏng Aê Diê, leh anăn knhal tuč jing lui Aê Diê hlăm klei hdĭp pô! Mơ̆ng klei ênguôt hnĭng phung ƀuôn sang Israel, drei mâo mñă kơ sa klei, hdĭp amâo hdơr knga jing klei mphŭn kčưm kơ klei ngă soh leh anăn lui Aê Diê jing klei ênguôt hĭn mơ̆ng sa klei hdĭp. Tơdah drei hdĭp hlăm ai tiê hdơr knga Aê Diê, thâo săng Aê Diê jing Pô hrih mjing leh pô, bi mtlaih pô, djăp mta klei pô mâo leh jing hriê mơ̆ng Ñu, snăn drei srăng hdĭp djŏ hŏng bruă klam sa mta mnơ̆ng Aê Diê hrih mjing leh anăn klei hdĭp drei srăng tŭ dưn hĭn kơ Aê Diê.
Drei khăng hdơr kơ Aê Diê leh anăn knang kơ Ñu hlăk klei hdĭp êđăp ênang, găl jăk mơ̆?
Wah lač: Ơ Khua Yang, jing Pô hrih mjing leh kâo leh anăn bi tui leh kâo. Akâo kơ Ih đru kâo hdĭp nanao hlăm ai tiê hdơr knga kơ Aê Diê, êbat nanao hlăm êlan Ih wăt tơdah klei hdĭp dleh dlan amâodah găl jăk. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 20
Kênh Youtube BHKTHN:
