Nuj Nqis Ntawm Kev Tso Tus Tswv Tseg – 25/1/2025

284

 

 

2 Kevcai 32:15-18

Nqe cim:

Lawv tsis lees paub Vajtswv tus uas tsim lawv, thiab lawv tso lawv tus cawmseej uas muaj hwjchim tseg” (2 Kevcai 32:15b)

Lus nug rau sawvdaws xav:

–       Haivneeg Yixalayees tso tus Tswv tseg nyob rau ntu sijhawm twg hauv lawv lub neej?

–       Tus Tswv txojkev npautaws zoo li cas thaum Nws haivneeg mus ua kev phem?

–       Dhau ntawm haivneeg Yixalayees txojkev raug mob siab, peb tau qhuab ntuas txog yam dabtsi?

Tom qab piav qhia tej haujlwm loj uas Vajtswv tau ua rau haivneeg Yixalayees, Mauxes ceebtoom ua ntej rau tus Tswv haivneeg txog tej lus liam txim. Chiv ntawm nqe 15 yog tej lus piav qhia haivneeg Yixalayees dhau los ua ib tug neeg rog vim lawv tau noj tsau npo hauv lub tebchaws coglus tseg. Xav tias thaum lawv tau noj tsau npo, nplua mias txhua yam, tus Tswv haivneeg yuav yim huab nco Nws txiaj ntsig thiab hlub Nws ntau dua. Tiamsis xav tsis txog tias lub neej npluanuj ntawd yog txojkev coj mus rau tej ntu sijhawm tsaus ntuj nti tshaj nyob hauv cov Yixalayees li keebkwm. Vim thaum lawv tau noj tsau npo, tus Tswv haivneeg ho mus tua tsiaj fij rau dab, mus pe tej mlom uas lawv tsis tau paub dua, yog tej mlom uas tsis muaj qabhau, uas lawv cov yawgkoob tsis tau pehawm dua li (nqe 17).

Tsis muaj leejtwg muaj peevxwm totaub Vajtswv txojkev npautaws zoo li cas thaum ntsia pom tus Tswv haivneeg ua tej yam kev phem zoo li ntawd. Mus txog qib uas Mauxes tau siv tej lolus zoo li “zes kom chim”, “khib” los piav qhia Vajtswv txojkev npautaws. Hais tau hais tias, tej haujlwm ua txhaum uas cov Yixalayees ua tsis yog tsis nco tus Tswv txiaj ntsig xwb, tiamsis txojkev txhaum loj tshaj yog qhov uas lawv tau tso Vajtswv tseg, yog Tus Tswv uas tsim lawv thiab cawm lawv dim ntawm kev ua cev qhev los ua ib haivneeg tshwjxeeb rau tus Tswv. Twb yog vim kev tso tus Tswv uas muaj hwjchim tsomkwm thiab saib xyuas lawv tseg, thiaj ua rau cov Yixalayees li keebkwm los rau tom qab no muaj puv nkaus tej kua muag thiab kev khuv xim tsis txawj tag.

Thaum tabtom ntsib tej kev txomnyem nyob hauv lub neej, peb kheev los cuag tus Tswv thiab taij thov Nws pab, tiamsis thaum peb tau zoo, txhua yam mus tau zoo, peb yoojyim khiav deb tus Tswv. Thaum txhua yam nyob hauv lub neej thooj li mus tau zoo, peb yoojyim hnov qab tej koob hmoov zoo uas tus Tswv pub rau yus. Thaum ntawd, peb pom tias yus tsis tas vam khom tus Tswv ntau ntxiv, ces peb pib khiav deb tus Tswv zuj zus, thiab thaum kawg yog tshem tus Tswv tawm hauv yus lub neej mus! Dhau los ntawm haivneeg Yixalayees txojkev mob siab, peb tau qhuab ntuas ib yam tias, ua neej tsis nco txiaj ntsig yog chiv pib mus yuam kev, thiab tso tus Tswv tseg yog kev nyuaj siab tshaj rau ib lub neej. Thaum peb ua neej nyob hauv txojkev nco tus Tswv txiaj ntsig, zeem paub meej tias Vajtswv yog Tus tsim muaj yus, cawm yus, txhua yam yus muaj yog tus Tswv pub, ces peb yuav ua neej yog raws li feem xyuam ntawm yam uas tus Tswv tsim thiab peb lub neej yuav muaj nqis rau tus Tswv ntau dua.

Thov Vajtswv,

Tus Tswv, uas yog Tus tsim muaj nyuam yaus. Thov koj pab nyuam yaus paub ua neej hauv kev nco tus Tswv koj txiaj ntsig, txhua hnub taug koj txojkev, txawm yog thaum txomnyem lossis thaum tau zoo. Nyuam yaus tuav Yexus Khetos lub npe thov, A-mees.

 

Peb puas kheev nco ntsoov txog tus Tswv thiab vam khom Nws thaum yus lub neej mus tau zoo?

 

Nyeem Vajluskub hauv peb lub xyoo: 2 Xamuyees 20

Kênh Youtube BHKTHN:

https://www.youtube.com/c/bhkthn

Bài trướcThơ: SẮC XUÂN
Bài tiếp theoBoh Jhat Klei Lui Aê Diê – 25/1/2025