Klei Aê Diê Blŭ: I Y-Pêtrôs 1:8-9
Êlan kliăng: “Wăt tơdah diih amâo tuôm ƀuh Ñu ôh, diih khăp leh kơ Ñu. Wăt tơdah diih amâo tuôm ƀuh Ñu ôh ară anei, diih đăo leh kơ Ñu leh anăn hơ̆k mơak hŏng klei mơak guh kơang amâo thâo mblang.” (I Y-Pêtrôs 1:8)
Klei êmuh ksiêm mĭn: Ya ngă Khua ƀĭng kna Y-Pêtrôs bi mđĭ ai phung đăo khăp leh anăn đăo kơ Khua Yang wăt tơdah amâo ƀuh ôh Ñu? Ya klei jăk mơak klei đăo anăn brei? Si drei yua klei hriăm anei kơ pô leh anăn kơ bruă hiu hưn đăo?
Khua ƀĭng kna Y-Pêtrôs soh mơ̆ tơdah ñu bi mđĭ ai phung đăo dôk hdĭp bra đuĕ tŭ klei arăng ngă jhat kyua klei đăo, wăt tơdah diih amâo tuôm ƀuh Ñu ôh, diih khăp leh kơ Ñu, wăt tơdah diih amâo tuôm ƀuh Ñu ôh ară anei, diih đăo leh kơ Ñu leh anăn hơ̆k mơak hŏng klei mơak guh kơang amâo thâo mblang (êlan 8)? Leh kbiă lŏ hdĭp, Khua Yang Yêsu ăt tuôm lač hŏng phung Khua ƀĭng kna leh anăn lač hŏng Y-Thômas, pô lač brei ƀuh kơh srăng đăo snei: “Ih đăo kyuadah ih ƀuh leh kâo, djŏ mơ̆? Jăk mơak yơh kơ phung amâo tuôm ƀuh ôh ƀiădah đăo leh” (Y-Yôhan 20:29). Khua ƀĭng kna Y-Pêtrôs amâo iêô mthưr khăp amâo thâo săng klă leh anăn đăo kơ Khua Yang hŏng klei amâo thâo klă ôh, ƀiădah mơ̆ng klei thâo ñu pô jing pô tuôm ƀuh leh anăn hdĭp hŏng Khua Yang Yêsu. Klei Aê Diê Blŭ tinei amâo mtô drei khăp leh anăn đăo kơ klei amâo thâo săng ôh, ƀiădah khăp leh anăn đăo mơ̆ng tur knơ̆ng kjăp. Klei đăo anăn ba kơ phung đăo kơ Krist dua klei jăk mơak. Êjai ară anei, mâo klei mơak lu snăk wăt tơdah dôk tuôm hŏng lu klei dleh dlan. Leh anăn hlăm hruê êdei anăp jing sa klei hdĭp mơak dưn klei bi mtlaih kluôm ênŭm hlăm klei Khua Yang Yêsu kiă kriê. Klei jăk mơak anăn mđĭ ai phung ƀuôn sang Aê Diê amâo hngah ôh kơ klei đăo tơdah tuôm hŏng klei lông dlăng.
Hruê anei, drei ăt khăp leh anăn đăo kơ Aê Diê mơ̆ng Klei Aê Diê Blŭ jing Klei Blŭ Aê Diê, ăt jing klei hưn bi sĭt mơ̆ng phung tuôm ƀuh leh anăn hdĭp hŏng Khua Yang lŏ čih. Êlâo hĭn jing mơ̆ng klei thâo jăk siam drei pô hdĭp hŏng Khua Yang jing Pô hdĭp hlăm ai tiê. Lu mnuih nao hŏng Khua Yang hŏng klei đăo amâo klă, nao ti sang Aê Diê kyua huĭ kơ klei bi kmhal hlăm war pui amâodah kyua čiăng duah klei jăk mơak mnơ̆ng dhơ̆ng. Mâo mnuih tui hlue Khua Yang kyua klei mgô̆ mơ̆ng gŏ sang, amâodah čiăng dưi mâo klei bi dôk ung mô̆ pô čiăng… Khua Yang čiăng kơ grăp čô drei hur har hriăm Klei Aê Diê Blŭ čiăng thâo leh anăn kral Khua Yang lu hĭn čiăng kơ drei khăp leh anăn đăo kơ Pô drei amâo ƀuh ôh hŏng ală mta kđeh asăr ƀiădah thâo hŏng ală klei đăo.
Leh anăn drei ăt yua klei hriăm anei tơdah nao hưn Anăn Khua Yang, brei drei mblang kơ phung ka đăo thâo kơ klei soh, thâo kơ Khua Yang Yêsu djiê hrô leh kơ klei soh drei, leh anăn Ñu kbiă lŏ hdĭp leh čiăng hdĭp hlăm ai tiê phung đăo kơ Khua Yang. Đăm ktŭng, mgô̆ phung ka đăo brei digơ̆ đăo kơ Khua Yang tơdah digơ̆ ka thâo săng ôh ya ngă leh anăn ka thâo ôh kơ hlei Pô digơ̆ đăo jing, ya klei ngă leh kơ digơ̆. Ka ƀuh ôh Khua Yang ƀiădah khăp kơ Ñu, ka ƀuh ôh Khua Yang ƀiădah đăo kơ Ñu amâo djŏ jing klei ka thâo săng ôh.
Drei dôk khăp leh anăn đăo kơ Khua Yang hŏng klei đăo dưm ti tur kjăp mơ̆?
Wah lač: Ơ Aê Diê, kâo bi mni kơ Ih kyua Ih brei Klei Aê Diê Blŭ čiăng kơ kâo hriăm leh anăn đăo. Akâo kơ Ama đru kâo bi mklă klei đăo kâo hŏng klei kjăp hlăm Khua Yang, jing Pô ară anei kâo amâo ƀuh, ƀiădah khăp leh anăn đăo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
