Ntawv Nkauj 100
Nqe cim:
“Cia li mus hauv nws lub Tuamtsev thiab ua nws tsaug; cia li mus rau hauv tej chav tsev thiab qhuas nws. Cia li ua nws tsaug thiab qhuas nws lub npe.” (Ntawv Nkauj 100:4)
Lug nug rau sawvdaws xav:
– Tus sau nqua hu tagnrho neeg ntiajteb ua tus Tswv tsaug zoo licas thiab vim licas?
– Ua neej ua tus Tswv tsaug muaj qabhau dabtsi rau peb?
– Peb ua lubneej qhia tshwm kev ua tus Tswv tsaug licas lawm?
Ntawv Nkauj 100 tseem muaj lwm lub npe hu ua Zaj Nkauj Ua Tsaug, yog zaj nkauj qhuas txog tus Tswv txojkev ncaj ncees rau Nws haivneeg. Tus sau nqua hu tagnrho neeg thoob plaws ntiajteb cia li hu nkauj qhuas Tus Tswv, cia li zoo siab thiab pehawm Nws. Cia li txav los nyob ntawm Nws xubntiag thiab hu nkauj zoo siab. Cia li lees hais tias tus Tswv yog Vajtswv. Nws yog tus tsim peb, tsis yog peb rov tsim lossis lwm tus vajtswv tsim. Peb yog Nws haivneeg thiab peb yog Nws pab yaj uas Nws tu. Cia li ua tus Tswv tsaug vim peb tau mus hauv Nws lub Tuamtsev, tau Nws txojkev saibxyuas, tsomkwm.
Tus Tswv txoj koob hmoov pub rau peb muaj npluamias tiamsis muaj coob leej tseem pom hais tias tus kheej tsis tau koob hmoov thiab ua neej tsis nco txiajntsig. Tej koob hmoov tus Tswv pub rau Nws cov menyuam suav tsis txheeb, tiamsis peb pheej ntsia tsis pom, tsis quavntsej txog, vim li ntawd ntau zaug peb yuav tsum ua tib zoo saib thiaj zeem paub tej koob hmoov ntawd. Peb yuav tsum zeem paub tej yam zoo nyob rau ntu sijhawm ntsib phem, kev nyuaj siab ntxhov plawv. Kev ua tus Tswv tsaug pib ntawm tej yam me me xws li tej xim ntawm lub paj, daim duab zoo nkauj thaum sawv ntxov, cov pa ncho tsw qab ntawm tej zaub mov, lossis kev tau zoo pw ntawm lub ncoo mos muag thaum tsaus ntuj,… Kev ua tus Tswv tsaug pib ntawm peb kev zeem paub tus Tswv lub hwjchim tswjkav txhua yam tshwmsim hauv peb lubneej. Cov ntseeg yuav tsum tseg sijhawm los xav txog tej koob hmoov uas tus Tswv pub thiab ua Nws tsaug.
Lubneej ua tsaug zoo txawv lubneej pheej chim npau taws, thiab yog tej tshuaj daws txojkev yws taus. Vajluskub qhia peb hais tej lus ua tsaug hloov lus vuabtsuab uas ntsawv mloog thiab tej lus uas tsis muaj qabhau (Efexus 5:4). Nplooj siab ua tsaug ua rau muaj kev zoo siab. Suav tej koob hmoov zoo tus Tswv pub yog ib kauj ruam zoo ua rau kev mob siab yaj xam mus. Kev ua tus Tswv tsaug pib ntawm Vajtswv tuaj, Nws qhia peb yuav tsum niaj hnub nquag thov Vajtswv tsis txhob nkees thiab nco ntsoov ua nws tsaug (Kaulauxais 4:2). Vajtswv Txojlus qhia tias: “Txawm yog nej raug kev txomnyem thiab tau zoo los nej yuav tsum ua Vajtswv tsaug. Vajtswv xav kom nej txhua tus uas nrog Yexus Khetos koom ib txojsia lawm ua tej no” (I Thexalaunikes 5:18).
Nyob hauv nqe tshooj ntawm zaj nkauj “Cia Li Suav Tej Koob Hmoov Tus Tswv Pub”, Johnson Oatman Jr. tau txhawb peb txhua tus lub zog suav tej koob hmoov tus Tswv pub thiaj yuav pom Nws txoj kev hlub thiab Nws txoj koob hmoov uas pub rau peb, zaj nkauj hais tias: “Cia li suav tej koob hmoov Leej Txiv pub. Cia li hais tej koob hmoov txhua lub npe. Suav tej koob hmoov, hais tawm txhua lub npe. Koj yeej yuav pom txog haujlwm Leej Txiv tau ua.”
Thov Vajtswv,
Tus Tswv, nyuam yaus ua Koj tsaug vim Koj tau foom koob hmoov thiab saibxyuas nyuam yaus lubneej. Thov Koj pub rau nyuam yaus paub suav Koj tej koob hmoov thiab ua neej faib pub tej koob hmoov ntawd rau lwm tus. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas zeem paub tej koob hmoov tus Tswv pub thiab ua Nws tsaug txhua hnub lawm tau?
Nyeem Vajluskub hauv peb lub xyoos: Loos 14
Kênh Youtube BHKTHN:
