Klei Aê Diê Blŭ: Klei Mmuñ Hđăp 100
Êlan kliăng: “Mŭt bĕ ti ƀăng jang Ñu hŏng klei hdơr knga, leh anăn hlăm wăl sang ñu hŏng klei bi mni; hdơr knga kơ Ñu bĕ, mpŭ mni kơ anăn Ñu.” (Klei Mmuñ Hđăp 100:4)
Klei êmuh ksiêm mĭn: Si ngă leh anăn ya ngă pô čih hră iêô mthưr jih lăn ala bi mni kơ Aê Diê? Ya klei tŭ dưn mơ̆ng klei hdĭp bi mni kơ Aê Diê? Si drei bi êdah klei drei hdơr knga kơ Aê Diê hlăm klei hdĭp pô?
Klei Mmuñ Hđăp 100 lŏ dưi pia jing Klei Mmuñ Bi Mni Hdơr Knga, jing klei mmuñ jăk siam hĭn kơ klei sĭt suôr Aê Diê hŏng phung ƀuôn sang Ñu. Pô čih hră iêô mthưr jih lăn ala brei ur ktang bi mni kơ Aê Diê, grăp čô brei mă bruă kơ Aê Diê hŏng klei mơak. Brei nao ti anăp Ñu mmuñ bi mni Ñu. Brei thâo kral Aê Diê jing Khua Yang kơ grăp čô. Ñu Pô hrih mjing leh drei, amâo djŏ drei pô amâodah sa yang mkăn ôh. Drei jing phung ƀuôn sang Ñu, jing biăp Ñu rông. Brei bi mni kơ Aê Diê kyua drei mâo mŭt hlăm Sang Aê Diê, mâo Ñu răng mgang kriê dlăng.
Klei jăk mơak Aê Diê brei kơ drei êbeh dlai ƀiădah lu mnuih ăt ƀuh pô amâo mâo klei hơêč hmưi ôh leh anăn hdĭp hlăm ai tiê amâo hdơr knga. Dŭm klei jăk mơak Aê Diê brei kơ phung ƀuôn sang Ñu amâo dưi yap ôh, ƀiădah drei khăng amâo ƀuh, ngơi mang, kyua anăn tăp năng brei drei kƀĭn klei mđing čiăng thâo ya klei jăk mơak anăn. Brei drei thâo kơ klei jăk siam wăt hlăm wưng knap mñai, hlăm wăt klei ênguôt hnĭng. Klei bi mni năng ai hriê mơ̆ng klei điêt dhiêt hĭn, msĕ si êa mil jăk siam mơ̆ng mnga, rup jăk siam hlăk adiê ang dar, mnâo ƀâo mngưi mơ̆ng čhiên êsei, amâodah ƀuh jăk êun mơ̆ng kđal kŏ êjai mlam… Klei bi mni mâo mơ̆ng knuih drei thâo kral klei Aê Diê kiă kriê hlăm jih jang klei mâo hlăm klei hdĭp drei. Phung đăo brei mâo klei mưng pioh mnĭt mmông bi mĭn kơ klei jăk mơak Aê Diê brei leh anăn bi mni kơ Ñu.
Klei hdĭp hdơr knga mdê hŏng knuih hdĭp blŭ duñ duñ, leh anăn jing êa drao mdrao kơ ai tiê blŭ duñ duñ. Klei Aê Diê Blŭ mtô drei blŭ klei bi mni hrô kơ blŭ klei čhŏ mrŏ, klei mluk, amâodah klei mnêč ôh, kyua klei anăn amâo năng blŭ ôh (Êphêsô 5:4). Ai tiê hdơr knga srăng atăt kơ klei mơak. Yap klei jăk mơak Aê Diê brei jing sa knhuang jăk čiăng lăm jih klei ênguôt hnĭng. Ai tiê bi mni mâo mơ̆ng Aê Diê, Pô bi hriăm leh drei brei mdih wah lač, leh anăn thiăm klei bi mni (Kôlôs 4:2), leh anăn “Bi mni bĕ kơ Aê Diê hlăm jih jang klei truh; kyuadah klei anăn jing klei Aê Diê čiăng diih ngă hlăm Krist Yêsu” (I Têsalônik 5:18).
Hlăm klei lŏ wĭt mmuñ klei mmuñ “Brei Yap Jih Klei Jăk Aê Diê Brei”, Johnson Oatman Jr mđĭ ai grăp čô drei yap klei jăk mơak Aê Diê brei čiăng thâo ƀuh klei khăp leh anăn klei pap Aê Diê brei kơ pô: “Yap bi djăl klei jăk Aê Diê brei leh, yap jih klei jăk Ñu brei kơ grăp čô. Ơ ih srăng ƀuh jih bruă kngan Aê Diê, sĭt nik ih srăng ƀuh jih bruă kngan Ñu ngă leh.”
Drei ƀuh nanao mơ̆ klei jăk mơak Aê Diê brei leh anăn bi mni kơ Aê Diê mơ̆?
Wah lač: Ơ Khua Yang, kâo bi mni kơ Ama khăp leh, hơêč hmưi leh anăn răng kriê klei hdĭp kâo. Akâo kơ Ama đru kâo thâo yap klei jăk mơak Aê Diê brei leh anăn hdĭp kah mbha klei jăk mơak anăn kơ lu mnuih.Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
