Klei Aê Diê Blŭ: I Y-Yôhan 3:7-10
Êlan kliăng: “Hlei pô amâo ngă klei kpă amâo kbiă hriê mơ̆ng Aê Diê ôh, kăn rei pô amâo khăp kơ ayŏng adei ñu” (I Y-Yôhan 3:10b)
Klei êmuh ksiêm mĭn: Khua ƀĭng kna Y-Yôhan kñăm kơ ti knuih Aê Diê hlăm trăn Klei Aê Diê Blŭ anei? Si ñu bi mguôp klei kpă ênô hŏng klei khăp? Si drei bi êdah knuih kpă ênô hlăm klei hdĭp drei?
Kma blŭ, Khua ƀĭng kna Y-Yôhan iêô kwưh kơ phung đăo leh kơ Khua Yang “đăm brei arăng mplư diih ôh” hlăm klei bi kah phung anak Aê Diê leh anăn anak yang jhat. Ñu kñăm hlei pô ngă klei kpă, pô anăn jing anak Aê Diê, hlei pô ngă soh jing anak yang jhat. Msĕ mơh ñu lač Aê Diê jing Pô kpă ênô (êlan 7), kyuanăn, hlei pô jing dŏ Aê Diê, srăng čŏng čiăng êbat hlăm klei kpă ênô. Klei kpă ênô Aê Diê bi mlih klei drei tluh čiăng ƀrư̆ hruê drei djăl thâo kral hĭn klei soh leh anăn ƀuăn rơ̆ng srăng bi êdah knuih kpă ênô Ñu.
Lŏ čuê, Khua ƀĭng kna Y-Yôhan lŏ mñă: Khua Yang Yêsu hriê leh ti lăn ala čiăng bi rai bruă yang jhat, leh anăn tơdah sa čô mă tŭ Khua Yang, snăn Aê Diê srăng dôk hlăm pô anăn, pô anăn amâo dưi lŏ ngă soh nanao ôh (êlan 8-9). Phŭn kơ klei mtô anei jing klei mtă brei răng, leh anăn ăt jing klei bi mđĭ ai mơh: Klei soh amâo guôp ôh hŏng klei hdĭp phung anak Aê Diê (êlan 10a).
Knhal tuč, klei kpă ênô leh anăn klei khăp jing klei bi knăl kơ phung jing anak Aê Diê (êlan 10b). Khua ƀĭng kna Y-Yôhan bi mguôp kjăp klei kpă ênô hŏng klei khăp. Ñu lač hlei pô amâo khăp ôh kơ ayŏng adei ñu, pô anăn amâo djŏ anak Aê Diê ôh. Klei khăp amâo djŏ jing knŏng klei bi kčŭt hlăm ai tiê ôh ƀiădah jing wăt klei bi êdah klă knuih Aê Diê găn hŏng drei mơh. Êbat hlăm klei kpă ênô ƀiădah amâo mâo klei khăp ôh amâo srăng dưi thâo săng djŏ ôh kơ Aê Diê, kyuadah klei kpă ênô leh anăn klei khăp Aê Diê amâo srăng bi ktlah ôh. Klei doh jăk Aê Diê srăng phat kđi klei soh, ƀiădah klei khăp Ñu srăng tui duah klei lŏ bi kơrŭ mnuih soh. Khua Yang Yêsu bi êdah leh klei anei bŏ hŏng klei jăk klă: Ñu hriê čiăng bi rai bruă yang jhat leh anăn bi mtlaih drei mơ̆ng klei ktư̆ juă mơ̆ng klei soh, jih jang kbiă mơ̆ng klei khăp prŏng Aê Diê Ama khăp kơ drei sơăi.
Klei sĭt nik anei amâo klei bi mđĭ ai lu snăk, kyuadah drei amâo lŏ mâo klei bi kmhal amâodah lŏ dôk đuôm ti gŭ klei myang klei soh ôh (Rôm 8:1). “Mjeh Aê Diê dôk hlăm” drei (êlan 9), čiăng lač Yang Mngăt Jăk srăng đru drei hdĭp kpă ênô leh anăn thâo khăp. Ƀiădah lĕ, anei mơh jing klei dleh dlan prŏng hlăm lăn ala bŏ hŏng klei soh anei. Grăp hruê, brei drei knang kơ Yang Mngăt Jăk čiăng lŏ mkra hĕ klei drei dôk dơ̆ng ƀơ̆ng huă čiăng bi guôp hŏng klei jing – jing phung anak Pô kpă ênô. Drei amâo dưi hưn kơ drei jing anak Aê Diê ôh tơdah klei drei dôk dơ̆ng ƀơ̆ng huă bi kdơ̆ng hŏng klei kpă ênô Ñu, leh anăn gang hĕ klei Aê Diê khăp kơ mnuih mkăn. Klei hdĭp phung anak Aê Diê srăng bi êdah knuih kpă ênô leh anăn klei khăp Aê Diê.
Si ngă drei dưi thâo kơ drei jing anak Aê Diê?
Wah lač: Ơ Khua Yang, bi mni kơ Ih kyua Ih brei kâo jing anak Ih. Đru kâo hdĭp bi êdah klei kpă ênô leh anăn klei khăp Ih hlăm klei kâo dôk dơ̆ng ƀơ̆ng huă grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Rut 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
