Klei Aê Diê Blŭ: Klei Mtô Mñă Klei Bhiăn 21:18-21
Êlan kliăng: “Phung anak thâo mĭn dôk hmư̆ klei ama diñu bi hriăm, ƀiădah phung mnuih mưč amâo dôk hmư̆ ôh klei arăng ƀuah” (Klei Bi Hriêng 13:1)
Klei êmuh ksiêm mĭn: Ya jing bruă čuăn kơ phung anak hŏng amĭ ama? Ya klei brei amĭ ama ngă tơdah sa čô anak ƀrư̆ hruê ƀrư̆ khăng kŏ, amâo gưt asăp ôh? Ya ngă klei bi kmhal jing ktrŏ msĕ snăn lĕ? Klei hriăm anei brei phung đăo kơ Krist weh đuĕ kơ ya klei?
Hlăm Pluh Mta Klei Bhiăn, klei bhiăn mpŭ kơ amĭ ama jing sa hlăm dŭm bruă čuăn tal êlâo hĭn brei phung anak čô Aê Diê ngă hlăm klei bi mguôp hdơ̆ng mnuih (Klei Kbiă 20:12). Klei anei brei ƀuh klei phung anak mpŭ kơ amĭ ama jing bruă ngă êlâo hĭn hlăm klei bi mguôp hdơ̆ng mnuih. Sa hlăm dŭm bruă ngă čiăng bi êdah kơ klei mpŭ anăn jing gưt jih kơ klei amĭ ama mtô lač (Klei Bi Hriêng 1:7-9; 13:1). Trăn Klei Aê Diê Blŭ hruê anei čiăng lač kơ klei tơdah mâo phung anak khăng kŏ, khăng bi kdơ̆ng, khut khat amâo gưt asăp kơ amĭ ama ôh, măng ai amĭ ama mtô lač ƀuah mka dưn diñu ăt ngă klei dôk dơ̆ng ƀơ̆ng huă êgao klei bhiăn, kreh kpiê ruă mơh. Hŏng phung anak khăng kŏ khăng ngă klei bi kdơ̆ng amâo lŏ dưi mkra msĕ snăn, “snăn ama leh anăn amĭ ñu srăng mă ñu leh anăn ba ñu kơ phung khua mduôn ƀuôn ñu ti ƀăng jang anôk ñu dôk” (êlan 19). Hlăm ênuk anăn, phung khua mduôn bi kƀĭn ti ƀăng jang ƀuôn pioh phat kđi msĕ si sa anôk phat kđi. Tơdah bi klă leh klei amĭ ama bi êdah jing klei sĭt snăn phung ƀuôn sang srăng bhĭr anak ngă klei bi kdơ̆ng anăn hŏng boh tâo tơl djiê.
Năng ai drei ƀuh klei bi kmhal anei ktrŏ đei kơ anak mnuih. Ƀiădah bi hŏng Aê Diê, anei jing sa mta klei jhat kjham snăk brei msir mkra hĕ tơl hnơ̆ng. Kyuadah tơdah anak ăt khăng kŏ ngă klei bi kdơ̆ng, bi êmut kơ klei amĭ ama mtô lač, ngă klei amâo uêñ kpiê ruă nanao, klei anăn amâo djŏ knŏng amâo mpŭ kơ amĭ ama ôh ƀiădah wăt ngă soh hŏng Aê Diê mơh, soh hŏng klei bhiăn tal êma hlăm Pluh Mta Klei Bhiăn. Anei jing sa klei soh prŏng snăk brei mkra hŏng klei mtăp mđơr čiăng đăm mâo klei ƀrư̆ hruê ƀrư̆ lu phung anak ngă klei bi kdơ̆ng hlăm gŏ sang, atăt truh kơ klei bi mđĭ klei rŭng hlăm yang ƀuôn leh anăn bi čhŏ anăn doh jăk sa găp djuê pioh kơ Aê Diê pô.
Jing sa čô anak, brei drei gưt kơ klei amĭ ama bi hriăm mjuăt. Hruê anei lu phung hđeh mâo klei mĭn lač gưl ênuk amĭ ama mduôn leh kyanăn amâo mâo thâo săng leh anăn mâo dưi mtô lač ôh kơ phung hđeh. Mâo đa đa lač klei amĭ ama găn leh jing kdruêh grua ênuk đưm amâo bi guôp ôh hŏng klei hdĭp mrâo ênuk anei. Mâo đa đa phung hđeh mkăn lač diñu dưi hriăm lu klei thâo mơ̆ng sang hră, mơ̆ng internet hĭn mơ̆ng amĭ ama…Kyua hŏng klei mĭn snăn yơh mâo klei bi kbưi phung anak hŏng amĭ ama, čôñ kơ klei amĭ ama mtô lač, kƀah klei đup gưt kơ amĭ ama atăt truh kơ klei dôk dơ̆ng ƀơ̆ng huă amâo thâo mpŭ kơ amĭ ama. Jing phung đăo, brei drei weh đuĕ čiăng đăm lĕ hlăm klei anei.
Si ngă drei gưt leh anăn bi êdah klei mpŭ kơ amĭ ama mơ̆?
Wah lač: Ơ Khua Yang, jing Pô mdưm leh hmei hlăm gŏ sang mdê mdê, hŏng lu klei hdĭp mda mdê mdê. Akâo Khua Yang đru kâo măng ai si jing ăt brei kâo mpŭ mơh kơ amĭ ama msĕ si klei bhiăn Ih mtă leh.
Dlăng Klei Aê Diê Blŭ hlăm tlâo thŭn: Y‑Sakari 3:1-5:11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
