1 Petus 1:8-9
Nqe cim:
“Txawm yog nej tsis pom nws los nej yeej hlub nws, thiab txawm yog nej qhovmuag tsis pom nws los nej yeej ntseeg nws. Yog li ntawd, nej thiaj zoo siab kawg nkaus tsis pom qab yuav piav li” (1 Petus 1:8)
Lus nug rau sawvdaws xav:
– Vim li cas timthawj Petus txhawb cov ntseeg kom hlub thiab ntseeg Vajtswv txawm yog lawv tsis pom Nws?
– Txoj kev ntseeg ntawd nqa tau koob hmoov dabtsi los?
– Peb siv zaj kawm no rau tus kheej, thiab kev ua tim khawv txog Vajtswv li cas?
Timthawj Petus hais puas yog cai thaum nws txhawb cov ntseeg uas tawg mus nyob qhov txhua chaw, raug kev txomnyem vim ntseeg Tswv Yexus hais tias, txawm yog nej tsis pom Nws los nej yeej hlub nws, thiab txawm yog nej tsis ntsib Nws los nej yeej ntseeg nws. Yog li ntawd, nej thiaj zoo siab kawg nkaus tsis pom qab yuav piav li (nqe 8)? Tom qab uas Tswv Yexus sawv hauv qhov tuag rov qab los, Tswv Yexus kuj hais rau cov thwjtim thiab Thaumas, tus uas taij kom pom Yexus nws thiaj ntseeg hais tias: “ “Koj pom kuv, koj thiaj ntseeg xwb los? Tus uas tsis tau pom kuv tiamsis nws ntseeg, tus ntawd tau koob hmoov!” (Yauhas 20:29). Timthawj Petus tsis tau nqua hu kom peb ntseeg Yexus zoo li cov neeg dig muag, thiab ntseeg raws qab uas tsis paub dabtsi, tiamsis nws nqua hu sawvdaws los nrog nws saib tej uas nws paub, tej uas nws pom thiab nrog Tswv Yexus nyob ua ke dhau los lawm. Vajtswv Txojlus tsis tau qhia kom peb ntseeg digmuag tsis paub dabtsi, tiamsis peb yuav tsum paub tseeb thiab ntseeg tej uas Vajtswv Txojlus twb qhia tseg lawm kom peb sawv taus ruaj khov. Txoj kev ntseeg ntawd nqa tau ob yam koob hmoov los rau tus ntseeg. Hauv lub neej tamsim no, yuav muaj kev zoo siab uas tsis pom qab yuav piav li txawm tabtom nyob tabmeeg rau ntau yam kev khwv. Thiab lub neej yav tom ntej nws yuav zoo siab kawg nkaus uas tau txais txoj kev cawm dim puv ntoob hnub uas Tswv Yexus rov qab los. Tej koob hmoov ntawd yuav txhawb tau peb cov ntseeg lub zog kom tsis tso kev ntseeg tseg thaum ntsib kev sim siab.
Niaj hnub nimno, peb kuj ntseeg Tswv Yexus thiab hlub Vajtswv los ntawm phau Vajluskub uas yog Vajtswv Txojlus qhia, kuj yog tej lus timkhawv ntawm cov neeg uas twb tau pom, tau nyob nrog tus Tswv ua ke sau cia. Tshaj li ntawd yog dhau ntawm tej kev ceemlij (kinh nghiệm) ua neej nrog Vajtswv tus uas nyob hauv peb lub siab. Muaj ntau leej los cuag Vajtswv zoo li npau suav uas tsis meej pem, mus tom tuamtsev vim ntshai raug txim poob ntuj tawg lossis vim yog xav nrhiav tej koob hmoov hauv ntiajteb. Muaj qee leej ntseeg Vajtswv vim tsevneeg quabyuam lossis ntseeg kom tau tus txij nkawm uas yus ntshaw…tus Tswv xav kom peb kub siab lug kawm Nws Txojlus kom paub thiab ceem lij(kinh nghiệm) Nws ntau ntxiv, thiaj ua rau peb paub hlub thiab ntseeg tus Tswv uas peb lub qhov muag sab qaij tawv tsis pom, tiamsis pom thiab paub los ntawm lub qhov muag kev ntseeg.
Thiab peb kuj siv zaj kawm no los ua qauv thaum mus ua tim khawv txog Tswv Yexus zaj, yuav tsum piav qhia rau cov tsis tau ntseeg kom paub txog kev txhaum, paub tias Tswv Yexus tau tuag theej lawv tej kev txhaum, Nws sawv rov qab los thiab Nws nyob hauv tus ntseeg lub siab. Tsis txhob ntxias lossis nquab yuam tus tsis tau ntseeg kom los ntseeg, thaum uas lawv tsis tau totaub hais tias yog li cas thiab tsis tau paub tus uas lawv yuav ntseeg yog tus twg, tau ua dabtsi rau lawv. Tsis tau pom tus Tswv los yeej hlub nws, tsis tau pom tus Tswv los ntseeg nws, tiamsis yuav tsum tsis txhob ntseeg ntawm kev dig muag.
Thov Vajtswv,
Vajtswv tus uas nyuam yaus hwm thiab ntseeg, ua tsaug rau Koj Txojlus uas qhia rau nyuam yaus paub Koj thiab ntseeg. Thov Koj pab nyuam yaus ruaj siab hauv txoj kev ntseeg Koj, txawm nyuam yaus tsis pom Koj los, thov pab kom nyuam yaus tseem hlub thiab ntseeg Koj. Nyuam yaus tuav Tswv Yexus Khetos lub npe thov, Amees.
Yuav ua cas thiaj sawv ruaj hauv txoj kev ntseeg uas qhov muag ntsia tsis pom?
Nyeem Vajluskub hauv peb lub xyoos: 2 Xwmtxheej Vajntxwv 1
Kênh Youtube BHKTHN:
