I Yauhas 3:7-10
Nqe cim:
“Tus uas tsis nyiam ua ncaj ncees lossis tsis hlub nws kwv nws tij, tus ntawd tsis yog Vajtswv menyuam” (I Yauhas 3:10b)
Lus nug xav:
– Timthawj Yauhas hais meej txog tus Tswv tus yamntxwv twg hauv ntu Vajluskub no?
– Yauhas hais txog qhov txuas ntawm kev ncaj ncees thiab kev hlub zoo li cas?
– Peb qhia tshwm tus yamntxwv ncaj ncees hauv kev ua neej li cas?
Qhov xubthawj, Timthawj Yauhas nqua hu Vajtswv cov menyuam “tsis txhob pub leejtwg ntxias nej” kom thiaj cais tau Vajtswv cov menyuam thiab dab cov menyuam. Yauhas hais tias tus uas ua ncaj ncees yog Vajtswv menyuam, tiamsis tus uas ua txhaum ces yog dab menyuam. Yauhas kuj hais meej tias Vajtswv yog tus ncaj ncees (nqe 7), yog li ntawd, cov uas yog Vajtswv menyuam yeej yuav ua ncaj ncees. Vajtswv txojkev ncaj ncees hloov peb tej kev ntshaw kom peb yim hnub yim qaij deb tej kev txhaum thiab coglus ua neej qhia tawm Nws txojkev ncaj ncees.
Txuas ntxiv, Timthawj Yauhas tau hais tias: Tswv Yexus los rhuav dab ntxwgnyoog tes haujlwm, thiab leejtwg los ntseeg Yexus ces Vajtswv nyob hauv tus ntawd, tus neeg ntawd tsis yog pheej yuav ua txhaum ntxiv (nqe 8-9). Qhov tseemceeb hauv cov lus no ke yog lus ceebtoom, ke yog lus txhawb zog: kev txhaum tsis phim nyob hauv Vajtswv cov menyuam kev ua neej (nqe 10a).
Qhov kawg, kev ncaj ncees thiab kev hlub yog lub cim ntawm Vajtswv tus menyuam (nqe 10b). Timthawj Yauhas muab kev ncaj ncees thiab kev hlub sib txuas. Yauhas ceebtoom hais tias yog leejtwg tsis hlub nws kwv nws tij ces tsis yog Vajtswv menyuam. Kev hlub tsis yog kev xav tiamsis yog qhia tshwm Vajtswv tus yamntxwv dhau ntawm peb. Ua ncaj ncees tiamsis yog tsis muaj kev hlub ces yuav qhia tsis tau qhov tseeb txog Vajtswv, vim kev ncaj ncees thiab kev hlub nrug tsis tau. Vajtswv txojkev dawbhuv ntxub kev txhaum, tiamsis Nws txojkev hlub nrhiav cawm tus neeg txhaum. Tswv Yexus qhia tshwm qhov no meej heev: Nws los hauv ntiajteb yog los rhuav dab ntxwgnyoog tes haujlwm thiab cawm peb dim ntawm txojkev txhaum, txhua yam no yog ua los ntawm Leej Txiv txojkev hlub pub rau peb.
Qhov tseeb no txhawb zog heev vim peb tsis raug teem txim lossis nyob hauv qab tswj hwm ntawm kev txhaum lawm (Loos 8:1). “Rau qhov Vajtswv cov noob” nyob hauv peb (nqe 9), txhais tau tias Vaj Ntsujplig yuav pab kom peb ua neej ncaj ncees thiab sib hlub. Txawm li ntawd los qhov no kuj yog ib qhov kev sim loj heev nyob hauv lub ntiajteb uas puv nplho kev txhaum no. Txhua hnub, peb yuav tsum vamkhom Vaj Ntsujplig qhia peb ua neej kom phim lub meejmom ua tus Tswv ncaj ncees menyuam. Peb tsis txhob hais tias kuv yog Vajtswv tus neeg tiamsis tseem ua neej tawmtsam txojkev ncaj ncees thiab txwv Vajtswv txojkev hlub pub rau lwm tus. Vajtswv cov menyuam kev ua neej yuav tsum qhia tawm Vajtswv tus yamntxwv ncaj ncees thiab hlub.
Thov Vajtswv,
Vajtswv, ua tsaug rau qhov uas Koj pub tau ua Koj menyuam. Thov Koj qhia nyuam yaus ua neej qhia tawm Koj tus yamntxwv ncaj ncees thiab hlub hauv kev ua neej txhua hnub. Nyuam yaus tuav Tswv Yexus Khetos lub npe thov, Amees.
Yuav ua li cas kom peb paub tias yus yog Vajtswv menyuam?
Nyeem Vajluskub hauv peb lub xyoo: Luv 2
Kênh Youtube BHKTHN:
